ନୂଆଦିଲ୍ଲୀ: ଛତିଶଗଡର ଜାଂଜଗିରି ଚମ୍ପାରେ କଂଗ୍ରେସ ନେତା ପଞ୍ଚରାମ ଯାଦବଙ୍କ ସମେତ ପରିବାରର ଚାରିଜଣ ସଦସ୍ୟ ବିଷ ପିଇ ଆତ୍ମହତ୍ୟା କରିଛନ୍ତି । ସମସ୍ତ ଚାରିଜଣଙ୍କୁ ବିଲାସପୁରର ସିମ୍ସି ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ଗତକାଲି ରାତିରେ ଚିକିତ୍ସା ସମୟରେ ବଡ ପୁଅ ନୀରଜ ଯାଦବଙ୍କ ମୃତ୍ୟୁ ହୋଇଥିଲା । ବର୍ତ୍ତମାନ କଂଗ୍ରେସ ନେତା ପଞ୍ଚରମା, ତାଙ୍କ ପତ୍ନୀ ଏବଂ ସାନ ପୁଅ ସୁରଜ ଯାଦବଙ୍କ ମଧ୍ୟ ଦେହାନ୍ତ ହୋଇଛି । ଋଣ ସମସ୍ୟା ହେତୁ ସମଗ୍ର ପରିବାର ଆତ୍ମହତ୍ୟା କରିଥିବା ସନ୍ଦେହ କରାଯାଉଛି । କୋଟୱାଲି ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି।
କଂଗ୍ରେସ ନେତା ପଞ୍ଚରାମ ଯାଦବ ଜାଂଜଗିର ପୌରସଂସ୍ଥାରେ ଜଣେ କଣ୍ଟ୍ରାକ୍ଟର ଭାବରେ କାର୍ଯ୍ୟ କରୁଥିଲେ । କୁହାଯାଉଛି ଯେ ସେ ଋଣ ଭାରରରେ ବୁଡି ରହିଥିଲେ । ଆଉ ଏହି ଋଣ ଭାର ଯୋଗୁଁ ପୁରା ପରିବାର ଚାପରେ ଥିଲେ । ଏଥି ପାଇଁ ସମସ୍ତେ କୀଟନାଶକ ପିଇଥିଲେ । ଏସପି ରାଜେନ୍ଦ୍ର କୁମାର ଜୈସୱାଲ କହିଛନ୍ତି ଯେ ସମସ୍ତଙ୍କୁ ଚିକିତ୍ସା ପାଇଁ ଜିଲ୍ଲା ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଜିଲ୍ଲା ଡାକ୍ତରଖାନାର ଡାକ୍ତରମାନେ ଚାରିଜଣଙ୍କୁ ସିମ୍ସି ବିଲାସପୁରକୁ ପଠାଇଥିଲେ । ବଡ ପୁଅ ନୀରଜ ରାସ୍ତାରେ ମୃତ୍ୟୁ ବରଣ କରିଥିଲେ । SIMS ବିଲାସପୁରରେ ଅନ୍ୟ ସମସ୍ତଙ୍କ ଚିକିତ୍ସା ଜାରି ରହିଥିଲା ।
ଆଜି ସକାଳେ ପଞ୍ଚରାମଙ୍କ ସହ ତାଙ୍କ ପତ୍ନୀ ଏବଂ ସାନ ପୁଅ ମଧ୍ୟ ମୃତ୍ୟୁ ବରଣ କରିଛନ୍ତି । ଘଟଣା ସମ୍ପର୍କରେ ସୂଚନା ପାଇବା ପରେ ଏସପି କଂଗ୍ରେସ ନେତାଙ୍କ ଘରକୁ ଯାଞ୍ଚ କରିଥିଲେ । ଯାଞ୍ଚ ପରେ ଘରକୁ ସିଲ୍ କରାଯାଇଛି । ଏସପି ରାଜେନ୍ଦ୍ର କୁମାର ଜୈସୱାଲ କହିଛନ୍ତି ଯେ, କଂଗ୍ରେସ ନେତାଙ୍କ ମୃତ୍ୟୁ ପଛରେ ସ୍ପଷ୍ଟ କାରଣ ଏପର୍ଯ୍ୟନ୍ତ ଜଣା ପଡିନାହିଁ । ପୋଲିସ ଏହି ଘଟଣାର ତଦନ୍ତ କରୁଛି ।
