ସୋର, ୦୭/୦୨ : ଗୋଟିଏ କ୍ଲିକ୍ରେ ଖାଲି ହୋଇଯାଉଛି ଆକାଉଣ୍ଟ। ପ୍ରତିଦିନ ନୂଆ ଉପାୟରେ ଠକେଇ କରୁଛନ୍ତି ସାଇବର୍ ଠକ। ପୁଣି ସାଇବର ଠକେଇର ଶିକାର ହେଲେ ଗ୍ରାହକ ସେବା କେନ୍ଦ୍ର ମାଲିକ। ବାଲେଶ୍ଵର ଜିଲ୍ଲା ଖଇରା ବ୍ଲକ କୁପାରୀର ଏକ ଗ୍ରାହକ ସେବା କେନ୍ଦ୍ର ମାଲିକଙ୍କ ଠାରୁ ଲୁଟ୍ ହୋଇଛି। ମାଲିକ ବିକାଶ କୁମାର ସାହୁ ଖଇରା ଥାନାର ଦ୍ଵାରସ୍ଥ ହୋଇଛନ୍ତି।
ସୂଚନାନୁଯାୟୀ, ବିକାଶ ଓ ତାଙ୍କ ସହଯୋଗୀଙ୍କ ହ୍ବାଟ୍ସଅପ ଗ୍ରୁପକୁ ଏକ ଲିଙ୍କ୍ ଆସିଥିଲା। ବିକାଶ ଡାଉନଲୋଡ କରିବା ମାତ୍ରେ ତାଙ୍କର ସବୁ ତଥ୍ୟ ହ୍ୟାକ୍ ହୋଇ ଯାଇଥିଲା । ଏହାପରେ ଘନଘନ ଓଟିପି ଆସିଥିଲା । ଗୋଟିଏ ଶାଖା ଖାତାରେ ଥିବା ୬ଶହ ଟଙ୍କା ଉଠିଯାଇଥିବା ସୂଚନା ପାଇବା ମାତ୍ରେ ସେ ତତ୍କ୍ଷଣାତ୍ ତାଙ୍କର ଅନ୍ୟ ଆକାଉଣ୍ଟରେ ଥିବା ୧ ଲକ୍ଷ ଟଙ୍କାକୁ ନିଜେ ଉଠାଇ ଆଣିଥିଲେ। ପରେ ହ୍ୟାକର ସେହି ୧ ଲକ୍ଷ ଉଠାଇବା ବେଳେ ଫେଲ ମାରିଥିଲା। ମାତ୍ର ଗୋଟିଏ ସେକେଣ୍ଡରେ ସେ ଏକ ବଡ଼ ଧରଣର ଠକାମୀରୁ ବର୍ତ୍ତି ଯାଇଥିଲେ। ଏବେ ବିକାଶଙ୍କ ମୋବାଇଲ ହ୍ୟାକ ହୋଇଯାଇଥିବା ବେଳେ ତାଙ୍କ ମୋବାଇଲ ନମ୍ବରରୁ ତାଙ୍କ ସହଯୋଗୀ ପାଖକୁ ମେସେଜ ଯାଇଛି। ସେ ମଧ୍ୟ ଠକେଇର ଶିକାର ହୋଇଛନ୍ତି। ବିକାଶ ଏନେଇ ଖଇରା ଥାନାରେ ଲିଖିତ ଅଭିଯୋଗ କରିଛନ୍ତି।