ନୂଆଦିଲ୍ଲୀ, ୦୧/୦୫ : ଦିଲ୍ଲୀ ଏବଂ ନୋଏଡାର ୫୦ରୁ ଉର୍ଦ୍ଧ୍ଵ ସ୍କୁଲକୁ ହଠାତ୍ ଆସିଲା ଧମକପୂର୍ଣ୍ଣ ଇମେଲ୍। ଏହି ସ୍କୁଲ ଗୁଡ଼ିକରେ ବମ୍ ଖଞ୍ଜା ଯାଇଥିବା ନେଇ ଆସିଛି ମେସେଜ୍। ଏହାପରେ ଚାରିଆଡ଼ ଚାଞ୍ଚଲ୍ୟ ଖେଳିଯାଇଛି। ତୁରନ୍ତ ସ୍କୁଲ ପରିସରରୁ ପିଲାମାନଙ୍କୁ ବାହାର କରାଯାଇଛି। ବମ୍ ସ୍କ୍ଵାର୍ଡ ପହଞ୍ଚି ସର୍ଚ୍ଚ ଅପରେସନ ଚଳାଇଛନ୍ତି। ତେବେ ଏଯାବତ୍ କୌଣସି ସନ୍ଦିଗ୍ଧ ବସ୍ତୁ ଚିହ୍ନଟ ହୋଇନାହିଁ। ଦିଲ୍ଲୀ ପୋଲିସର ସ୍ଵତନ୍ତ୍ର ସେଲ୍‌ ଏହି ଘଟଣାକୁ ନେଇ ତନାଘନା ଚଳାଇଛି।  

ସୂଚନାନୁଯାୟୀ, ଦ୍ଵାରକାର ଡିପିଏସ୍, ମୟୂର ବିହାରର ମଦର ମେରି, ଏବଂ ନୂଆଦିଲ୍ଲୀର ସଂସ୍କୃତ ସ୍କୁଲ ଏବଂ ନୋଏଡାର ଡିପିଏସ୍ ଭଳି ବହୁ ହାଇପ୍ରୋଫାଇଲ୍ ସ୍କୁଲ ଗୁଡ଼ିକୁ ଏଭଳି ଧମକପୂର୍ଣ୍ଣ ମେସେଜ୍ ଆସିଛି। ଏହାପରେ ଗୃହ ମନ୍ତ୍ରାଳୟ ପକ୍ଷରୁ କଡ଼ାକଡ଼ି ନଜର ରଖାଯାଇଛି। ଯେଉଁ ଆଇପି ଆଡ୍ରେସରୁ ଏହି ମେସେଜ୍ ଆସିଛି ତାହାକୁ ସାଇବର୍ ଟିମ୍ ଖୋଜୁଛନ୍ତି। ଦିଲ୍ଲୀ ପୋଲିସର ସ୍ଵତନ୍ତ୍ର ସେଲ୍‌ ଏହି ଘଟଣାକୁ ନେଇ ତନାଘନା ଚଳାଇଛି। ଦିଲ୍ଲୀର ଉପରାଜ୍ୟପାଳ ବିକେ ସକସେନା ଏନେଇ ପୋଲିସ କମିଶନରଙ୍କୁ ବିସ୍ତୃତ ରିପୋର୍ଟ ମାଗିଛନ୍ତି। ଏହା ସହ ସ୍କୁଲ ପରିସରରେ ସମ୍ପୂର୍ଣ୍ଣ ଯାଞ୍ଚ୍ କରିବା ସହ ଅପରାଧୀଙ୍କୁ ଚିହ୍ନଟ କରିବା ପାଇଁ ନିର୍ଦ୍ଦେଶ ଦିଆଯାଇଛି। 

ଦିଲ୍ଲୀ ଶିକ୍ଷା ମନ୍ତ୍ରୀ ଏନେଇ କହିଛନ୍ତି ଯେ, ପୋଲିସ ସ୍କୁଲ ଗୁଡ଼ିକ ସହ ଯୋଗାଯୋଗରେ ଅଛି। ତଦନ୍ତ ଚାଲିଛି। ଅଭିଭାବକମାନେ ଭୟଭୀତ ହୁଅନ୍ତୁ ନାହିଁ। ପୋଲିସକୁ ଏଯାବତ୍ କିଛି ମିଳିନାହିଁ।