ଭୁବନେଶ୍ୱର,୧୯/୦୯: ମିନିଟ୍କୁ ୬୦ ଶବ୍ଦ ଟାଇପ କରିବେ । ତାହା ପୁଣି ଶୁଦ୍ଧ ଓଡ଼ିଆରେ। ହାତ ଥରିଲେ, ଚାକିରିରେ ନାଲି ଗାର ବାଜିବ। ସାନିଟେସନ ମଲ୍ଟିଟ୍ୟାକ୍ସ ଆସିଷ୍ଟାଣ୍ଟ(ଏସ୍ଏମ୍ଟିଏ) ଓ ଡାଟା ଏଣ୍ଟ୍ରି ଅପରେଟର(ଡିଇଓ) ଙ୍କୁ ଏମିତି କଡ଼ା ନିର୍ଦ୍ଦେଶନାମା ଜାରି କରିଛନ୍ତି ଭୁବନେଶ୍ୱର ମହାନଗର ନିଗମ କର୍ତ୍ତୃପକ୍ଷ । ଖୁବ୍ଶୀଘ୍ର ଏନେଇ ପରୀକ୍ଷା ହେବାକୁ ଯାଉଛି । ନୂଆ ସରକାର ଆସିବା ପରେ ମୁଖ୍ୟମନ୍ତ୍ରୀ ଓଡ଼ିଆ ଭାଷାରେ ସମସ୍ତ ଅଫିସ କାର୍ଯ୍ୟକୁ ପରିଚାଳନା କରିବାକୁ ଘୋଷଣା କରିଥିଲେ । ଏନେଇ ଅର୍ଥ ବିଭାଗ ପକ୍ଷରୁ ମଧ୍ୟ ନିର୍ଦ୍ଦେଶନାମା ଜାରି କରାଯାଇଥିଲା । ପର୍ଯ୍ୟାୟ କ୍ରମେ ସବୁ ବିଭାଗ ଇଂରାଜୀ ପରିବର୍ତ୍ତେ ଓଡ଼ିଆରେ ଚିଠି ଲେଖା ଆରମ୍ଭ କରିଛନ୍ତି । ଏହି ଓଡ଼ିଆ ଅସ୍ମିତା ଏବେ ବିଏମ୍ସି ଦୁଆରରେ ପହଞ୍ଚିଛି ।
ବିଏମ୍ସିରେ ଆଗକୁ ସମସ୍ତ ଚିଠି ଓ ଫାଇଲ ଓଡ଼ିଆ ଭାଷାରେ ହେବ । ତେଣୁ ବିଏମ୍ସିରେ କାର୍ଯ୍ୟ କରୁଥିବା ସମସ୍ତ ଏସ୍ଏମ୍ଏଟି ଓ ଡିଇଓଙ୍କୁ ଓଡ଼ିଆ ଭାଷାରେ ହିଁ ଲେଖିବାକୁ ପଡିବ । ତେଣୁ ଏନେଇ ଏଜେନ୍ସିକୁ ଶୁଦ୍ଧ ଓଡ଼ିଆ ଜାଣିଥିବା କର୍ମଚାରୀଙ୍କୁ ନିୟୋଜିତ କରିବାକୁ ନିର୍ଦ୍ଦେଶ ଜାରି ହୋଇଛି । ତେଣୁ ଓଡ଼ିଆ ଭାଷାରେ ପରୀକ୍ଷା କରିବା ପାଇଁ ସବୁ ଡିଇଓଙ୍କୁ ନିର୍ଦ୍ଦେଶ ଦିଆଯାଇଛି । ନଭେମ୍ବର ମାସ ସୁଦ୍ଧା ପରୀକ୍ଷା କରାଯିବ । ଡିଇଓ ଓଡ଼ିଆ ଆକୃତିରେ ଟାଇପ୍, ଫାଇଲ୍ କାମ ଜାଣିବା ବାଧ୍ୟତାମୂଳକ । ବିଭିନ୍ନ ସରକାରୀ ସଂସ୍ଥାରେ ଠିକାରେ କାମ କରୁଥିବା ଡିଇଓଙ୍କ କ୍ଷେତ୍ରରେ ଏହା ଖୁବ୍ଶୀଘ୍ର ଲାଗୁ ହେବାକୁ ଯାଉଛି ।
ସେପଟେ ଆସନ୍ତା ୨୨ ତାରିଖରେ ବିଏମ୍ସି ପକ୍ଷରୁ ଏକ ଓଡ଼ିଆ କ୍ଲାସ୍ର ବ୍ୟବସ୍ଥା କରାଯାଇଛି । ଏଥିରେ ସମସ୍ତ ଏସ୍ଏମ୍ଟିଏ ଯୋଗଦେବେ । ଓଡିଆ ବର୍ଣ୍ଣମାଳା ଶିଖିବେ । ସେହିପରି ପର୍ଯ୍ୟାୟ କ୍ରମେ ବିଏମ୍ସି ଅଫିସର ମାନଙ୍କ ପାଇଁ ମଧ୍ୟ ଏପରି ବ୍ୟବସ୍ଥା ହେବ । ପୂର୍ବରୁ ମଧ୍ୟ ସରକାରୀ କର୍ମଚାରୀଙ୍କ ପାଇଁ ଓଡ଼ିଆ ପାଠାଶାଳା ଖୋଲିଥିଲା । ଏଥିରେ ବରିଷ୍ଠ ସାହିତ୍ୟିକ ମାନେ ଯୋଗ ଦେଇ ଶୁଦ୍ଧ ଓଡ଼ିଆ ବର୍ଣ୍ଣମାଳାରୁ ପାଠ ପଢ଼ାଇଥିଲେ । ଏହି ନିର୍ଦ୍ଦେଶନାମାଙ୍କୁ ବିରୋଧ କରିଛନ୍ତି କିଛି ଡିଇଓ । ସେମାନେ ଅଭିଯୋଗ କରିଛନ୍ତି, ମାସିକ ମାତ୍ର ୧୫ ହଜାର ଟଙ୍କା ଦେଇ ସନ୍ଧ୍ୟା ପର୍ଯ୍ୟନ୍ତ ଖଟାଉଛନ୍ତି । ଏଥର ଓଡ଼ିଆ ନ ଜାଣିଲେ ବାହାର କରିଦେବାକୁ ଧମକ ମିଳୁଛି ।
