ମସ୍କୋ: ୟୁକ୍ରେନ ସହ ଯୁଦ୍ଧ ମଧ୍ୟରେ ଋଷୀୟ ସେନାରେ ସୈନିକଙ୍କ ସଂଖ୍ୟା ହଠାତ ବୃଦ୍ଧି ପାଇଛି । ବହୁ ସଂଖ୍ୟକ ନାଗରିକ ଏବେ ସେନାରେ ସାମିଲ ହେବାକୁ ଚୁକ୍ତି ସ୍ବାକ୍ଷର କରୁଥିବା ନେଇ ରୟଟର୍ସର ଏକ ରିପୋର୍ଟରୁ ଜଣାପଡ଼ିଛି । ଗତ ମାସରେ ମସ୍କୋ କନସର୍ଟ ହଲ ଆକ୍ରମଣ ପରେ ଋଷୀୟ ସୈନିକଙ୍କ ସଂଖ୍ୟା ବଢ଼ୁଛି । ଏହି ଆକ୍ରମଣେ ୧୪୪ ଲୋକଙ୍କ ମୃତ୍ୟୁ ହୋଇଥିଲା । ଋଷିଆ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ମିଳିଥିବା ତଥ୍ୟ ଅନୁସାରେ, ୨୦୨୪ ଆରମ୍ଭରୁ ଏକ ଲକ୍ଷ ଲୋକ ସେନାରେ ସାମିଲ ହେବାକୁ ଚୁକ୍ତି କରିଛନ୍ତି । ହେଲେ ଗତ ୧୦ ଦିନ ଭିତରେ ୧୬୦୦୦ ନାଗରିକ ସେନାରେ ସାମିଲ ହେବାକୁ କଣ୍ଟ୍ରାକ୍ଟରେ ସାଇନ୍ କରିସାରିଛନ୍ତି ।
ସେମାନଙ୍କ ମଧ୍ୟରୁ ଅଧିକାଂଶ ଆଶାୟୀ କ୍ରୋକସ୍ ସିଟି ହଲ୍ ଆକ୍ରମଣର ପ୍ରତିଶୋଧ ନେବାକୁ ସେନାରେ ସାମିଲ ହେବାକୁ ଆଗ୍ରହ ପ୍ରକାଶ କରିଥିବା ନେଇ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି । ୨୨ ମାର୍ଚ୍ଚ ୨୦୨୪ରେ କନସର୍ଟ ହଲରେ ଆକ୍ରମଣ କରିଥିବା ତତ୍ତ୍ବଙ୍କୁ ଜବାବ ଦେବାକୁ ଋଷୀୟ ନାଗରିକ ଚାହୁଁଥିବା ନେଇ ଋଷର ବିଭିନ୍ନ ସହରରେ ଆୟୋଜିତ ସେନା ନିଯୁକ୍ତି କାର୍ଯ୍ୟକ୍ରମରେ କହିଛନ୍ତି ଆଶାୟୀ ପ୍ରାର୍ଥୀ । ତେବେ ୨୦୦୪ ପରେ ମସ୍କୋରେ ହୋଇଥିବା ସବୁଠୁ ବଡ଼ ଆକ୍ରମଣରେ ୧୪୪ ଜଣ ପ୍ରାଣ ହରାଇଥିଲେ । କନସର୍ଟ ହଲ ଆକ୍ରମଣ ପାଇଁ ନିଜକୁ ଦାୟୀ କରିଥିଲା ଆତଙ୍କବାଦୀ ସଂଗଠନ ଆଇଏସଆଇଏସ୍ । ସେପଟେ ଏଭଳି ଆତଙ୍କବାଦୀ କାର୍ଯ୍ୟକଳାପ ଲାଗି ୟୁକ୍ରେନ୍କୁ ଦାୟୀ କରିଆସିଛି ଋଷିଆ ।
ଅନ୍ୟପଟେ ଏଫଏସବିର ନିର୍ଦ୍ଦେଶକ ଆଲେକଜାଣ୍ଡର ବୋର୍ତ୍ତନିକୋଭ ଏବଂ ଋଷିଆର ସୁରକ୍ଷା ପରିଷଦ ସଚିବ ନିକୋଲାଇ ପାତ୍ରୁସେଭ ମସ୍କୋ କନସର୍ଟ ହଲ ଆକ୍ରମଣ ପାଇଁ ୟୁକ୍ରେନ୍ ଏବଂ ଏହାର ସହଯୋଗୀ ଦେଶ ବ୍ରିଟେନ ଓ ଆମେରିକାକୁ ଦାୟୀ କରିଥିଲେ । ଆଇଏସ ଆତଙ୍କୀ ସଂଗଠନ ଆକ୍ରମଣ କରିଥିବା ବେଳେ ସେମାନଙ୍କୁ ଓ୍ବେଷ୍ଟର୍ଣ୍ଣ ସ୍ପେଶାଲ ସର୍ଭିସର ସମର୍ଥନ ମିଳିଥିଲା ବୋଲି ଦାବି କରିଥିଲେ ବୋର୍ତ୍ତନିକୋଭ ।
