ରାଉରକେଲା, ୧୦/୦୬ : ରାଉରକେଲା ସୀମାନ୍ତ ଝାଡ଼ଖଣ୍ଡ ଗୋଏଲ କେରା ଥାନା ତେଣ୍ଟୋ ଜଙ୍ଗଲରେ ଏନକାଉଣ୍ଟର। ମାଓବାଦୀ ଓ ସୁରକ୍ଷାବାହିନୀ ମଧ୍ୟରେ ଗୁଳିବିନିମୟ। ସୁରକ୍ଷାବାହିନୀର ଆଖିବୁଜା ଗୁଳିମାଡ଼ରେ ଛତ୍ରଭଙ୍ଗ ଦେଲେ ମାଓବାଦୀ। ସ୍ଥାନୀୟ ଅଞ୍ଚଳରେ କମ୍ଵିଂ ଅପରେସନ ଜାରି।

ସୂଚନାନୁଯାୟୀ, ଝାଡ଼ଖଣ୍ଡ ଗୋଏଲ କେରା ଥାନା ତେଣ୍ଟୋ ଜଙ୍ଗଲରେ CRPF, ଝାଡ଼ଖଣ୍ଡ ଜାଗୁଆର ସହ ସ୍ଥାନୀୟ ପୋଲିସ ମିଳିତ ଭାବରେ କମ୍ଵିଂ ଅପରେସନ ଚଳାଇଥିଲେ। ଏହି ସମୟରେ ମାଓବାଦୀମାନେ ଗୁଳି ଚଳାଇଥିଲେ। ଫଳରେ ସୁରକ୍ଷାବାହିନୀ ଏହାର ପ୍ରତିଜବାବ ଦେଇଥିଲା। ସୁରକ୍ଷାବାହିନୀର ଆଖିବୁଜା ଗୁଳିମାଡ଼ରେ ମାଓବାଦୀମାନେ ଛତ୍ରଭଙ୍ଗ ଦେଇଥିଲେ। ଘଟଣାସ୍ଥଳରେ ବିପୁଳ ପରିମାଣର ମାଓ ସାମଗ୍ରୀ ଜବତ ହୋଇଛି। ୧୨ଟି ବନ୍ଧୁକ, ୪୩୫ ରାଉଣ୍ଡ ଜୀବନ୍ତ ଗୁଳି, ମାଗାଜିନ୍, ୯ଟି ମୋବାଇଲ୍ ଓ ଅନ୍ୟାନ୍ୟ ଜିନିଷ ଜବତ ହୋଇଛି। ସମସ୍ତ ସାମଗ୍ରୀ ମାଟି ତଳେ ପୋତା ଯାଇଥିବା ଅବସ୍ଥାରେ ଠାବ ହୋଇଛି। ଜଙ୍ଗଲରେ ଏବେବି ସର୍ଚ୍ଚ ଅପରେସନ ଜାରି ରହିଛି।