ନୂଆଦିଲ୍ଲୀ ୨୯/୦୯: ମୃତ୍ୟୁ ଦଣ୍ଡରେ ଦଣ୍ଡିତ ଜାପାନର ଜଣେ ପୂର୍ବତନ ବକ୍ସର ଦୀର୍ଘ ୪୬ ବର୍ଷ ଜେଲଦଣ୍ଡ କାଟିବା ପରେ ନିର୍ଦ୍ଦୋଷରେ ମୁକ୍ତ ହୋଇଛନ୍ତି । ୮୮ ବର୍ଷୀୟ ଇୱାଓ ହାକାମାଡା ନିଜର ବସ୍, ବସ୍ଙ୍କ ପତ୍ନୀ ଓ ସେମାନଙ୍କ ପିଲାଙ୍କ ହତ୍ୟା ଅପରାଧରେ ୧୯୬୮ ମସିହାରେ ଦୋଷୀ ସାବ୍ୟସ୍ତ ହୋଇଥିଲେ । ଏହି ଅପରାଧ ସାରା ଦେଶକୁ ଦୋହଲାଇ ଦେଇଥିଲା । ଏହି ଲୋମଟାଙ୍କୁରା ଘଟଣା ସେଣ୍ଟ୍ରାଲ ଜାପାନର ଶିଜୁକାଠାରେ ଘଟିଥିଲା । ହତ୍ୟା ପରେ ପୀଡ଼ିତଙ୍କ ଘରେ ନିଆଁ ଲଗାଇ ଦିଆଯାଇଥିଲା । ଆଇନଗତ ପ୍ରତିନିଧିତ୍ୱ ବିନା ମାରାଥନ୍ ଜେରା କରି ଦୋଷ ମାନିବାକୁ ହାକାମାଡାଙ୍କୁ ବାଧ୍ୟ କରାଯାଇଥିଲା । ଏହି ଆଧାରରେ ସେ ଦୋଷୀ ପ୍ରମାଣିତ ହୋଇଥିଲେ ।
ହାକାମାଡାଙ୍କ ମାମଲା ଆଜି ବି ଜାପାନର ସବୁଠୁ ବିବାଦୀୟ ନ୍ୟାୟିକ ଲଢ଼େଇ ହୋଇଛି । ଦୋଷ ସ୍ୱୀକାର ପ୍ରତ୍ୟାହାର ସହିତ ନିଜକୁ ନିର୍ଦ୍ଦୋଷ ବୋଲି ସେ ବାରମ୍ବାର ଦାବି କରୁଥିଲେ ମଧ୍ୟ ୧୯୮୦ ମସିହାରେ ଜାପାନର ସୁପ୍ରିମ୍କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିଥିଲେ । ଏ ମାମଲାରେ ତାଙ୍କୁ ନିର୍ଦ୍ଦୋଷ ପ୍ରମାଣିତ କରିବାର ଗୁରୁତ୍ୱପୂର୍ଣ୍ଣ ସୁରାକ ଅନେକ ବର୍ଷ ଧରି ସାମ୍ନାକୁ ଆସିଥିଲା । ୨୦୦୮ ମସିହାରେ, ହାକାମାଡାଙ୍କୁ ମୃତ୍ୟୁ ଦଣ୍ଡରେ ଦଣ୍ଡିତ କରିଥିବା ଅନ୍ୟତମ ବିଚାରକ ମୋରିମିଚି କୁମାମୋଟୋ ସର୍ବସମ୍ମୁଖରେ ପ୍ରକାଶ କରିଥିଲେ, ତାଙ୍କର ବିଶ୍ୱାସ ଯେ ହାକାମାଡା ନିର୍ଦ୍ଦୋଷ । ମାମଲାର ପୁନଃ ବିଚାର ଦାବି ମଧ୍ୟ ସେ କରିଥିଲେ ।
୨୦୧୪ ମସିହାରେ ଏକ କୋର୍ଟ ହାକାମାଡାଙ୍କୁ ମୁକ୍ତ କରିବାକୁ ନିର୍ଦ୍ଦେଶ ଦେଲେ ଏବଂ ମାମଲାର ପୁନଃ ବିଚାର ଅନୁମତି ମଧ୍ୟ ପ୍ରଦାନ କଲେ । ହାକାମାଡାଙ୍କ ବିରୋଧରେ ଦିଆଯାଇଥିବା ପ୍ରମାଣ ମନଗଢ଼ା ବୋଲି କୋର୍ଟ ଦର୍ଶାଇଲେ । ଡିଏନ୍ଏ ଟେଷ୍ଟ୍ ଆଧାରରେ କୋର୍ଟ ଏହି ନିଷ୍ପତ୍ତି ନେଇଥିଲେ । ପ୍ରମାଣ ସ୍ୱରୂପ ପ୍ରଦାନ କରାଯାଇଥିବା ରକ୍ତ ଦାଗ ହାକାମାଡାଙ୍କ ରକ୍ତ ସହ ମ୍ୟାଚ୍ କରିନଥିଲା । ହାକାମାଡା ଜେଲରୁ ମୁକ୍ତ ହେବା ପରେ ମଧ୍ୟ ପୁନଃ ବିଚାରରେ ପୁର୍ଣ୍ଣଚ୍ଛେଦ ପଡ଼ିବା ପାଇଁ ଆହୁରି ୧୦ ବର୍ଷ ଚାଲିଗଲା । ଏହି ଅବଧିରେ ହାକାମାଡା ନିଜର ଭଉଣୀ ହିଡେକୋଙ୍କ ପାଖରେ ଥିଲେ । ତାଙ୍କୁ ନିର୍ଦ୍ଦୋଷ ପ୍ରମାଣିତ କରିବାକୁ ହିଡେକୋ ଅବିଶ୍ରାନ୍ତ ଅଭିଯାନ ଚଳାଇଥିଲେ ।
ଗତ ୨୬ ତାରିଖରେ ଶିଜୁକା ଜିଲ୍ଲା କୋର୍ଟ ଶେଷରେ ହାକାମାଡାଙ୍କୁ ନିର୍ଦ୍ଦୋଷ ଘୋଷଣା କଲେ । ମୂଳ ଶୁଣାଣି ସମୟରେ ତାଙ୍କ ବିରୋଧରେ ଏକାଧିକ ସଂଖ୍ୟକ ମନଗଢ଼ା ପ୍ରମାଣ ଉପସ୍ଥାପନ କରାଯାଇଥିଲା ବୋଲି କୋର୍ଟ ସ୍ପଷ୍ଟ କଲେ । ଚୂଡ଼ାନ୍ତ ଶୁଣାଣି ସମୟରେ କୋର୍ଟରୁମ୍ରେ ୫୦୦ରୁ ଅଧିକ ଲୋକ ଉପସ୍ଥିତ ଥିଲେ । ତନ୍ମଧ୍ୟରୁ ଅନେକ ଦେଖଣାହାରୀଙ୍କ ନଜର ଦୀର୍ଘ ବର୍ଷ ଧରି ହାକାମାଡାଙ୍କ ମାମଲା ଉପରେ ଥିଲା । ବିଚାରପତି ମାମଲାର ଚୂଡ଼ାନ୍ତ ରାୟ ପଢ଼ିବା ସମୟରେ ମାହୋଲଟି ବେଶ ଭାବପୂର୍ଣ୍ଣ ହୋଇପଡ଼ିଥିଲା ।
