ଭୁବନେଶ୍ୱର,୨୬/୦୯ (ମନୋରଞ୍ଜନ ମହାନ୍ତି): ଆସୁଛି ଦଶହରା । ଏହାକୁ ନଜରରେ ରଖି ଏକାବେଳେ ପ୍ରେକ୍ଷାଳୟକୁ ଆସୁଛି ୫ଟି ନୂଆ ଓଡ଼ିଆ ସିନେମା । କିନ୍ତୁ ଏହାର ମୁକ୍ତିଲାଭକୁ ନେଇ ଦ୍ୱନ୍ଦ୍ୱ ଦେଖାଦେଇଛି । କାରଣ ଭାଗ ଛିଣ୍ଡୁନି । ମୁକ୍ତିଲାଭ ତାରିଖ ଓ ହଲ୍ ସଂଖ୍ୟାକୁ ନେଇ ପରସ୍ପର ଭିତରେ ଶୀତଳ ଯୁଦ୍ଧ ଚାଲିଛି । ବଲିଉଡ୍, ଟଲିଉଡ୍ରେ ଜଣେ ଷ୍ଟାର୍ଙ୍କ ସିନେମା ଆସିଲେ ଅନ୍ୟ ଷ୍ଟାର୍ମାନେ ସମ୍ମାନ ଦୃଷ୍ଟିରୁ ନିଜ ସିନେମାକୁ ଘୁଞ୍ଚାଇ ବଡ଼ପଣ ଦେଖାନ୍ତି । ଏଠି କିନ୍ତୁ ଓଲଟା । ସେଥିପାଇଁ ପୂଜାରେ ଫିଲ୍ମ ରିଲିଜ୍କୁ ଅପେକ୍ଷା କରିଥିବା ପ୍ରଯୋଜକଙ୍କ ମୁଣ୍ଡ ବିନ୍ଧା ହେଲାଣି ।
ଏଥିରେ ଧନ୍ଦି ହୋଇ ଜଣେ ଦି’ ଜଣ କହିଲେଣି, ଯଦି ଏମିତି ଚାଲେ ତେବେ ସିନେମା, ସିନେମା ଘରକୁ ଆସିବା ପୂର୍ବରୁ ଆମେ ଡିପ୍ରେସନ୍କୁ ଚାଲି ଯାଇଥିବୁ । ଏଠି ସିନେମା ନିର୍ମାଣ ଲାଗି ଯେତିକି ଟେନ୍ସନ୍ ନାହିଁ, ରିଲିଜ୍ ତା’ଠୁ ବଳି ଯାଉଛି । ବାପରେ...ବାପ...ଏତେ ସମସ୍ୟା, ଏତେ ଅଳିଆ । ସତର୍କ ନ ରହିଲେ ଅଣନିଃଶ୍ୱାସୀ କରି ମାରିଦେବେ । ଦୂର ପାହାଡ଼ ସୁନ୍ଦର ପରି ବାହାରକୁ ଚିକିମିକି ଦିଶୁଥିବା ରଙ୍ଗିନ ଦୁନିଆର ୟେ ହେଉଛି ଭିତିରି କଥା ଯାହାକୁ କେହି ବାହାରେ କହିବାକୁ ଚାହୁଁନାହାନ୍ତି, କାରଣ ଆଗକୁ ଫିଲ୍ମ ଆସୁଛି... । ପାର୍ବଣ ଋତୁର ସବୁଠୁ ବଡ଼ ପର୍ବ ଦଶହରା ।
ପର୍ବକୁ ଟିକେ ରଙ୍ଗିନ ଏବଂ ଅଧିକ ମନୋରଞ୍ଜନଧର୍ମୀ କରିବାକୁ ପୂରା ଓଲିଉଡ୍ ପ୍ରସ୍ତୁତ ଥାଏ । ଏହି ଖୁସିରେ ସାମିଲ ହେବାକୁ ପୂରା ଓଡ଼ିଶା ବି ଚାହିଁ ବସିଥାଏ । ସେଥିଲାଗି ସବୁ ବର୍ଷ କିଛି ନା’ କିଛି ସିନେମା ମୁକ୍ତିଲାଭ କରେ । ଚଳିତ ବର୍ଷ ବି ସବୁ ପ୍ରସ୍ତୁତି ପର୍ବ ଅନ୍ତିମ ପର୍ଯ୍ୟାୟରେ। ଏ ବର୍ଷ ଦଶହରା ବଜାରରେ ୫ଟି ସିନେମା ମୁକ୍ତିଲାଭ କରୁଛି । ଲୋକପ୍ରିୟ ଷ୍ଟାର୍ ଅନୁଭବଙ୍କ ଅଭିନୀତ ଓ ଜାତୀୟ ପୁରସ୍କାରପ୍ରାପ୍ତ ପ୍ରଯୋଜକ ଅନୁପମ ପଟ୍ଟନାୟକଙ୍କ ପ୍ରଯୋଜିତ ଓ ନିର୍ଦ୍ଦେଶିତ ‘କର୍ମ’, ଅର୍ଦ୍ଧେନ୍ଦୁଙ୍କ ଅଭିନୀତ ବଡ଼ ବଜେଟ୍ର ସିନେମା ‘ଭିଲେନ୍’ । ଏହା ସହ କିମ୍ବଦନ୍ତୀ ଅକ୍ଷୟ ମହାନ୍ତିଙ୍କ ସଙ୍ଗୀତକୁ ନେଇ ସ୍ୱରାଜଙ୍କ ଅଭିନୀତ ‘ଖୋକା ଭାଇ ତମ ପାଇଁ’ । ଏହି ୩ଟି ସିନେମା ରିଲିଜ୍ ପ୍ରାୟତଃ ନିଶ୍ଚିତ ଥିବାବେଳେ ବାକି ପ୍ରଯୋଜକ ପ୍ରତୀମ୍ଙ୍କ ‘ଦୁର୍ଗା’ ଏବଂ ବିନି ପଟ୍ଟନାୟକଙ୍କ ପ୍ରଯୋଜିତ "ସନମ୍ ତୁ ସୁହାନା’ ପାଇପ୍ ଲାଇନ୍ରେ ରହିଛି ।
ବଡ଼ କଥା ହେଲା³ ସମସ୍ତେ ଅକ୍ଟୋବର ୯ ତାରିଖକୁ ରିଲିଜ୍ ପାଇଁ ସ୍ଥିର କରିଛନ୍ତି । ସେଥିପାଇଁ ପ୍ରଚାର, ପ୍ରସାର ଜୋର୍ସୋର୍ରେ କରୁଥିଲା ବେଳେ କିଏ କେତେ ହଲ୍ ପାଇବେ ତାକୁ ନେଇ ଅଙ୍କକଷା ଚାଲିଛି । କାରଣ ରାଜ୍ୟରେ ୫୦/୬୦ ହଲ୍ରୁ ଜଣକା ଭାଗରେ ୧୦ ଲେଖାଏଁ ପଡ଼ିବ କି ନାହିଁ ସନ୍ଦେହ । ପୁଣି ସେହି ସମୟରେ ଯଦି ଅନ୍ୟ ଭାଷାଭାଷୀ ବା ସୁପର୍ଷ୍ଟାର୍ମାନଙ୍କ ବଡ଼ ବଜେଟ୍ର ସିନେମା ଆସେ ତେବେ ଓଡ଼ିଆ ଉଠିଲା । ଏଥର ଆସିବାର ବି ଅଛି ସୁପର୍ଷ୍ଟାର୍ ରଜନୀକାନ୍ତଙ୍କ ‘ଭେଟ୍ଟାୟାନ୍’ । ତେଣୁ କିଏ ରହିବ, କିଏ ଉଠିବ ଏବେଠୁ ଗୁଳା ପକାଇ ସମସ୍ତେ ନିଜ ଭାଗ୍ୟ ସ୍ଥିର କରିବାରେ ଲାଗିପଡ଼ିଛନ୍ତି ।
ରାଜ୍ୟର ୪୦ ସହରରେ ୩୯ଟି ସିଙ୍ଗଲ୍ ସ୍କ୍ରିନ୍ ଓ ୨୯ଟି ମଲ୍ଟିପ୍ଲେକ୍ସକୁ ମିଶାଇ ୬୮ଟି ପ୍ରେକ୍ଷାଳୟରେ ୧୩୦ଟି ସ୍କ୍ରିନ୍ ରହିଛି । ହେଲେ ସବୁ ସମୟରେ ସବୁଠି ଓଡ଼ିଆ ସିନେମାକୁ ହଲ୍ ମିଳୁନି । ଖାସ୍ କରି ରଜ, ଦଶହରା ପର୍ବ ଆସିଲେ ଭାରି ସମସ୍ୟା । ଜଣେ ଖ୍ୟାତନାମା ତଥା ବର୍ତ୍ତମାନର ଚର୍ଚ୍ଚିତ ପ୍ରଯୋଜକ ଓଲିଉଡ୍ର ସବୁଠୁ ବଡ଼ ହିରୋଙ୍କୁ ନେଇ ସିନେମା କରିଛନ୍ତି । ହଲ୍ରେ ହୋର୍ଡିଂ, କଟ୍ଆଉଟ୍ ଲଗାଇ ପୂରା ମାତିଛନ୍ତି । ହଲ୍, ମଲ୍, କଲେଜ୍ ବୁଲୁଛନ୍ତି । ବଡ଼ ବିତରକ ସଂସ୍ଥାକୁ ବି ଧରିଛନ୍ତି, କିନ୍ତୁ ରିଲିଜ୍ ଲାଗି ହଲ୍ ମିଳୁନି । ନିକଟରେ ଉତ୍ତର ଓଡ଼ିଶା ଯାଇ ବିଭିନ୍ନ ହଲ୍ ମାଲିକଙ୍କ ସହ ଯୋଗାଯୋଗ କରି ସାନ୍ତ୍ୱନା ପାଇ ଆସିଛନ୍ତି । ଆଶା, କିଛି ହଲ୍ରେ ସୋ’ ପାଇବେ । ସେ କହିଛନ୍ତି, ପ୍ରଥମେ ୧୦/୧୫ ହଲ୍ରେ ରିଲିଜ୍ କରିବୁ । ତା’ ପରେ ଯେତେବେଳେ ସିନେମା ଆଗେଇବ କିଏ ରୋକିବ? କିନ୍ତୁ ତା’ ପୂର୍ବରୁ ଯେତିକି କସରତ କଲୁଣି ପରସ୍ତେ ଚୋପା ଉଠିଗଲାଣି ।
ଅନ୍ୟ ଜଣେ ପ୍ରଯୋଜକ କହିଛନ୍ତି, ଆମକୁ ଯିଏ ବାହାରୁ ଦେଖୁଛି, ସେଲ୍ଫି ନେଉଛି । କିନ୍ତୁ ଭିତରେ ଦୁଃଖରେ ଜଳିଗଲୁଣି । ସକାଳ ହେଲେ ହଲ୍ ବୁଲା ଆରମ୍ଭ ହୋଇଯାଉଛି । ଦୌଡ଼ି ଦୌଡ଼ି ନାକେଦମ୍ । ଏଇ ୧୫ ଦିନ ଭିତରେ ମାଲକାନଗିରିରୁ ମୟୂରଭଞ୍ଜ ସବୁଆଡ଼ୁ ଘେରାଏ ବୁଲି ଆସିଲୁଣି । ପ୍ରମୋସନ୍ ନାଁରେ ଯାଉଛୁ, କିନ୍ତୁ ଅସଲ ବେପାର କେମିତି ହଲ୍ରେ ସିନେମା ରିଲିଜ୍ ହେବ । ଏଠି ତ ଜାତୀୟ ପୁରସ୍କାର ପାଇଥିବା ନିର୍ମାତା, ପ୍ରଯୋଜକ ତଥା ମେଗାଷ୍ଟାର୍ଙ୍କୁ ହଲ୍ଗୁଡିକ ଭରସାକୁ ନେଉନାହାନ୍ତି । ଆମେ ତ ମାତ୍ର ୨/୩ଟା ସିନେମା କରିଛୁ । ଆମକୁ କିଏ ପଚାରେ?
ଜଣେ ସହ ପ୍ରଯୋଜକ କହିଛନ୍ତି, ଏକାବେଳେ ରିଲିଜ୍ ଦ୍ୱାରା ଲାଭ ବଦଳରେ କ୍ଷତି ବେଶି । ପୂଜାରୁ ନିଶ୍ଚିତ ଥିବା ୩ଟି ସିନେମାରୁ ୨ଟି ଦେଢ଼ କୋଟିରୁ ଊଦ୍ଧ୍ୱର୍ ଖର୍ଚ୍ଚରେ ନିର୍ମାଣ ହୋଇଥିବା ବେଳେ ଗୋଟିଏରେ ୮୦ ଲକ୍ଷ ଖର୍ଚ୍ଚ ହୋଇଛି । କିନ୍ତୁ କେତେ ବେପାର କରିବେ ଠିକଣା ନାହିଁ । ପ୍ରିମିୟର ଖର୍ଚ୍ଚ ଉଠିବ କି ନାହିଁ ସନ୍ଦେହ । ତେଣେ ଦର୍ଶକ ବି ସବୁ ସିନେମା ଦେଖିବାରୁ ବଞ୍ଚିତ ହେବେ । ଟିକଟ୍ ଦର ଯାହା, ଗୋଟିଏ ପରିବାର ଗୋଟିଏ ସିନେମା ଦେଖିଲେ ଉଭୟ ଟିକଟ୍ ଦର ଓ ସମୟ ଦୃଷ୍ଟିରୁ ଦ୍ୱିତୀୟ ସିନେମାଟି ଯାଇପାରିବନି । ବାକି କିଛି ପ୍ରିମିୟର ସୋ’ରେ ମାଗଣା ଦେଖିବାକୁ ଅନାଇ ବସିବେ । ତେଣୁ ପୂଜାରେ ରିଲିଜ୍ କରିବା ବୁଡ଼ିବା ସହ ସମାନ ।
ଆଉ ଜଣେ ପ୍ରଯୋଜକ କହିଛନ୍ତି, ଚଳିତ ମାସ ଶେଷ ଆଡ଼କୁ ଗୋଟିଏ ସିନେମା ମୁକ୍ତିଲାଭ ପାଇଁ ଚିନ୍ତା କରୁଛି ଯେ, ମୋର ମୁଣ୍ଡବୁଲା ରୋଗ ବାହାରିଗଲାଣି । ଓଡ଼ିଶାରେ ଯେତେ ମଲ୍ଟିପ୍ଲେକ୍ସ ଅଛି, ତା’ ଉପରେ କାହାରି ଲଗାମ ନାହିଁ । ନା ସରକାର, ନା ପ୍ରଯୋଜକ କିମ୍ବା ବିତରକ । ବାକି ସିଙ୍ଗଲ୍ ସ୍କ୍ରିନ୍ କୋଟେରୀ ଗ୍ରୁପ୍ (କିଛି ନିର୍ଦ୍ଦିଷ୍ଟ ଗୋଷ୍ଠୀ) ଙ୍କ ହାତରେ । ସେସବୁ କଟକରୁ ପରିଚାଳନା ହୁଏ । ଦଶହରା, ରଜ ଆସିଲେ ସେମାନଙ୍କ ରାଜ୍ ଚାଲେ । ସେମାନଙ୍କ ନିଷ୍ପତ୍ତିରେ ନ ଗଲେ ତୁମ ସିନେମା ଖତ ହେବା ଥୟ ।
କେବଳ ସେତିକି ନୁହେଁ, ସେମାନଙ୍କଠୁ ଅନୁମତି ନେଇ ଚୁକ୍ତି କରି ସେମାନଙ୍କ ମାଧ୍ୟମରେ ସିନେମା ଚଲେଇବେ । ଏପରିକି ହଲ୍ରେ ହୋର୍ଡିଂ, ଫ୍ଲେକ୍ସ, କଟ୍ଆଉଟ୍ ପାଇଁ ବି ସେମାନଙ୍କ ମଞ୍ଜୁରି ଦରକାର । ଆପଣ ଯାହା କରନ୍ତୁ, ସିନେମା ରିଲିଜ୍ ପୂର୍ବରୁ ଯେମିତି ହେଲେ ସେମାନଙ୍କ ଶରଣ ପଶିବାକୁ ପଡ଼ିବ । ସେମାନେ ସମ୍ପୂର୍ଣ୍ଣ ବିତରଣ ବ୍ୟବସ୍ଥାକୁ ବିଗାଡ଼ି ରଖିଛନ୍ତି । ଯଦିଓ ଅନେକ ସିଙ୍ଗଲ୍ ସ୍କ୍ରିନ୍ ବିଭିନ୍ନ ମଲ୍ଟି ନାସ୍ନାଲ୍ କମ୍ପାନି ସହ ଯୋଡ଼ି ହୋଇ ରହିଛନ୍ତି, କୋଟେରୀ ଗ୍ରୁପ୍ ଫାଶରୁ ମୁକୁଳି ପାରିନାହାନ୍ତି । କୋଟେରୀ ଗ୍ରୁପ୍ କହିଲେ କମ୍ପାନି ବିତରଣ କଥା ବୁଝିବେ ଏବଂ ଫିଲ୍ମ ନେବେ ନହେଲେ ନାହିଁ । ହଲ୍ ସବୁ ବି ସେଇଆ ।
ଜଣେ ଚର୍ଚ୍ଚିତ କଳାକାର କହିଛନ୍ତି, ବାରମ୍ବାର କହି ଏବେ ନିରବ ରହିଛି । କିନ୍ତୁ କେହି ବୁଝିବାକୁ ନାରାଜ । ପ୍ରଥମେ ଓଡ଼ିଶା ସିନେମା ବିତରଣ ବ୍ୟବସ୍ଥାକୁ ସଜାଡ଼, ହଲ୍ ସଂଖ୍ୟା ବଢ଼ାଅ । ବିତରଣ, ପ୍ରଦର୍ଶନଠୁ ନେଇ ସବୁ କଥା ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ (ଓଏଫ୍ଡିସି) ବୁଝୁ । କାରଣ ଏଠି ଟଙ୍କା ଦେଇ ବି ପ୍ରଯୋଜକ ପ୍ରାଇମ୍ ଟାଇମ୍ ପାଉନି । ଓଡ଼ିଆ ବଦଳରେ ଅନ୍ୟ ଭାଷାକୁ ଗୁରୁତ୍ୱ ମିଳୁଥିବା ବେଳେ ବିତରକ ଏବଂ ବ୍ରୋକର୍ଙ୍କ ମନମାନି ବଢ଼ି ଚାଲିଛି । ବାକି ହଲ୍ଗୁଡିକ କଥା ନ କହିବା ଭଲ । ଏମିତିରେ କ’ଣ ଇଣ୍ଡଷ୍ଟ୍ରି ଆଗେଇବ ବୋଲି ସେ ପ୍ରଶ୍ନ କରିଛନ୍ତି।
