ନୂଆଦିଲ୍ଲୀ,୧୬।୪: ଅଷ୍ଟେ୍ରଲିଆର ପୂର୍ବତନ କ୍ରିକେଟର ଓ କମେଣ୍ଟେଟର ମାଇକେଲ୍ ସ୍ଲେଟରଙ୍କ ଅଡୁଆ କମ୍ ହେବାର ନାଁ ଧରୁନି। ତାଙ୍କୁ ମଙ୍ଗଳବାର କୋର୍ଟରୁ ମିଳିଲାନି ଆଶ୍ବସ୍ତି। ଘରୋଇ ହିଂସା ସହିତ ୧୯ ଅଭିଯୋଗ ଥିବା ସ୍ଲେଟରଙ୍କୁ କ୍ବିନ୍ସଲାଣ୍ଡର ଏକ କୋର୍ଟ ବେଲ୍ ଦେବାକୁ ମନା କରିଦେଇଥିଲେ। ୫୪ ବର୍ଷୀୟ ସ୍ଲେଟରଙ୍କ ଯେତେବେଳେ ଜାମିନ୍ ଆବେଦନ ଖାରଜ ହୋଇଥିଲା ସେ କୋର୍ଟ ରୁମ୍ ଭିତରେ ବେହୋସ୍ ହୋଇଯାଇଥିଲେ। ତାଙ୍କର ବେଲ୍ ରଦ୍ଦ ହେବାପରେ ନିଜର ମୁଣ୍ଡ ତଳକୁ କରିଥିଲେ ଓ ଜେଲ୍କୁ ନେଇଯିବା ସମୟରେ ପଡିଯାଇଥିଲେ। ତାଙ୍କୁ ନିଜ ଗୋଡରେ ଠିଆ ହେବାକୁ ମଧ୍ୟ ସାହାଯ୍ୟ ଦରକାର ପଡିଥିଲା।
ଅଷ୍ଟେ୍ରଲିଆର ପୂର୍ବତନ ଡାହାଣହାତୀ ଓପନର ବ୍ୟାଟର ସ୍ଲେଟରଙ୍କ ନାଁରେ ରହିଛି ଏକାଧିକ ଅପରାଧି ଅଭିଯୋଗ। ଯାହା ଭିତରେ ବେଆଇନ ଭାବରେ ପିଛା କରିବା, ଡରାଇବା, ମାରପିଟ୍, ରାତିରେ କୌଣସି ଉଦେଶ୍ୟରେ କାହା ଘରେ ପଶିବା, ଶାରିରୀକ କ୍ଷତି ପହଁଞ୍ଚାଇବା ଓ ଆକ୍ରମଣ ଭଳି ସଙ୍ଗୀନ ଅଭିଯୋଗ ରହିଛି। ଗତ ବର୍ଷ ୫ ଡିସେମ୍ବରରୁ ୧୨ ଏପ୍ରିଲ ଭିତରେ ବିଭିନ୍ନ ତାରିଖରେ ସନସାଇନ୍ ତଟରେ କଥିତ ଅପରାଧର ମୋଟ ୧୯ଟି ମାମଲାର ସାମନା କରୁଛନ୍ତି।
