କୋଲକାତା,୪।୯: କୋଲକାତାରେ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲାରେ ପ୍ରତିଦିନ ନୂଆ ନୂଆ କଥା ଉପରକୁ ଉଠୁଛି ପରଦା। ଆରଜି କର ମେଡିକାଲ କଲେଜରେ ହୋଇଥିବା ଦୁର୍ନୀତି ମାମଲାରେ ଆଠ ଦିନ ପାଇଁ ସିବିଆଇ କଷ୍ଟଡିକୁ ଯାଇଛନ୍ତି ପୂର୍ବତନ ପ୍ରିନ୍ସିପାଲ ସନ୍ଦୀପ ଘୋଷ। ତେବେ ଜେଲ୍ରେ ପ୍ରଥମ ରାତିରେ ସନ୍ଦୀପ ଖୁବ୍ କଷ୍ଟରେ ସମୟ ବିତାଇଥିଲେ। ମଙ୍ଗଳବାର ରାତିରେ ତାଙ୍କୁ ସମ୍ପୂର୍ଣ୍ଣ ଶାକାହାରୀ ଖାଦ୍ୟ ଦିଆଯାଇଥିଲା, ଯାହାକି ସେ କୌଣସି ପ୍ରକାରେ ବିନା ଇଚ୍ଛାରେ ଖାଇ ଶୋଇବାକୁ ଯାଇଥିଲେ। କିନ୍ତ ରାତିସାରା ଠିକ୍ ଶୋଇ ପାରିନଥିଲେ, ସାରା ରାତି କେବଳ ବିଚଳିତ ରହିଥିଲେ। ଅତ୍ୟଧିକ କ୍ଲାନ୍ତ ଏବଂ ହତାଶ ମଧ୍ୟ ହୋଇ ପଡିଥିବାର କୁହାଯାଉଛି।
ମିଳିଥିବା ସୂଚନା ଅନୁସାରେ, ସନ୍ଦୀପ ଘୋଷ ସିବିଆଇର ଭ୍ରଷ୍ଟାଚାର ନିରୋଧି ଶାଖା କାର୍ଯ୍ୟାଳୟ ନିଜାମ ପ୍ୟାଲେସର ଦ୍ବିତୀୟ ଏମ୍ଏସ୍ଓ ବିଲ୍ଡିଂର ୧୪ ତମ ମହଲାର ଲକଅପ୍ରେ ଅଛନ୍ତି। ଭିତରେ ଓ ବାହାରେ ୪ ଜଣ ସଶସ୍ତ୍ର ସିଆରପିଏଫ୍ କର୍ମୀ ମୁତୟନ ଅଛନ୍ତି। ଡକ୍ଟର ଘୋଷଙ୍କୁ ଅତି କମ୍ରେ ୭ ଦିନ ଏହି ଲକଅପ୍ରେ ବିତାଇବାକୁ ହେବ। ଏହାପରେ ୧୦ ସେପ୍ଟେମ୍ବରରେ ପୁଣିଥରେ ଆଲିପୁର କୋର୍ଟରେ ହାଜର କରାଯିବ। ଏହାପରେ କୋର୍ଟ ତାଙ୍କ କଷ୍ଟଡି ନେଇ ବିଚାର କରିବେ।
ସୋମବାର ରାତିରେ ତାଙ୍କୁ ଯେତେବେଳେ ଗିରଫ କରାଯାଇଥିଲା ସନ୍ଦୀପଙ୍କୁ ରାତିରେ ଶୁଦ୍ଧ ଶାକାହାରୀ ଖାଦ୍ୟ ଦିଆଯାଇଥିଲା। କାରଣ ସେ ଦିନ ତାଙ୍କର କୌଣସି ପୂଜା ଥିଲା। ତେଣୁ ତାଙ୍କର ଅନୁରୋଧରେ ରାତିର ଖାଦ୍ୟ ଶୁଦ୍ଧ ଶାକାହାରୀ ଦିଆଯାଇଥିଲା। ମଙ୍ଗଳବାର କୋର୍ଟରୁ ଫେରିବା ପରେ ଡାକ୍ତର ଘୋଷ ପୁରା ଚୁପ୍ ଥିଲେ। ତଦନ୍ତକାରୀ ଏଜେନ୍ସି ତାଙ୍କୁ ସନ୍ଧ୍ୟାରେ ଆରାମ କରିବାକୁ କିଛି ସମୟ ଦେଇଥିଲେ। ବୁଧବାର ସକାଳେ ତାଙ୍କୁ ଚା, ବିସ୍କୁଟ ଓ ଜଳଖିଆ ଦିଆଯାଇଥିଲା, ଯାହାକୁ ସେ ଠିକ୍ ଭାବରେ ଖାଇଥିଲେ। ତା ପରେ ତାଙ୍କୁ ଆରମ୍ଭ ହୋଇଥିଲା ପଚରା ଉଚରା।
