ନୂଆଦିଲ୍ଲୀ: ଏପ୍ରିଲ ୧ ତାରିଖଠୁ ନୂଆ ଆର୍ଥିକ ବର୍ଷ ଆରମ୍ଭ ହୋଇଛି । ଏହା ସହ ଆଜିଠାରୁ ଦେଶରେ ଅନେକ ପରିବର୍ତ୍ତନ ହୋଇଛି । ଏଲପିଜି ସିଲିଣ୍ଡର ଦାମ ପାଖରୁ କ୍ରେଡିଟ କାର୍ଡ ଏବଂ ଏନପିଏସ୍ ନିୟମରେ ପରିବର୍ତ୍ତନ ହୋଇଛି । ତେବେ ପ୍ରତି ମାସ ପ୍ରଥମ ତାରିଖରେ ଅଏଲ ମାର୍କେଟିଂ କମ୍ପାନି ଏଲପିଜି ଦାମରେ ପରିବର୍ତ୍ତନ କରିଥାନ୍ତି । ଏଥିର ମଧ୍ୟ ଏଲପିଜି ଦାମ କମିଛି । କିନ୍ତୁ ଘରୋଇ ଏଲପିଜି ସିଲିଣ୍ଡର ନୁହେଁ ବରଂ ୧୯ କିଲୋଗ୍ରାମର ବାଣିଜ୍ୟିକ ଗ୍ୟାସ ସିଲିଣ୍ଡର ଦାମ କମିଛି । ୧ ଏପ୍ରିଲ ୨୦୨୪ରେ ଦିଲ୍ଲୀରେ କମର୍ସିଆଲ ସିଲିଣ୍ଡର ମୂଲ୍ୟ ୩୦.୫୦ ଟଙ୍କା ଶସ୍ତା ହୋଇ ୧୭୬୪.୫୦ ଟଙ୍କା ହୋଇଛି ।
ଇପିଏଫଓ ନିୟମରେ ପରିବର୍ତ୍ତନ
ଏପ୍ରିଲ ମାସର ପ୍ରଥମ ଦିନରୁ ଇପିଏଫଓକୁ ନେଇ ଏକ ନୂଆ ନିୟମ ଲାଗୁ ହେବ ବୋଲି ଘୋଷଣା ହୋଇଥିଲା । ଏହି ନୂଆ ନିୟମ ଆଜିଠୁ ଲାଗୁ ହୋଇଛି । ଏଣିକି ଜଣେ ଇପିଏଫ ଆକାଉଣ୍ଟ ହୋଲ୍ଡର ଚାକିରି ପରିବର୍ତ୍ତନ କଲେ ତାଙ୍କର ପୁରୁଣା ପିଏଫ ବାଲାନ୍ସ ନୂଆ ଖାତାକୁ ଟ୍ରାନ୍ସଫର ହୋଇଯିବ । ଏଥିପାଇଁ ଆକାଉଣ୍ଟ ହୋଲ୍ଡରଙ୍କୁ କିଛି କରିବାକୁ ପଡ଼ିବ ନାହିଁ ।
ଏନପିଏସ୍ ନିୟମ
ନ୍ୟାସନାଲ ପେନ୍ସନ ସ୍କିମ୍ (ଏନପିଏସ୍)କୁ ଆହୁରି ସୁରକ୍ଷିତ କରିବା ଲାଗି ପେନ୍ସନ ଫଣ୍ଡ ନିୟାମକ ଓ ବିକାଶ ପ୍ରାଧିକରଣ (ପିଏଫଆରଡିଏ) ଆଧାର ବେସ୍ଡ ଟୁ ଷ୍ଟେପ୍ ଅଥେଣ୍ଟିକେସନ୍ ସିଷ୍ଟମ ଲାଗୁ କରିଛି । ଆଉ ଏହାକୁ ଏପ୍ରିଲ ୧ (ସୋମବାର) ପାଖରୁ ଲାଗୁ କରାଯାଇଛି । ଗତ ମାର୍ଚ୍ଚ ୧୫ରେ ଏନେଇ ବିଜ୍ଞପ୍ତି ଜାରି କରିଥିଲା ପିଏଫଆରଡିଏ ।
ଫାସଟ୍ୟାଗ୍ କେଓ୍ବାଇସି
୩୧ ମାର୍ଚ୍ଚ ୨୦୨୪ ସୁଦ୍ଧା ଫାସଟ୍ୟାଗ୍ କେଓ୍ବାଇସି ଅପଡେଟ୍ କରିନଥିଲେ ଏପ୍ରିଲ ୧ ଅର୍ଥାତ ଆଜିଠୁ ଆପଣଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ିପାରେ । ଏନଏଚଏଆଇ ପକ୍ଷରୁ ଫାସଟ୍ୟାଗ କେଓ୍ବାଇସିକୁ ବାଧ୍ୟତାମୂଳକ କରାଯାଇଛି ।
ଏସବିଆଇ କ୍ରେଡିଟ କାର୍ଡରେ ପରିବର୍ତ୍ତନ
ଏସବିଆଇ କାର୍ଡ ପକ୍ଷରୁ ପୂର୍ବରୁ ଘୋଷଣା କରାଯାଇଥିଲା ଯେ, ୧ ଏପ୍ରିଲ ୨୦୨୪ ପାଖରୁ କେତେକ କ୍ରେଡିଟ କାର୍ଡରେ ରିଓ୍ବାର୍ଡ ପଏଣ୍ଟ କଲେକ୍ସନ ବନ୍ଦ ହେବ । ଏହି ସବୁ କାର୍ଡ ମଧ୍ୟରେ ଏସବିଆଇ କାର୍ଡ ଏଲିଟ୍, ଏସବିଆଇ କାର୍ଡ ଏଲିଟ୍ ଆଡଭାଣ୍ଟେଜ୍, ଏସବିଆଇ କାର୍ଡ ପ୍ଲସ୍ ଏବଂ ସିମ୍ପଲି କ୍ଲିକ୍ ଏସବିଆଇ କାର୍ଡ ସାମିଲ ।
