ଭୁବନେଶ୍ୱର,୧୬/୦୯(ସସ୍ମିତା ମଲ୍ଲ): ଚୀନ୍ କି ଜାପାନ କିମ୍ବା କୋରିଆ ନୁହେଁ ବର୍ତ୍ତମାନ ଓଡ଼ିଶାରେ ମଧ୍ୟ ଚାଷ କରାଯିବ ‘ଗାନୋଡର୍ମା’ ଛତୁ । ଏଥିପାଇଁ ଓୟୁଏଟି ପକ୍ଷରୁ କରାଯାଉଛି ଗବେଷଣା । ଖୁବ୍ ଶୀଘ୍ର ଓଡ଼ିଶାରେ ଛତୁ ଚାଷୀ ‘ଗାନୋଡର୍ମା’ ଛତୁ ଚାଷ କରି ଲାଭବାନ ହେବେ । ଭାରତରେ ଏହି ଛତୁର ବିକ୍ରି ଲବ୍ଧ ଅର୍ଥ ୧୦୦ କୋଟି ଛୁଇଁଲାଣି । ତଟକା ଥିଲେ କିଲୋ ପ୍ରତି ୪ ହଜାର ଟଙ୍କା ରହିଛି । ଶୁଖିଯିବା ପରେ ୨୪ହଜାର । ପାଳ ଛତୁ ତୁଳନାରେ ଏହି ଛତୁର ବଜାର ମୂଲ୍ୟ ପ୍ରାୟ ୧୦ ଗୁଣରୁ ଅଧିକ ।
ଉପଲବ୍ଧ ହେଉଥିବା ଅନେକ ଗୁଡ଼ିଏ ଔଷଧୀୟ ଛତୁ ମଧ୍ୟରେ ‘ଗାନୋଡର୍ମା’ ଛତୁ ସର୍ବାଧିକ ଲୋକପ୍ରିୟ । ଚୀନ, ଜାପାନ ଓ କୋରିଆରେ ପ୍ରାଚୀନ କାଳରୁ ଏହାକୁ ବିଭିନ୍ନ ରୋଗର ଉପଚାର ପାଇଁ ବ୍ୟବହାର ହେଇଆସୁଛି । ଚୀନ୍ ଓ ଜାପାନରେ ଏହାର ଆଞ୍ଚଳିକ ନାମ ଯଥାକ୍ରମେ ‘ଲିଙ୍ଗ୍ଝି' ଓ 'ଋଷି' । ଚମତ୍କାର ଔଷଧୀୟ ଗୁଣ ପାଇଁ ଜାପାନରେ ଏହାକୁ ଅମରତ୍ୱ ପ୍ରଦାନକାରୀ ଛତୁ ଓ କୋରିଆରେ ଏହି ଛତୁକୁ ଶରୀରର ରକ୍ଷା କବଚ ପ୍ରଭୃତି ନାମରେ ଅଭିହିତ କରାଯାଏ । ଦେଶରେ ହାତ ଗଣତି କେତୋଟି ସ୍ଥାନରେ ଏହି ଛତୁ ପରୀକ୍ଷାମୂଳକ ଭାବରେ ଚାଷ କରାଯାଇଛି ।
ଓଡ଼ିଶାରେ ପ୍ରଥମ କରି ଓୟୁଏଟି ପକ୍ଷରୁ ଏହି ଛତୁର ଉତ୍ପାଦନ ଆରମ୍ଭ କରାଯାଇଛି । ଏହି ଛତୁ ଚାଷର ଅନ୍ୟାନ୍ୟ ଦିଗ ଉପରେ ଉଚ୍ଚତର ଗବେଷଣା ଚାଲିଛି । ଆଗାମୀ ଦିନରେ ଏହି ଛତୁ ବ୍ୟାପକ ଭାବରେ ଚାଷ ହେବ । ରାଜ୍ୟ ସରକାର, ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ(ଓୟୁଏଟି)ରେ ଅଗଣିତ ଛତୁଚାଷୀ ତଥା ଛତୁଚାଷ ସହ ସଂପୃକ୍ତ ସଂସ୍ଥାମାନଙ୍କ ମିଳିତ ସହଯୋଗ ଓ ଉଦ୍ୟମରେ ଓଡ଼ିଶାରୁ ପ୍ରଚୁର ପରିମାଣରେ ‘ଗାନୋଡାର୍ମା’ ଛତୁ ବିଦେଶକୁ ରପ୍ତାନୀ କରାଯାଇପାରିବ ।
‘ଗାନୋଡାର୍ମା’ ଛତୁର ଉପଯୋଗୀତା, ଅଧିକ ଆୟ ଓ ଦୃତ ବ୍ୟବସାୟକାରଣକୁ ଦୃଷ୍ଟିରେ ରଖି ତଥା ଓଡ଼ିଶା ଛତୁ ଚାଷୀଙ୍କ ଲାଭ ବହୁଗୁଣିତ କରିବା ପାଇଁ ‘ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ’ର କୁଳପତି ପ୍ରଫେସର ପ୍ରଭାତ କୁମାର ରାଉଳଙ୍କ ନିର୍ଦ୍ଦେଶନାରେ ବିଶ୍ୱବିଦ୍ୟାଳୟ ଅଧିନସ୍ଥ ସର୍ବ ଭାରତୀୟ ସମନ୍ୱିତ ଛତୁ ଗବେଷଣା ପ୍ରକଳ୍ପରେ ଚାଲିଛି ଗବେଷଣା । ଏଥିରୁ ଆଶାନୁରୂପ ସଫଳତା ମଧ୍ୟ ମିଳିଛି ।
‘ଗାନୋଡର୍ମା’ ଛତୁରେ ୨୦୦ରୁ ଅଧିକ ଔଷଧୀୟ ଗୁଣ ରହିଛି ବୋଲି ଜଣାଯାଏ । ଏହାର ସେବନ ଦ୍ୱାରା ଶରୀରର ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇଥାଏ । ସାଂପ୍ରତିକ ଜୀବନ ଶୈଳୀ ହେତୁ ଆମ ଦେହରେ ଜମି ରହୁଥିବା ବିଷାକ୍ତ ପଦାର୍ଥର ନିଷ୍କାସନ ପ୍ରକ୍ରିୟାକୁ ଏହା ତ୍ୱରାନ୍ୱିତ କରିଥାଏ । ମାନସିକ ଚାପରୁ ରକ୍ଷା ପାଇବା, କାର୍ଯ୍ୟ ଦକ୍ଷତା ବୃଦ୍ଧି ପାଇଁ ଏହାକୁ ମହାକାଶଚାରୀଙ୍କ ଲାଗି ଉଦ୍ଦିଷ୍ଟ ତାଲିମ କାର୍ଯ୍ୟକ୍ରମରେ ଉପଯୋଗ କରାଗଲାଣି ।
ରକ୍ତରେ କୋଲେଷ୍ଟରାଲ, ଶର୍କରା ଓ ଚର୍ବି ହ୍ରାସ କରିବାରେ ‘ଗାନୋଡର୍ମା’ ସାହାଯ୍ୟ କରେ । ହୃଦ୍ରୋଗ, ମଧୁମେହ, କାମଳ, ପାକସ୍ଥଳୀ ଓ ନପୁଂସକତା, ଶ୍ୱାସ ଓ କାଶ, ତରଳ ଝାଡ଼ା, କୋଷ୍ଠକାଠିନ୍ୟ, କାନ୍ଧ ଯନ୍ତ୍ରଣା, ଗଳଗଣ୍ଡ, ଅନିୟମିତ ଋତୁସ୍ରାବ, ରକ୍ତ ସଞ୍ଚାଳନରେ ଅସୁବିଧା, ମାନସିକ ବିଷାଦ ଓ ସ୍ନାୟୁଗତ ଦୁର୍ବଳତା, ମୋଟାପଣ ଭଳି ରୋଗ ସହ କେତେ ପ୍ରକାର ବଂଶଗତ ରୋଗ, ନିଦ୍ରାହୀନତା ଇତ୍ୟାଦିର ଉଭୟ ନିରାକରଣ ଓ ଚିକିତ୍ସାରେ ଏହି ଔଷଧୀୟ ଛତୁକୁ ବ୍ୟବହାର କରାଯାଇ ପାରିବ ।
ମୁଖ୍ୟ ବୈଜ୍ଞାନିକ ଡ.ବିକ୍ରମ କେଶରୀ ପାଣି କୁହନ୍ତି, ଏହି ଛତୁ ସାଧାରଣତଃ ୨୫ ରୁ ୩୨ ଡିଗ୍ରୀ ସେଲସିୟସ୍ ତାପମାତ୍ରାରେ ଚାଷ କରାଯାଏ । ଫିମ୍ପିର ବିସ୍ତାର ପାଇଁ ୨୮ ରୁ ୩୨ ଡିଗ୍ରୀ ଓ ଛତୁ ଫୁଟିବା ପାଇଁ ୨୫ ରୁ ୨୮ ଡିଗ୍ରୀ ସେଲସିୟସ ଉତ୍ତାପ ଆବଶ୍ୟକ । ସ୍ୱଳ୍ପ ବ୍ୟୟଯୁକ୍ତ ପଲିଥିନ ନିର୍ମିତ ଘରେ ଆଂଶିକ ନିୟନ୍ତ୍ରିତ ପାଣିପାଗରେ ଏହାକୁ ସହଜରେ ଚାଷ କରାଯାଇପାରିବ । ଚାଷ ପ୍ରଣାଳୀରେ ଆବଶ୍ୟକୀୟ ପରିବର୍ତ୍ତନ କରି ଓ ତାପମାତ୍ରାକୁ ନିୟନ୍ତ୍ରଣ କରି ‘ଗାନୋଡର୍ମା’ ଛତୁକୁ ବର୍ଷ ସାରା ଚାଷ କରାଯାଇପାରେ । ପ୍ରାୟ ୪୫ ରୁ ୫୦ ଦିନରେ ଛତୁ ଅମଳ ହୁଏ । ଦୁଇ ବା ତିନି ପର୍ଯ୍ୟାୟରେ ଏ ଛତୁ ଅମଳ କରାଯାଏ ।
ଓୟୁଏଟିରେ ଚାଷ କରାଯାଉଥିବା ‘ଗାନୋଡର୍ମା’ର ଜୈବିକ ଦକ୍ଷତା ପ୍ରାୟ ୨୫ ପ୍ରତିଶତ । ଅନ୍ୟାନ୍ୟ ସ୍ଥାନରେ କାଠ ଗଣ୍ଡି ବା କରତ ଗୁଣ୍ଡରେ ଏହି ଛତୁ ଉତ୍ପାଦନ କରାଯାଉଥିବା ବେଳେ ଧାନ ନଡ଼ା ବ୍ୟବହାର କରି ଉତ୍ପାଦନ କରିବା ଉପରେ ଗୁରୁତ୍ୱ ଦେଉଛନ୍ତି ଓୟୁଏଟି କର୍ତ୍ତୃପକ୍ଷ । ବିଶୋଧିତ ଧାନ ନଡ଼ା କିମ୍ବା ନଡ଼ା ସହିତ କରତ ଗୁଣ୍ଡକୁ ସମାନ ଅନୁପାତରେ ମିଶେଇ ତାକୁ ଛତୁ ଚାଷର ମାଧ୍ୟମ ଭାବରେ ବ୍ୟବହାର କରାଯାଉଛି । ଏହି ଛତୁ ଟାଣ ଏବଂ ତିକ୍ତ ହୋଇଥିବାରୁ ସିଧାସଳଖ ଖାଇବା ଅପେକ୍ଷା ସେଥିରୁ ଔଷଧ ପ୍ରସ୍ତୁତି ପାଇଁ ଗୁରୁତ୍ୱ ଦିଆଯାଉଛି ।
