ନୂଆଦିଲ୍ଲୀ,୨୬/୦୯:  ବେପରୁଆ ଗାଡି ଚଳାଉଥିଲେ ସାବଧାନ। ନଚେତ ଗଣିବାକୁ ପଡ଼ିବ ମୋଟା ଅଙ୍କର ବୀମା ପ୍ରିମିୟମ। ଭାରତ ସରକାର ଏପରି କିଛି ନିୟମ ଖୁବଶୀଘ୍ର ପ୍ରଣୟନ କରିପାରନ୍ତି। ଦୁର୍ଘଟଣାକୁ ରୋକିବା ପାଇଁ ଗାଡ଼ି ଚାଳକଙ୍କ ଉପରେ ଲଗାମ ଲଗାଇବା ଦିଗରେ କେନ୍ଦ୍ର ସରକାର ବିଚାର କରୁଛନ୍ତି। ବେପରୁଆ ଗାଡ଼ି ଚାଳକଙ୍କ ଠାରୁ ଅଧିକ ଟଙ୍କା ଆଦାୟ କରିବା ପାଇଁ ବ୍ୟବସ୍ଥା ପ୍ରଣୟନ କରିବାକୁ ଦିଲ୍ଲୀର ଉପ ରାଜ୍ୟପାଳ ଭିକେ ସକ୍ସେନା କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଚିଠି ଲେଖିଛନ୍ତି।

ତେବେ  ଟ୍ରାଫିକ ନିୟମ ଉଲ୍ଲଂଘନକୁ ରୋକିବା ଓ ସଡ଼କ ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା ପାଇଁ ଉଲ୍ଲଂଘନକାରୀଙ୍କ ଗାଡ଼ି ବୀମା ପ୍ରିମିୟମକୁ ଲିଙ୍କ କରି ଚାଲାଣ ପଠାଇବାକୁ ଅନୁରୋଧ କରିଛନ୍ତି। ଆମେରିକା ଓ ଅନେକ ୟୁରୋପୀୟ ଦେଶରେ ଏପରି ବ୍ୟବସ୍ଥାକୁ ଲାଗୁ କରାଯାଇଛି। ଏହା ଅନେକ ସକାରାତ୍ମକ ଫଳାଫଳ ଆଣିଥିବା ମଧ୍ୟ ସେ କହିଛନ୍ତି। ଏନେଇ ଉପରାଜ୍ୟପାଳ ଚିଠିରେ ଲେଖିଛନ୍ତି ଯେ "ନିର୍ମଳା ଜୀ, ମୁଁ ସଡ଼କ ସୁରକ୍ଷା ଓ ଗାଡ଼ି ବୀମା ସମ୍ବନ୍ଧୀୟ ଏକ ଗୁରୁତ୍ୱପୂର୍ଣ୍ଣ ବିଷୟ ଉପରେ ଆପଣଙ୍କ ଧ୍ୟାନ ଆକର୍ଷଣ କରିବାକୁ ଚାହଁଛି। ମୁଁ ଆପଣଙ୍କ ବିଚାର ପାଇଁ ଗୋଟିଏ ପ୍ରସ୍ତାବ ଦେଉଛି ଯେ ଗୋଟିଏ ଗାଡ଼ି ନାଁରେ କଟୁଥିବା ଟ୍ରାଫିକ ଉଲ୍ଲଂଘନ ଚାଲାଣ ସଂଖ୍ୟା ସହିତ ବୀମା ପ୍ରିମିୟମକୁ ଲିଙ୍କ କରାଯାଉ। ଯେତେ ଥର ଗୋଟିଏ ଗାଡ଼ି ଟ୍ରାଫିକ ନିୟମ ଉଲ୍ଲଙ୍ଘନ କରିବ, ସେହି ଅନୁସାରେ ଗାଡ଼ିର ବୀମା ପ୍ରିମିୟମ ମଧ୍ୟ ବଢ଼ି ଚାଲିବ। ଏହା ସଡ଼କ ସୁରକ୍ଷା ଓ ଟ୍ରାଫିକ୍ ଅନୁଶାସନ ଉପରେ ବେଶ ସକାରାତ୍ମକ ପ୍ରଭାବ ପକାଇବ।”

ସଡ଼କ ପରିବହନ ଓ ଜାତୀୟ ରାଜପଥ ମନ୍ତ୍ରଣାଳୟର ତଥ୍ୟ ଅନୁଯାୟୀ, ୨୦୨୨ରେ ଭାରତରେ ୪.୩୭ ଲକ୍ଷରୁ ଅଧିକ ସଡ଼କ ଦୁର୍ଘଟଣା ରେକର୍ଡ ହୋଇଛି। ଏଥିଯୋଗୁ ପ୍ରାୟ ୧.୫୫ ଲକ୍ଷ ଲୋକ ମୃତାହତର ସମ୍ମୁଖୀନ ହୋଇଛି। ଏହା ମଧ୍ୟରୁ ପ୍ରାୟ ୭୦% ଦୁର୍ଘଟଣା ଦ୍ରୁତ ଗାଡ଼ି ଚାଳନା ଯୋଗୁ ହୋଇଛି। ସେହିପରି ରେଡ୍ ଲାଇଟ ଅତିକ୍ରମ ଯୋଗୁ ମଧ୍ୟ ଅନେକ ଦୁର୍ଘଟଣା ଘଟିଛି।