କଟକ,୩୧/୦୮: ଓଏସଏପି ଷଷ୍ଠ ବାଟାଲିୟନ ପରିସରରୁ ଉଦ୍ଧାର ହେଲା ହାବିଲଦାରଙ୍କ ମୃତଦେହ । ଶୁକ୍ରବାର ବିଳମ୍ବିତ ରାତିରେ ସେ ଆତ୍ମହତ୍ୟା କରିଥିବା ଜଣାପଡିଛି । ଆତ୍ମହତ୍ୟାର କାରଣ ଅସ୍ପଷ୍ଟ ରହିଛି । ମୃତ ହାବିଲଦାର ଜଣକ ତ୍ରିଲୋଚନ ସେଠୀ ଏବଂ ସେ ଯାଜପୁର ଜିଲ୍ଲା ବରୀ ଅଞ୍ଚଳର ମୂଳ ବାସିନ୍ଦା ବୋଲି ଜଣାପଡ଼ିଛି । ଏଭଳି ଘଟଣା ଘଟିଛି କଟକ ଚାଉଳିଆଗଞ୍ଜ ଥାନା ଅନ୍ତର୍ଗତ ଓଏମପି ସ୍ଥିତ ଓଏସଏପି ଷଷ୍ଠ ବାଟାଲିୟନରେ ଏଭଳି ଘଟଣା ଘଟିଛି ।

ସୂଚନା ଅନୁଯାୟୀ, ତ୍ରିଲୋଚନ ସେଠୀ ୨୦୦୯ ମସିହାରେ ହାବିଲଦାର ପଦରେ ନିଯୁକ୍ତି ପାଇଥିଲେ । ଗତ କିଛି ବର୍ଷ ହେବ ତାଙ୍କର କଟକ ଓଏମପି ସ୍ଥିତ ଓଏସଏପି ଷଷ୍ଠ ବାଟାଲିଆନରେ ପୋଷ୍ଟିଙ୍ଗ ହୋଇଥିଲା । ତେବେ ଶୁକ୍ରବାର ବିଳମ୍ବିତ ରାତିରେ ସେ ବେକରେ ଏକ ଗାମୁଛା ଦେଇ ପଙ୍ଖାରେ ଝୁଲିପଡ଼ିଥିଲେ । ପରେ ତ୍ରିଲୋଚନଙ୍କ ମୃତଦେହ ପଙ୍ଖାରେ ଝୁଲି ରହିଥିବାର ଦେଖିବାକୁ ପାଇଥିଲେ ତାଙ୍କ ସହକର୍ମୀ । ଏହା ଦେଖି ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇବା ପରେ ଚାଉଳିଆଗଞ୍ଜ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଥିଲା । ତେବେ ପାରିବାରିକ କନ୍ଦଳରୁ ସେ ଆତ୍ମହତ୍ୟା କରିଥିାଇ ପାରନ୍ତି ବୋଲି ଅନୁମାନ କରାଯାଉଛି । ପୁଣି ପୋଲିସ ବିଭାଗର କାର୍ଯ୍ୟଭାର ଆତ୍ମହତ୍ୟାର କାରଣ ହୋଇଥାଇ ପାରେ ବୋଲି ଆଲୋଚନା ହେଉଛି । ମୃତ ତ୍ରିଲୋଚନଙ୍କ ପରିବାର ନୂଆ ବଜାର ଅଞ୍ଚଳରେ ରହୁଥିବା ବେଳେ, ସେ କିନ୍ତୁ ବାଟାଲିଆନ ପରିସରରେ ରହୁଥିଲେ । ଏଭଳି ସ୍ଥିତିରେ ତାଙ୍କର ଅସ୍ୱାଭାବିକ ମୃତ୍ୟୁ ପାଇଁ ଉଠୁଛି ଅନେକ ପ୍ରଶ୍ନ ।