ନୂଆଦିଲ୍ଲୀ,୨୯।୪: ଚଳିତ ବର୍ଷ ଅପ୍ରେଲ ମାସରେ ସବୁ ଗରମ ରେକର୍ଡ ଭାଙ୍ଗି ଦେଇଛି। ଦେଶର ବିଭିନ୍ନ ଭାଗରେ ରବିବାର ପ୍ରବଳ ଗରମ ଥିଲା। ୧୯୨୧ ପରେ ଅପ୍ରେଲ ମାସରେ ଏତେ ଗରମ ଅନୁଭୂତ ହୋଇଛି। ପ୍ରବଳ ଗରମ ଓ ଖରା ଯୋଗୁଁ ଲୁ’ ପ୍ରଭାବିତ କରିଛି। ଲାଗୁଛି ଏହା ଅପ୍ରେଲ ନୁହେଁ ଜୁନ୍ ମାସ ଚାଲିଛି। ଏତେ ଗରମ ଯେ, କେରଳ, ଉଟି, ମାଥେରାନ ଓ ବେଙ୍ଗାଲୁର ଭଳି ଅଧିକାଂଶ ସ୍ଥାନରେ ପାଣିର ଅଭାବ ଦେଖିବାକୁ ମିଳିଛି। ସାଧାରଣତଃ ଯେଉଁଠି ବର୍ଷସାରା ପାଗ ଖୁବ୍ ଭଲ ଥାଏ, ସେଠାରେ ପାଗ ମଧ୍ୟ ଭଲ ଥାଏ। ବହୁ ସ୍ଥାନରେ ପାରା ୪୩ ଡିଗ୍ରୀ ପର୍ଯ୍ୟନ୍ତ ବଢିଯାଇଛି। ପାଣିପାଗ ବିଭାଗ ଏବେ ମଇ ମାସକୁ ନେଇ ଭବିଷ୍ୟବାଣୀ କରିଛି।
ଅପ୍ରେଲ ମାସରେ ପଡିଥିବା ଗରମ ଦେଶର ବହୁ ସ୍ଥାନରେ ଐତିହାସିକ ରେକର୍ଡ ଭାଙ୍ଗିଛି। ଭାରତୀୟ ପାଣିପାଗ ବିଜ୍ଞାନ ବିଭାଗ ୧୯୨୧-୨୦୨୪ ଭିତରେ ଅପ୍ରେଲ ମାସରେ ପଡିଥିବା ଗରମକୁ ନେଇ ଡାଟା ଜାରି କରିଛି। ଯାହା ଅନୁସାରେ,ରବିବାର ସନ୍ଧ୍ୟାରେ ଅତ୍ୟାଧିକ ତାପମାତ୍ରା ରେକର୍ଡ କରାଯାଇଛି। ଆଇଏମ୍ଡିର କହିବା ଅନୁସାରେ, ଦେଶର ବହୁ ସ୍ଥାନ ପାଇଁ ଏହା ଏପର୍ଯ୍ୟନ୍ତ ସବୁଠାରୁ ଗରମ ମାସ ହୋଇପାରେ।
ବିଶେଷଜ୍ଞଙ୍କ ମତରେ ଭୀଷଣ ଗରମ ଲୋକସଭା ନିର୍ବାଚନ ଉପରେ ଖୁବ୍ ପ୍ରଭାବ ପକାଇପାରେ। ପୂର୍ବରୁ ଦୁଇଟି ପର୍ଯ୍ୟାୟରେ ୬୦ ରୁ ୬୨ ପ୍ରତିଶତ ମତଦାନ ହୋଇଛି। ଆଗାମୀ ପର୍ଯ୍ୟାୟ ମତଦାନ ପୂର୍ବରୁ ପାଣିପାଗ ବିଭାଗ ଭବିଷ୍ୟବାଣୀ କରିଛି, ଆଗାମୀ ୫ ଦିନ ଆହୁରି ଗରମ ପଡିବ। ସୋମବାର ଆଇଏମ୍ଡି ସୂଚନା ଦେଇଛି ଯେ, ପୂର୍ବ ଓ ଦକ୍ଷିଣ ପ୍ରାୟଦ୍ବୀପ ଭାରତରେ ଭୀଷଣ ଲୁ’ର ପ୍ରଭାବ ଦେଖିବାକୁ ମିଳୁଛି ଓ ଆଗାମୀ ୫ ଦିନ ଦିନ ଜାରି ରହିବ। ଚେତାବନୀ ଜାରି କରାଯାଇଛି ଯେ, ଭୀଷଣ ଗରମର ପ୍ରଭାବ ସେହ ସ୍ଥାନରେ ସର୍ବାଧିକ ରହିବ ଯେଉଁଠ ଆଗାମୀ ଦୁଇଟି ପର୍ଯ୍ୟାୟରେ ମତଦାନ ହେବ।ପଶ୍ଚିମବଙ୍ଗ, ଓଡିଶା, ବିହାର ଓ ଝାଡଖଣ୍ଡ ଭଳି କିଛି ଭାଗରେ ଆଗାମୀ ୫ ଦିନ ହିଟ୍ଓ୍ବେଭ୍ର ସମ୍ଭାବନା ରହିଛି।
