ସେଭିଲ୍(ସ୍ପେନ୍),୧୭/୦୯: ଭାରତୀୟ ବାୟୁସେନା ୧୦୦ ମେଡ୍-ଇନ୍-ଇଣ୍ଡିଆ ଏଲ୍ସିଏ ମାର୍କ-୧ଏ ଯୁଦ୍ଧ ବିମାନ କିଣିବ । ବର୍ତ୍ତମାନ ସ୍ପେନ୍ ଗସ୍ତରେ ଥିବା ବାୟୁସେନାର ପ୍ରମୁଖ ଏୟାର ଚିଫ୍ ମାର୍ଶଲ୍ ଭି ଆର ଚୌଧୁରୀ ଶନିବାର ଏହି ଘୋଷଣା କରିଛନ୍ତି । ଏଲ୍ସିଏ ମାର୍କ-୧ଏ ହେଉଛି ତେଜସ୍ ବିମାନର ବିକଶିତ ଭର୍ସନ । ଏଥିରେ ବିକଶିତ ଏଭିଓନିକ୍ସ ଏବଂ ରାଡାର ବ୍ୟବସ୍ଥା ରହିଛି । ବାୟୁସେନା ପୂର୍ବରୁ ମଧ୍ୟ ୮୩ଟି ଏଲ୍ସିଏ ମାର୍କ-୧ଏ ବିମାନ କିଣିବା ଲାଗି ଅର୍ଡର୍ ରଖିଥିଲା । ବାୟୁସେନା ପୁରୁଣା ମିଗ୍-୨୧ ବିମାନଗୁଡ଼ିକୁ ସେବାରୁ ନିବୃତ୍ତ କରିବାକୁ ଲକ୍ଷ୍ୟ ରଖିଛି । ତେଣୁ ମିଗ୍-୨୧ ସ୍ଥାନରେ ଏହିସବୁ ବିକଶିତ ବିମାନକୁ ନିଆଯିବ । ଚୁକ୍ତି ପାଇଁ ଉଦ୍ଦିଷ୍ଟ ସରକାରୀ ପ୍ରସ୍ତାବ ପ୍ରତିରକ୍ଷା ମନ୍ତ୍ରଣାଳୟ ଓ ଜାତୀୟ ସୁରକ୍ଷା ଅଂଶୀଦାରମାନଙ୍କ ନିକଟକୁ ପଠାଇ ଦିଆଯାଇଛି ।
ସୂଚନାଯୋଗ୍ୟ, ଆଉ ୧୦୦ ଏଲ୍ସିଏ ମାର୍କ-୧ଏ ଯୁଦ୍ଧ ବିମାନ କିଣିବା ନେଇ ବାୟୁସେନା ମୁଖ୍ୟଙ୍କ ଅଧ୍ୟକ୍ଷତାରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା । ବୈଠକରେ ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ (ହାଲ୍)ର ଅଧିକାରୀମାନେ ମଧ୍ୟ ଉପସ୍ଥିତ ଥିଲେ । ଏହି ଚୁକ୍ତି ସମ୍ପନ୍ନ ହେବା ପରେ ଭାରତ ନିକଟରେ ଆଗାମୀ ୧୫ ବର୍ଷ ମଧ୍ୟରେ ୪୦ ଏଲ୍ସିଏ ତେଜସ୍, ୧୮୦ରୁ ଅଧିକ ଏଲ୍ସିଏ ମାର୍କ-୧ଏ ଏବଂ ଅତିକମ୍ରେ ୧୨୦ ଏଲ୍ସିଏ ମାର୍କ-୨ ବିମାନ ହେବା ନେଇ ଆଶା କରାଯାଉଛି । ଏହା ପୂର୍ବରୁ ଭାରତ ୮୩ ଏଲ୍ସିଏ ମାର୍କ ୧ଏ ବିମାନ ଅର୍ଡର ଦେଇଥିଲା, ଯାହାର ଡେଲିଭରି ୨୦୨୪ ଫେବ୍ରୁଆରୀରେ ହୋଇପାରେ । ଏଲ୍ସିଏ ମାର୍କ-୧ଏର ୬୫% ଅଧିକ ଉପକରଣ ଭାରତରେ ନିର୍ମାଣ କରାଯାଇଛି।