କୋଲକାତା: ପଶ୍ଚିମବଙ୍ଗର ରାଜଧାନୀ କୋଲକାତାରେ ଥିବା ଏକ ଲୋକପ୍ରିୟ ପଞ୍ଚତାରକା ହୋଟେଲରେ ମହିଳାଙ୍କୁ ଦୁର୍ବ୍ୟବାହର ନେଇ ଅଭିଯୋଗ ହୋଇଛି । ଏହି ଘଟଣାରେ ପୋଲିସ ଦୁଇ ଜଣଙ୍କୁ ଗିରଫ କରିଛି । ମଙ୍ଗଳବାର ରାତି ୧୧.୫୦ ସମୟରେ ହୋଟେଲରେ ପାର୍ଟି ଚାଲିଥିବା ବେଳେ ଦୁଇ ଅଭିଯୁକ୍ତ ଦୁର୍ବ୍ୟବହାର କରିଥିବା ନେଇ ମହିଳାଜଣଙ୍କ ଥାନାରେ ଅଭିଯୋଗ କରିଥିଲେ । ଗିରଫ ଅଭିଯୁକ୍ତଙ୍କ ମଧ୍ୟରେ ଜଣେ ଦିଲ୍ଲୀ ବାସିନ୍ଦା ବୋଲି ଜଣାପଡ଼ିଛି ।
ମିଳିଥିବା ସୂଚନା ଅନୂସାରେ, ଅଭିଯୁକ୍ତ ଦ୍ବୟ ମହିଳା ଏବଂ ତାଙ୍କ ଭଉଣୀଙ୍କ ଶରୀରକୁ ଛୁଇଁବାକୁ ଚେଷ୍ଟା କରିବା ସହ ସେମାନଙ୍କୁ ଧମକ ଦେଇଥିଲେ । ଗିରଫ ଅଭିଯୁକ୍ତ ହେଉଛନ୍ତି ଦିଲ୍ଲୀର ୬୦ ବର୍ଷୀୟ ଅରୁଣ କୁମାର ଏବଂ ୪୩ ବର୍ଷୀୟ ରିଙ୍କୁ ଗୁପ୍ତା । ପୋଲିସ ପାଖରୁ ମିଳିଥିବା ସୂଚନା ଅନୁସାରେ, ଅରୁଣ କୁମାର ପଞ୍ଚତାରକା ହୋଟେଲରେ ରହିଥିଲେ । ସେ ରିଙ୍କୁ ଗୁପ୍ତାଙ୍କୁ ପାର୍ଟିରେ ସାମିଲ ହେବାକୁ ଡାକିଥିଲେ । ଏହି ପାର୍ଟିରେ ମହିଳାଙ୍କୁ ଦୁର୍ବ୍ୟବହାର କରାଯାଇଛି ।
ସୂଚନାଯୋଗ୍ୟ, ପଶ୍ଚିମବଙ୍ଗ ସରକାର ‘ଦୁଷ୍କର୍ମ ନିରୋଧୀ’ ବିଲ୍ ପାସ କରିବା ଦିନ ହିଁ କୋଲକାତାରେ ଏହି ଘଟଣା ଘଟିଛି । କୋଲକାତାର ଆରଜି କର ମେଡିକାଲ କଲେଜ ଏବଂ ହସ୍ପିଟାଲରେ ମହିଳା ଡାକ୍ତର ଦୁଷ୍କର୍ମ ଓ ହତ୍ୟା ମାମଲାକୁ ନେଇ ଦେଶରେ ଆକ୍ରୋଶ ବଢ଼ିବାରେ ଲାଗିଛି । ମମତା ବାନାର୍ଜୀଙ୍କ ସରକାର ଉପରେ ଦେଶବାସୀ ଅସନ୍ତୋଷ ଝାଡ଼ୁଥିବା ବେଳେ ବେଙ୍ଗଲ ସରକାର ବିଧାନସଭାରେ ‘ଆଣ୍ଟି ରେପ୍’ ବିଲ୍ ପାସ କରିଛନ୍ତି । ଅପରାଜିତା ମହିଳା ଓ ଶିଶୁ ବିଲ୍ ୨୦୨୪ ପାସ ହୋଇଥିବା ବେଳେ ଏଥିରେ ଦୁଷ୍କର୍ମ ଦୋଷୀଙ୍କୁ ଦଶ ଦିନରେ ଫାଶୀ ଦେବାକୁ ପ୍ରାବଧାନ ରହିଛି ।
