ନୂଆଦିଲ୍ଲୀ, ୨୯/୦୨: ଆଗକୁ ବଢ଼ୁଛି ଭାରତର ଅର୍ଥନୀତି । ଗୁରୁବାର ସରକାରଙ୍କ ପକ୍ଷରୁ ଚଳିତ ଆର୍ଥିକ ବର୍ଷର ଡିସେମ୍ବିର ତ୍ରୈମାସିକର ବିକାଶ ଅଭିବୃଦ୍ଧି ହାର ଜାରି କରାଯାଇଛି । ତୃତୀୟ ତ୍ରୈମାସିକରେ ଦେଶରେ ଜିଡିପି ଅଭିବୃଦ୍ଧି ୮.୪ ପ୍ରତିଶତ ରହିଛି । ଯାହାକି ପୂର୍ବରୁ କରା ଯାଇଥିବା ଅନୁମାନ ଠାରୁ ବେଶ୍ ଅଧିକ । ଦେଶରେ ଉତ୍ପାଦନ ଶିଳ୍ପ ଓ ସରକାରୀ ଖର୍ଚ୍ଚ ବଢ଼ିବା ଯୋଗୁଁ ଜିଡିପି ଅଭିବୃଦ୍ଧି ଆହୁରି ବଢ଼ିଛି । ଏହା ପୂର୍ବରୁ ଗତ ତ୍ରୈମାସିକରେ ଜିଡିପି ଅଭିବୃଦ୍ଧି ୭.୬ ପ୍ରତିଶତ ରହିଥିଲା ।
ଭାରତୀୟ ଅର୍ଥନୀତି ଦୌଡ଼ୁଥିବା ବେଳେ ବିଶ୍ୱ ବ୍ୟାଙ୍କ ଓ ଆଇଏମ୍ଏଫ୍ ପ୍ରଶଂସା କରିଛନ୍ତି । ୨୦୨୨ ଆର୍ଥିକ ବର୍ଷର ଦ୍ୱିତୀୟ ତ୍ରୈମାସିକ ପରେ ଜିଡିପିରେ ଏହା ସବୁଠୁ ଅଧିକ ବୃଦ୍ଧି । ଯେତେବେଳେ କି ବିକାଶ ଅଭିବୃଦ୍ଧି ହାର ୬.୬ ପ୍ରତିଶତ ରହିବା ନେଇ ପୂର୍ବରୁ ଆକଳନ କରା ଯାଇଥିଲା ।
୨୦୨୩-୨୪ ଆର୍ଥିକ ବର୍ଷରେ ଭାରତର ବିକାଶ ଅଭିବୃଦ୍ଧି ହାର ୭.୬ ପ୍ରତିଶତ ରହିବା ନେଇ ଏନ୍ଏସ୍ଓ ଆକଳନ କରିଛି । ଏହା ପୂର୍ବରୁ ୨୦୨୪ ଜାନୁଆରୀରେ ପ୍ରଥମ ପୂର୍ବାନୁମାନରେ ଜିଡିପି ୭.୩ ପ୍ରତିଶତ ରହିବା ନେଇ ଏନ୍ଏସଓ ପୂର୍ବାନୁମାନ କରିଥିଲା ।