ଅହମ୍ମଦାବାଦ,୦୪/୦୪: ଚଳିତ ଆଇପିଏଲ୍ର ୧୭ତମ ଲିଗ୍ ମ୍ୟାଚ୍ରେ ଗୁରୁବାର ଘରୋଇ ଗୁଜରାଟ ଟାଇଟନ୍ସ ଓ ପଞ୍ଜାବ କିଙ୍ଗ୍ସ ପରସ୍ପରକୁ ଭେଟିବେ। ଘରୋଇ ଗ୍ରାଉଣ୍ଡରେ ବିଜୟ ଜାରି ରଖିବାକୁ ଟାଇଟନ୍ସ ଦଳ ପ୍ରସ୍ତୁତ ରହିଛି । କ୍ରମାନ୍ୱୟରେ ୨ଟି ମ୍ୟାଚ୍ ହାରି ସାରିଥିବା ପଞ୍ଜାବ କିଙ୍ଗ୍ସ ସବୁ ଶକ୍ତି ଖଟାଇ ପୁଣି ଥରେ ବିଜୟ ଧାରାକୁ ଫେରିବାକୁ ଲକ୍ଷ୍ୟ ରଖିଛି ।
ଉଭୟ ଦଳ ପରସ୍ପରକୁ ୩ଥର ଭେଟିଛନ୍ତି । ଏଥିରୁ ଟାଇଟନ୍ସ ୨ଥର ବିଜୟୀ ହୋଇଛି । ଗତସିଜନରେ ଉଭୟ ମଧ୍ୟରେ ଥରେ ମାତ୍ର ସାମ୍ନା ସାମ୍ନି ହୋଇଥିଲା । ଟାଇଟନ୍ସ ୬ ୱିକେଟ୍ରେ ଉକ୍ତ ମ୍ୟାଚ୍ ଜିତିଥିଲା । ଏଥର ପଞ୍ଜାବ କିଙ୍ଗ୍ସ ପ୍ରତିଶୋଧ ନେବାକୁ ପ୍ରୟାସ କରିବ ।
ପଞ୍ଜାବ କିଙ୍ଗ୍ସ ସମ୍ପ୍ରତି ବୋଲିଂ ବିଭାଗର ପ୍ରଦର୍ଶନକୁ ନେଇ ଚିନ୍ତାରେ ରହିଛି । ଗତ ନିଲାମରେ୧୧.୭୫କୋଟି ଟଙ୍କା ମୂଲ୍ୟରେ ହର୍ଷଲ ପଟେଲଙ୍କୁ କିଣିଥିଲା ପଞ୍ଜାବ କିଙ୍ଗ୍ସ । ମାତ୍ର ସେ ଏପର୍ଯ୍ୟନ୍ତ ଦକ୍ଷତା ମୁତାବକ ପ୍ରଦର୍ଶନ କରିପାରି ନାହାନ୍ତି । ୧୧.୪୧ ହାରରେ ରନ୍ ପ୍ରଦାନ କରିଛନ୍ତି ହର୍ଷଲ । ସେହିପରି ଲେଗ ସ୍ପିନର ରାହୁଲ ଚହର ବ୍ୟୟ ବହୁଳ ସାବ୍ୟସ୍ତ ହୋଇଛନ୍ତି ।
ଟାଇଟନ୍ସର ବ୍ୟାଟିଂ ବିଭାଗ ସାମାନ୍ୟ ଦୁର୍ବଳ ମନେ ହେଉଛି । ଶୁଭମନ ଗିଲ୍ ଗତ ସିଜନର ପ୍ରଦର୍ଶନ ଦୋହରାଇବାରେ ବିଫଳ ହୋଇଛନ୍ତି। ମଧ୍ୟ କ୍ରମ ବ୍ୟାଟରମାନେ ମନ୍ଥର ହୋଇଯାଇଛନ୍ତି । ମହମ୍ମଦ ସାମିଙ୍କ ଅନୁପସ୍ଥିତିରେ ଦଳର ବୋଲିଂ ବିଭାଗ ଧିରେ ଧିରେ ସନ୍ତୁଳିତ ହେବାରେ ଲାଗିଛି । ଅଜମତୁଲ୍ଲା ଓମାରଜାଇ ନୂଆ ବଲ୍ରେ ଯଥେଷ୍ଟ ସୁଇଂ କରିବାରେ ସଫଳ ହୋଇଛନ୍ତି । ଇମ୍ପାକ୍ଟ ପ୍ଲେୟାର ଭାବେ ମୋହିତ ଶର୍ମାଙ୍କ ପ୍ରଦର୍ଶନ ସବୁଠୁ ଉନ୍ନତ ରହିଛି ।
ଗୁରୁବାର ଟାଇଟନ୍ସ ଏକାଦଶରେ ପରିବର୍ତ୍ତନ କରିପାରେ । ଫର୍ମ ହରାଇଥିବା ବିଜୟ ଶଙ୍କରଙ୍କ ସ୍ଥାନରେ ଶାହରୁଖ ଖାନଙ୍କୁ ଖେଳିବାକୁ ସୁଯୋଗ ମିଳିପାରେ । ଶାହରୁଖ ଗତ ସିଜନରେ ପଞ୍ଜାବ କିଙ୍ଗ୍ସ ପକ୍ଷରୁ ଖେଳିଥିଲେ । ପଞ୍ଜାବ କିଙ୍ଗ୍ସ ଦଳ ଅପରିବର୍ତ୍ତିତ ରଖିବ ।
ଗୁରୁବାର ଗିଲଙ୍କ ଉପରେ ନଜର ରହିବ । ପଞ୍ଜାବ କିଙ୍ଗ୍ସ ବିପକ୍ଷରେ ତାଙ୍କ ପ୍ରଦର୍ଶନ ବେଶ୍ ଆକର୍ଷଣୀୟ ରହିଛି । ସେ ୧୦ଟି ଇନିଂସରୁ ୫୭.୭୧ ହାରରେ ୩୯୭ ରନ୍ ସଂଗ୍ରହ କରିଛନ୍ତି । ସେହିପରି ଶିଖର ଧାୱନ ଅର୍ଦ୍ଧଶତକ ଅର୍ଜନ କଲେ ବିରାଟ କୋହଲିଙ୍କ ରେକର୍ଡ ସହ ସମକକ୍ଷ ହେବେ । କୋହଲି ଆଇପିଏଲ୍ରେ ୫୨ଟି ଓ ଧାୱନ ୫୧ଟି ଅର୍ଦ୍ଧଶତକ ଅର୍ଜନ କରିସାରିଛନ୍ତି । ଆଇପିଏଲରେ ସର୍ବାଧିକ ଅର୍ଦ୍ଧଶତକ ରେକର୍ଡ ଡେଭିଡ୍ ୱାର୍ଣ୍ଣରଙ୍କ ନାମରେ ରହିଛି । ସେ ୬୨ଟି ଅର୍ଦ୍ଧଶତକ ଅର୍ଜନ କରିଛନ୍ତି ।
ଅହମ୍ମଦାବାଦ ପିଚ୍ ବ୍ୟାଟିଂ ପାଇଁ ଅନୁକୂଳ ରହିବ । ଗୁରୁବାର ନାଲି ମାଟିରେ ପ୍ରସ୍ତୁତ ପିଚ୍ରେ ଖେଳ ଆୟୋଜନ କରାଯିବ । ଏହି ପିଚରେ ବିଶାଳ ସ୍କୋର ସଂଗୃହୀତ ହୋଇପାରିବ । ମାତ୍ର ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ଫଳରେ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଏକାଦଶ
ଗୁଜରାଟ ଟାଇଟନ୍ସ : ଶୁଭମନ ଗିଲ୍(ଅଧିନାୟକ), ରିଦ୍ଧିମାନ ଶାହା, ବି ସାଇ ସୁଦର୍ଶନ, ଅଜମତୁଲ୍ଲା ଓମାରଜାଇ, ଡେଭିଡ୍ ମିଲର, ଶାହରୁଖ ଖାନ/ବିଜୟ ଶଙ୍କର, ରାହୁଲ ତେୱାତିଆ, ରସିଦ ଖାନ, ନୂର ଅହମ୍ମଦ, ଉମେଶ ଯାଦବ, ଦର୍ଶନ ନାଲକନ୍ଦେ, ମୋହିତ ଶର୍ମା ।
ପଞ୍ଜାବ କିଙ୍ଗ୍ସ: ଶିଖର ଧାୱନ(ଅଧିନାୟକ), ଜନି ବେୟାରଷ୍ଟୋ, ପ୍ରଭସିମରନ ସିଂହ, ଜିତେଶ ଶର୍ମା, ସାମ କରନ, ଲାଏମ ଲିଭିଙ୍ଗଷ୍ଟୋନ, ଶଶାଙ୍କ ସିଂହ, ହର୍ଷଲ ପଟେଲ, ହରପ୍ରୀତ ବ୍ରାର, କାଗିସୋ ରାବାଡା, ରାହୁଲ ଚହର, ଅର୍ଶଦୀପ ସିଂହ ।