ନୂଆଦିଲ୍ଲୀ: ଗାଜା ଯୁଦ୍ଧକୁ ବର୍ଷେ ପୂରଣ ହେବାକୁ ଯାଉଥିବା ବେଳେ ଇସ୍ରାଏଲର ପ୍ରତିରକ୍ଷା ମନ୍ତ୍ରୀ ୟୋଭ ଗାଲାଣ୍ଟଙ୍କ ମନ୍ତବ୍ୟ ଚର୍ଚ୍ଚାର ପ୍ରସଙ୍ଗ ପାଲଟିଛି । ଇସ୍ରାଏଲ ଆକ୍ରମଣରେ ହମାସ ସଂଗଠନର ଭିତ୍ତିଭୂମି ଧ୍ବଂସ ପାଇଛି । ଗାଜାରେ ହମାସ ଆଉ ଏକ ସୈନ୍ୟ ସଂଗଠନ ହୋଇ ରହିନାହିଁ । ହମାସ ଲୁଚିଛପି ଆକ୍ରମଣ କରୁଥିବା ବେଳେ ଏହାର ଜବାବ ଦେଉଛି ଇସ୍ରାଏଲ । ଏହା ସହ ହମାସର ଶୀର୍ଷ ନେତୃତ୍ବଙ୍କୁ ଇସ୍ରାଏଲ ସେନା ଖୋଜିବା ଜାରି ରଖିଛି ବୋଲି ୟୋଭ ଗାଲାଣ୍ଟ ଦାବି କରିଛନ୍ତି । 

ଏହା ସହ ସେ ଗାଜା ଯୁଦ୍ଧ ବିରାମର ପ୍ରଥମ ପର୍ଯ୍ୟାୟରେ ବନ୍ଧକଙ୍କୁ ମୁକ୍ତ ଲାଗି ଚୁକ୍ତିନାମାର ସମର୍ଥନ କରିଛନ୍ତି । ଏଥିଯୋଗୁଁ ଇସ୍ରାଏଲକୁ ଅନ୍ୟ ସୁରକ୍ଷା ସମ୍ବନ୍ଧୀୟ ଚ୍ୟାଲେଞ୍ଜର ମୁକାବିଲା କରିବାକୁ ରଣନୈତିକ ଅବସର ମିଳିପାରିବ ବୋଲି ଆଶା ପ୍ରକଟ କରିଛନ୍ତି ଇସ୍ରାଏଲର ପ୍ରତିରକ୍ଷା ମନ୍ତ୍ରୀ । ବନ୍ଧକଙ୍କୁ ମକ୍ତ କରି ଘରକୁ ଫେରାଇ ଆଣିବା ଏକ ଭଲ କାର୍ଯ୍ୟ ହେବ ବୋଲି ସେ କହିଛନ୍ତି । ଏହା ପୂର୍ବରୁ ଯୁଦ୍ଧ ବନ୍ଦ କରି ପାଲେଷ୍ଟାଇନ କଏଦୀଙ୍କ ବଦଳରେ ନିଜର ବନ୍ଧକଙ୍କୁ ମୁକ୍ତ କରିବା ଲାଗି ପ୍ରଚେଷ୍ଟା କରିବାକୁ  ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ଉପରେ ଚାପ ପକାଇଥିଲେ ୟୋଭ ଗାଲାଣ୍ଟ । ବନ୍ଧକଙ୍କୁ ମୁକ୍ତ କରିବା ଲାଗି ଶାନ୍ତି ଆଲୋଚନା କରିବାକୁ ଇସ୍ରାଏଲ ପ୍ରଧାନମନ୍ତ୍ରୀଙ୍କ ଉପରେ ଚାପ ବୃଦ୍ଧି ପାଇବା ପରେ ଏବେ ଶାନ୍ତି ଆଲୋଚନା ଲାଗି ଚେଷ୍ଟା ଜାରି ରହିଛି । 

ଅନ୍ୟପଟେ ଗତ ଜୁଲାଇରେ ହମାସର ଅଧାରୁ ଅଧିକ ନେତାଙ୍କୁ ହତ୍ୟା କରାଯାଇଛି ବୋଲି ଦାବି କରିଛନ୍ତି ଇସ୍ରାଏଲ ପ୍ରତିରକ୍ଷା ମନ୍ତ୍ରୀ । ଏହା ବ୍ୟତୀତ ୪୦ ହଜାର ହମାସ ଫାଇଟରଙ୍କ ମଧ୍ୟରୁ ୧୪ ହଜାରଙ୍କୁ ମାରିଦିଆଯାଇଛି କିମ୍ବା ବନ୍ଦୀ କରାଯାଇଛି । କିନ୍ତୁ ଏଭଳି ଦାବିକୁ ଖଣ୍ଡନ କରିଛି ହମାସ ସଂଗଠନ ।  ଅକ୍ଟୋବର ୭, ୨୦୨୩ରେ ଇସ୍ରାଏଲ ଉପରେ ଆକ୍ରମଣ କରି ୧୨୦୦ ଲୋକଙ୍କୁ ହତ୍ୟା କରିବା ସହ ୨୫୦ ଜଣଙ୍କୁ ବନ୍ଧକ କରିନେଇଥିଲା ହମାସ । ଏହା ପୂର୍ବରୁ ଆଜି ଜାତିସଂଘ ମୁଖ୍ୟ ଆଣ୍ଟୋନିଓ ଗୁଟେରସ ଯୁଦ୍ଧ ବନ୍ଦ କରିବା ଉପରେ ଜୋର ଦେଇଛନ୍ତି । ଯୁଦ୍ଧ ବିରାମ ଉପରେ ଜାତିସଂଘ ହସ୍ତକ୍ଷେପ କରିପାରେ ବୋଲି ମଧ୍ୟ କହିଛନ୍ତି ଗୁଟେରସ ।