ଗାଜାସିଟି,୦୯/୦୬: ଇସ୍ରାଏଲ ସେନା ଗାଜା  ସିଟିର ଡେର-ଏଲ୍‌-ବଲାହ ଓ ନୁସେରତ୍‌ ଅଞ୍ଚଳର ୧୨ରୁ  ଅଧିକ ସ୍ଥାନରେ ଜଳ, ସ୍ଥଳ ଓ ସମୁଦ୍ରରୁ ପ୍ରଚଣ୍ଡ ଆକ୍ରମଣ କରିଛି । ଏଥିରେ ୨୧୦ ଜଣ ପ୍ରାଣ ହରାଇଥିଲା ବେଳେ ଶତାଧିକ ଆହତ ହୋଇଛନ୍ତି । ମୃତାହତଙ୍କ ମଧ୍ୟରେ ଅଧିକାଂଶ  ମହିଳା ଓ ପିଲା ଥିବା ଜଣାପଡିଛି । ଆହତଙ୍କୁ ଅଲ୍‌-ଅକ୍ସା  ମାର୍ଟିୟାର୍ସ ହସ୍ପିଟଲରେ ଭର୍ତ୍ତି କରାଯାଇଛି । ହସ୍ପିଟାଲରେ  ସ୍ଥାନର ଅଭାବ ଯୋଗୁ ରାସ୍ତା କଡରେ ମଧ୍ୟ ଅନେକ ଆହତ  ପଡିରହିଛନ୍ତି । ଡାକ୍ତର ଓ ଅନ୍ୟ ସ୍ୱାସ୍ଥ୍ୟକର୍ମୀମାନେ ସେମାନଙ୍କୁ  ବଞ୍ଚାଇବା ଲାଗି ଯଥାସମ୍ଭବ ଉଦ୍ୟମ କରୁଛନ୍ତି । ଖାଦ୍ୟ ଓ ଔଷଧର ଅଭାବ ରହିଥିଲା ବେଳେ ଜେନେରେଟର ଚଳାଇବାକୁ ଇନ୍ଧନ ମଧ୍ୟ ନାହିଁ । ତୁହାକୁ ତୁହା ବୋମା ମାଡ଼ ଯୋଗୁ ଯୋଗାଯୋଗ ବ୍ୟବସ୍ଥା ସମ୍ପୂର୍ଣ୍ଣ ଭାବେ ବିଚ୍ଛିନ୍ନ  ହୋଇଯାଇଛି । ଆଉ କେଉଁ ଅଞ୍ଚଳରେ କ’ଣ ସବୁ କ୍ଷତି  ଘଟିଛି ତାର ରିପୋର୍ଟ ସାମ୍‌ନାକୁ ଆସିପାରୁ ନାହିଁ । 

ହସ୍ପିଟାଲ ଠାରୁ ଆରମ୍ଭ କରି ରିଲିଫ ଶିବିର ପର୍ଯ୍ୟନ୍ତ ବିଭିନ୍ନ ସ୍ଥାନରେ ଇସ୍ରାଏଲ ସେନା ବୋମାମାଡ଼ କରୁଥିବାରୁ ଲୋକମାନେ  କୁଆଡେ ଯିବେ ସ୍ଥିର କରିପାରୁନାହାନ୍ତି । ପାଲେଷ୍ଟାଇନ ରାଷ୍ଟ୍ରପତି ମହମ୍ମୁଦ ଆବାସ ଇସ୍ରାଏଲର ଏଭଳି ଆକ୍ରମଣକୁ  ତୀବ୍ର ନିନ୍ଦା କରିବା ସହ ତୁରନ୍ତ ଜାତିସଂଘ ନିରାପତ୍ତା ପରିଷଦର ଜରୁରି ବୈଠକ ଡାକିବାକୁ ଦାବି କରିଛନ୍ତି । କହିଛନ୍ତି ତୁରନ୍ତ ଇସ୍ରାଏଲକୁ ଏଭଳି ରକ୍ତପାତରୁ ନିବୃତ୍ତ  କରାଯିବା ଉଚିତ । ଗତ ଗୁରୁବାର ନୁସେରତ ଅଞ୍ଚଳରେ  ଥିବା ଏକ ରିଲିଫ ଶିବିର ଉପରେ ଇସ୍ରାଏଲ ସେନା ଆକ୍ରମଣ  କରିବାରୁ ୪୦ ଜଣ ସାଧାରଣ ନାଗରିକ ପ୍ରାଣ ହରାଇଥିଲେ । ଅନ୍ୟପକ୍ଷରେ ଏହି ଆକ୍ରମଣରେ ୧୭ ଜଣ ହମାସ ଆତଙ୍କୀ  ନିପାତ ହୋଇଥିବା ଇସ୍ରାଏଲ ଦାବି କରିଥିଲା। ହେଲେ ତାର ଏହି ଦାବିକୁ ପାଲେଷ୍ଟାଇନ ଖଣ୍ଡନ କରିଛି ।