ଭୁବନେଶ୍ୱର,୧୬/୦୯: ଜାଗା ମିଶନ ଲ୍ୟାଣ୍ଡ ରାଇଟ୍ ସାର୍ଟିଫିକେଟ (ଏଲ୍ଆରସି) ଛପାରେ ଆଖି ତରଟିଲା ଭଳି ଦୁର୍ନୀତି ସାମ୍ନାକୁ ଆସିଛି । ପ୍ରତି କପି ଛାପିବା ବାହାନାରେ ୭ ଟଙ୍କା ୭୪ ପଇସା ଗଳି ଦେଇଛନ୍ତି ବାବୁମାନେ । ନୂଆ ଟେଣ୍ଡର ଖୋଲିବା ପରେ ଏହି ଦୁର୍ନୀତି ଏବେ ସାମ୍ନାକୁ ଆସିଛି ।
ଭୂମିହୀନ ବସ୍ତିବାସିନ୍ଦାଙ୍କୁ ସହରାଞ୍ଚଳରେ ଜାଗା ମିଶନରେ ଜାଗା ଯୋଗାଇ ଦିଆଯାଇଛି । ଏନେଇ ବିଏମ୍ସି ପକ୍ଷରୁ ହିତାଧିକରୀ ଚିହ୍ନଟ କରାଯାଇ ସେମାନଙ୍କୁ ଏଲ୍ଆରସି ବଣ୍ଟା ଯାଇଥିଲା । ହେଲେ ଏହି ପଟ୍ଟା ବଣ୍ଟା ଗୁମର ଆସ୍ତେ ଆସ୍ତେ ଖୋଲିବାରେ ଲାଗିଛି । ବିଏମ୍ସି ପ୍ରଥମ ପର୍ଯ୍ୟାୟରେ ୬୦ ହଜାର ହିତାଧିକାରୀଙ୍କୁ ପଟ୍ଟା ବାଣ୍ଟିଛି । ପ୍ରତି ହିତାଧିକାରୀ ପିଛା ୫ଟି ଲେଖାଁଏ କପି ଛପା ହୋଇଥିଲା । ସେଥିଧ୍ୟରେ ଗୋଟିଏ କପି ହିତାଧିକାରୀଙ୍କୁ ଦିଆଯାଇଥିଲା ବେଳେ ଅନ୍ୟ ଗୋଟିଏ ଲେଖାଁଏ କପି ବିଏମ୍ସି, ତହସିଲ ଅଫିସ, ଜିଲ୍ଲାପାଳ ଅଫିସ ଏବଂ ନଗର ଉନ୍ନୟନ ବିଭାଗକୁ ଯାଇଥିଲା । ଏହି ହିସାବରେ ପ୍ରାୟ ୩ ଲକ୍ଷରୁ ଉଦ୍ଧ୍ୱର୍ ଏଲ୍ଆରସି ବିଏମ୍ସି ଛାପିଥିଲା । ପ୍ରତି କପି ବାବଦକୁ ଏକ ଘରୋଇ ସଂସ୍ଥାକୁ ୯ ଟଙ୍କା ୨୦ ପଇସା ହିସାବରେ ବିଲ୍ କରାଯାଇଥିଲା । ହିସାବ କଲେ ପ୍ରାୟ ୩୦ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା ।
ନୂଆ ସରକାର ଆସିବା ପରେ ଏବେ ଚିତ୍ର ବଦଳିଛି । ବିଏମ୍ସି ପକ୍ଷରୁ ଆବେଦନ କରିଥିବା ପ୍ରାୟ ୨୦ ହଜାର ହିତାଧିକାରୀଙ୍କୁ ଏବେ ପଟ୍ଟା ବଣ୍ଟା ହେବ । ଏନେଇ ନୂଆ ଟେଣ୍ଡର ଡକା ହୋଇଥିଲା । ଏଥର କିନ୍ତୁ ମାତ୍ର ୧ ଟଙ୍କା ୪୬ ପଇସାରେ ଛପା ହେବ । ଅର୍ଥାତ ପୂର୍ବରୁ ଜାଣିଶୁଣି ୭ ଟଙ୍କା ୭୪ ପଇସା ଘୋଟାଲା କରାଯାଇଥିଲା । ଆଉ ଏଥିରେ ଖୋଦ କିଛି ବଡ଼ବାବୁ ସାମିଲ ରହିଥିଲେ ବୋଲି ଅଭିଯୋଗ ହୋଇଛି । ଏ ବାବଦକୁ ବିଏମ୍ସି ଲକ୍ଷ ଲକ୍ଷ ଟଙ୍କା କ୍ଷତି ସହିଛି । ଏପରିକି ପ୍ରାୟ ୧୫ ହଜାରରୁ ଅଧିକ କପି ଭୁଲ ପାଇଁ ଚିରି ପିଙ୍ଗିଦିଆଯାଇଥିଲା ।
ଏ ତ ଗଲା ବିଏମ୍ସି କଥା । ପୁରା ରାଜ୍ୟରେ ଥିବା ୧୧୫ ପୌରାଞ୍ଚଳରେ ପ୍ରାୟ ୧ ଲକ୍ଷ ୫୧ ହଜାର ବସ୍ତିବାସିନ୍ଦାଙ୍କୁ ପଟ୍ଟା ବଣ୍ଟା ଯାଇଛି। ଅର୍ଥାତ ଏହି ଚେର ପୁରା ଭୁବନେଶ୍ୱରରୁ ଏନ୍ଏସି ପର୍ଯ୍ୟନ୍ତ ଲମ୍ବିଛି । ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ କୋଟି କୋଟି ଟଙ୍କା ଏପରି ବାଟରେ ଆତ୍ମସାତ କରାଯାଇଥିବାର ଅନୁମାନ କରାଯାଉଛି । ଯଦି ଏହାର ତଦନ୍ତ କରାଯାଏ, ତାହାଲେ ଏହାର ଗୁମର ପଦାକୁ ଆସିବ ।
ଆରମ୍ଭରୁ ଜାଗା ମିଶନର ବିବାଦରେ ରହି ଆସିଛି । ଜଣେ ହିତାଧିକାରୀ ଦୁଇ ଦୁଇଟି ଜାଗା ହାତେଇଥିଲେ । ଏପରି କି ବହୁତ ବଡ ବଡିଆ ଲୋକେ ବସ୍ତିରେ ଜାଗା ହାତେଇଥିଲେ । ଏନେଇ ଖୋଳତାଡ ପରେ ୫ ହଜାର ନାଁ କଟିଥିଲା । ଏବେ ପୁଣି ସାର୍ଟିଫିକେଟ୍ ଦୁର୍ନୀତି ସାମନାକୁ ଆସିଛି ।
