ଜଗତସିଂହପୁର,୧୫/୦୪: ଜଗତସିଂହପୁର ନିର୍ବାଚନମଣ୍ଡଳୀ କ୍ଷେତ୍ରରେ କଂଗ୍ରେସର ବିଧାୟକ ପ୍ରାର୍ଥୀ ଚୂଡ଼ାନ୍ତ ହେବାରେ ବିଳମ୍ବ ଘଟୁଛି ।  ଏମିତିକି ବିଧାୟକ ପ୍ରାର୍ଥୀ ହେବାକୁ ସେମିତି କେହି ଆଗ୍ରହୀ ନାହାନ୍ତି । ନିକଟରେ କିନ୍ତୁ ଏହି ଆସନରୁ ଅନେକ ଆଶାୟୀ ରହିଥିଲେ । ଟିକଟ୍‌  ପାଇଁ ଆବେଦନ କରିଥିଲେ । ହେଲେ ନିର୍ବାଚନ ରଣଦୁନ୍ଦୁଭି ବାଜି ଉଠି ସାରିଥିଲେ ସୁଦ୍ଧା କେହି ଜଣେ ଆଶାୟୀ ପ୍ରାର୍ଥୀ ଆଗତୁରା ସଂଗଠନ  ସଜାଡ଼ିବା ଦିଗରେ କାର୍ଯ୍ୟ କରୁଥିବା ମନେ ହେଉନାହିଁ । ଦଳ ଟିକଟ୍‌ରୁ ବିଧାୟକ ନିର୍ବାଚନ ଲଢ଼ିବାକୁ ପୌରାଧ୍ୟକ୍ଷା ଅର୍ଚ୍ଚନା ସିଂହଙ୍କ ଉପରେ  ଅଧିକ ଚାପ ପଡ଼ିଥିବା ନିର୍ଭରଯୋଗ୍ୟ ସୂତ୍ରରୁ ପ୍ରକାଶ ।

 ଦୁଇ ଦିନ  ତଳେ ପୌରାଧ୍ୟକ୍ଷାଙ୍କ ଉପସ୍ଥିତିରେ କିଛି କଂଗ୍ରେସ ପାରିଷଦ ସ୍ଥାନୀୟ ଲାଲାସାହିରେ ଏକାଠି ହୋଇଥିଲେ । ଅପରପକ୍ଷେ ପ୍ରାର୍ଥୀ ହେବା ନେଇ ଅଦ୍ୟାବଧି କୌଣସି ନିଷ୍ପତ୍ତି ନିଆଯାଇ ନାହିଁ ବୋଲି ପୌରାଧ୍ୟକ୍ଷାଙ୍କ  ପ୍ରତିନିଧି ତଥା ପୂର୍ବତନ ପାରିଷଦ ଦିଲୀପ ସିଂହ ‘ପ୍ରମେୟ’କୁ  କହିଛନ୍ତି । ଏବେ ଜଗତସିଂହପୁର ନିର୍ବାଚନମଣ୍ଡଳୀ କଂଗ୍ରେସ ଦୋଛକିରେ ଅଟକି ରହିଛି । ପୂର୍ବତନ ବିଧାୟକ ଚିରଞ୍ଜୀବ ବିଶ୍ୱାଳ ଦଳବଳ ଧରି କଂଗ୍ରେସ ଛାଡ଼ି ବିଜେଡିରେ ଯୋଗଦେବା ପରଠୁ ଏଭଳି ସଂକଟ ସୃଷ୍ଟି ହୋଇଛି । ଏପଟେ  ଚିରଞ୍ଜୀବଙ୍କୁ ବିଜେଡି ପକ୍ଷରୁ ବିଧାୟକ ଟିକଟ୍‌ ନମିଳିବା ଦେଖି ଦଳ ଛାଡ଼ିଥିବା ବହୁ କଂଗ୍ରେସ କର୍ମୀ ପୁଣି ଅଲଗା  ରାସ୍ତା ଦିଗକୁ ମୁହାଁଇଲେଣି । ତାଙ୍କର ହାତଗଢ଼ା କଂଗ୍ରେସ ସଂଗଠନ ଏଠି ଛାର୍‌ଖାର୍‌ । ସଂଗଠନ ଭୁଶୁଡ଼ି  ଥିବାରୁ କଂଗ୍ରେସ ପ୍ରାର୍ଥୀ ହେବାକୁ ଆଉ କେହି ମନ  ବଳାଉ ନାହାନ୍ତି । ବହୁ କଂଗ୍ରେସ କର୍ମୀ ବିଜେଡି ଓ  ବିଜେପି ପଟକୁ ଢଳୁଥିବା ଲକ୍ଷ୍ୟ କରାଗଲାଣି ।