ନୂଆଦିଲ୍ଲୀ: ପ୍ରବଳ ତାତି ଲୋକଙ୍କୁ ଚିନ୍ତାରେ ପକାଇଛି । ଝାଳରେ ଭିଜୁଛି ଶରୀର । କିନ୍ତୁ ଆଉ ୧୫-୨୦ ଦିନ ଭିତରେ ମୌସୁମୀ ଆସିବାକୁ ଯାଉଛି । ବର୍ଷା ସାଙ୍ଗକୁ ମଶାଙ୍କ ସଂଖ୍ୟା ମଧ୍ୟ ବଢ଼ିବ । ଏହା ସହ ଡେଙ୍ଗୁ ଏବଂ ମାଲେରିଆ ଭଳି ଭୟଙ୍କର ରୋଗ ବ୍ୟାପିବାର ବିପଦ ବୃଦ୍ଧି ପାଇବ । ମାଲେରିଆ ସହ ଲଢ଼ିବା ଲାଗି ଜେଏନୟୁର ବୈଜ୍ଞନିକମାନେ ଏକ ଖାସ ଭ୍ୟାକ୍ସିନ୍ ବା ଟୀକା ବିକଶିତ କରିଛନ୍ତି । ଏହି ଗବେଷଣା ଆଇସାଇନ୍ସ ପତ୍ରିକାରେ ପ୍ରକାଶ ପାଇଛି ।
ଜେଏନୟୁର ପ୍ରଫେସର ଶୈଳଜା ସିଂହ ଏବଂ ପ୍ରଫେସର ଆନନ୍ଦ ରଙ୍ଗନାଥନ ମାଲେରିଆ ଟୀକାକୁ ନେଇ ଗୁରୁତ୍ବପୂର୍ଣ୍ଣ ଗବେଷଣା କରିଛନ୍ତି । ପ୍ରୋହିବିଟିନ ପ୍ରୋଟିନ ସହାୟତାରେ ଏହି ଟୀକା ବିକଶିତ କରାଯାଇଛି । ମାଲେରିଆ ମାଈ ଏନୋଫିଲିସ ମଶା କାମୁଡ଼ିବା ଦ୍ବାରା ବ୍ୟାପିଥାଏ । ମାଲେରିଆ ଯୋଗୁ ଲକ୍ଷାଧିକ ଲୋକଙ୍କ ଜୀବନ ମଧ୍ୟ ଯାଉଛି । ମାଲେରିଆକୁ ରୋକିବା ଲାଗି ବ୍ୟାପକ ବ୍ୟବସ୍ଥା କରାଯାଉଥିଲେ ହେଁ ମୃତ୍ୟୁସଂଖ୍ୟା ଚିନ୍ତା ବଢ଼ାଇ ଦେଉଛି । ବିଶ୍ବ ସ୍ବାସ୍ଥ୍ୟ ସଂଗଠନର ରିପୋର୍ଟ ଅନୁସାରେ ୨୦୨୨ରେ ୨୪୯ ମିଲିୟନ୍ ମାଲେରିଆ ମାମଲା ମିଳିଥିଲା । ସେଥିମଧ୍ୟରୁ ୬୦, ୮୦୦ ଲୋକଙ୍କ ଜୀବନ ନେଇଥିଲା ମାଲେରିଆ ।
ଜେଏନୟୁର ସ୍ପେଶାଲ ସେଣ୍ଟର ଫର ମଲିକୁଲାର ମେଡିସିନର ପ୍ରଫେସର ଶୈଳଜା ସିଂହ ଏବଂ ପ୍ରଫେସର ଆନନ୍ଦ ରଙ୍ଗନାଥନଙ୍କ ନେତୃତ୍ବରେ ଗେବଷକଙ୍କ ଏକ ଟିମ୍ ନୂଆ ପରଜୀବୀ ଇଣ୍ଟରକନେକ୍ଟିଙ୍ଗ କମ୍ପ୍ଲେକ୍ସର ଆବିଷ୍କାର କରିଛନ୍ତି । ଏହା ଏକ ସଫଳ ଏବଂ ପ୍ରଭାବଶାଳୀ ଟୀକା ବିକଶିତ ଦିଗରେ ଗୁରୁତ୍ବପୂର୍ଣ୍ଣ ଆବିଷ୍କାର ବୋଲି କୁହାଯାଉଛି । ପ୍ରଫେସର ସିଂହ କହିଛନ୍ତି ଯେ, ଆମେ ନୂଆ PHB2-Hsp70A1A ରିସେପ୍ଟର ଲିଗାଣ୍ଡର ଯୋଡ଼ିକୁ ଖୋଜି ବାହାର କରିଛୁ । ଯାହା ମଣିଷ ଶରୀରରେ ସଂକ୍ରମଣ ବୃଦ୍ଧି କରୁଛି । ଏହା ବିରୋଧରେ ପରଜୀବୀ ପ୍ରୋଟିନ PHB2 ଏକ ପ୍ରଭାବଶାଳୀ ଟୀକା ।
ଗବେଷଣା କରୁଥିବା ବୈଜ୍ଞାନିକ ଜାଣିବାକୁ ପାଇଛନ୍ତି ଯେ, ମେରୋଜାଇଟ୍ ସର୍ଫେସ ଉପରେ ମିଳୁଥିବା PfPHB2 ପ୍ରୋଟିନ ଲୋହିତ ରକ୍ତ କଣିକା (ଆରବିସି)ରେ ଥିବା ହିଟ୍ ଶକ୍ ପ୍ରୋଟିନ୍ Hsp70A1A ସହ ମିଶି ପ୍ରତିକ୍ରିୟା କରିଥାଏ । ଆଣ୍ଟିବଡି ଚିକିତ୍ସା ଏହି ପ୍ରତିକ୍ରିୟାକୁ ରୋକିଥାଏ । ଫଳରେ ମାଲେରିଆ ପାରାସାଇଟ ଜୀବାଣୁ ନଷ୍ଟ ହୋଇଥାଏ ।
