ନୂଆଦିଲ୍ଲୀ: ତିରୁପତି ମନ୍ଦିରରେ ମିଳୁଥିବା ଲଡୁରେ ପଶୁ ଚର୍ବି ମିଶୁଥିବା ନେଇ ଅଭିଯୋଗ ପରେ କର୍ଣ୍ଣାଟକ ସରକାର ତତ୍ପରତା ପ୍ରକାଶ କରିଛନ୍ତି । ରାଜ୍ୟ ସରକାରଙ୍କ ଦ୍ବାରା ପରିଚାଳିତ ୩୪ ହଜାର ମନ୍ଦିରରେ ତିଆରି ହେଉଥିବା ପ୍ରସାଦ ‘ନନ୍ଦିନୀ ଘିଅ’ରେ ପ୍ରସ୍ତୁତ କରିବାକୁ ନିର୍ଦ୍ଦେଶ ଦିଆଯାଇଛି । କର୍ଣ୍ଣାଟକ ସରକାର ଏଥିପାଇଁ ଶୁକ୍ରବାର ମାର୍ଗଦର୍ଶିକା ଜାରି କରିଛନ୍ତି । କର୍ଣ୍ଣାଟକ ମିଲ୍କ ଫେଡରେସନ (କେଏମଏଫ)ଦ୍ବାରା ତିଆରି ହେଉଥିବା ନନ୍ଦିନୀ ଘଅ ବ୍ୟବହାର କରିବାକୁ ମନ୍ଦିର ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି ସରକାର । 

ମନ୍ଦିରର ପ୍ରସାଦ ସହିତ ଦୀପରେ ମଧ୍ୟ ଏହି ଘଅ ବ୍ୟବହାର କରିବାକୁ କୁହାଯାଇଛି । ଏପରିକି ପ୍ରସାଦର ମାନରେ ସାଲିସ ନକରିବାକୁ ମନ୍ଦିର ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି ରାଜ୍ୟ ସରକାର । ରାଜ୍ୟ ଦେବୋତ୍ତର ବିଭାଗ ଅଧୀନରେ ଆସୁଥିବା ସମସ୍ତ ମନ୍ଦିରରେ କେବଳ ନନ୍ଦିନୀ ଘଅ ବ୍ୟବହାର କରାଯିବ ।

ତିରୁପତିର ତିରୁମାଳା ତିରୁପତି ଦେବସ୍ଥାନମ (ଟିଟିଡି) ଦ୍ବାରା ପରିଚାଳିତ ଶ୍ରୀ ଭେଙ୍କଟେଶ୍ବର ସ୍ବାମୀ ମନ୍ଦିରର ଲଡୁ ପଶୁ ଚର୍ବିରେ ତିଆରି ହେଉଥିବା ନେଇ ଅଭିଯୋଗ ଆସିବା ପରେ କର୍ଣ୍ଣାଟକ ସରକାର ରାଜ୍ୟର ମନ୍ଦିରଗୁଡ଼ିକ ଲାଗି ଏଭଳି ମାର୍ଗଦର୍ଶିକା ଜାରି କରିଛନ୍ତି । 

ଚଳିତ ସପ୍ତାହରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ତିରୁପତି ଲଡୁରେ ପଶୁ ଚର୍ବି ମିଶୁଥିବା ନେଇ ଅଭିଯୋଗ କରିବା ପରେ ବିବାଦ ଉଗ୍ର ରୂପ ଧାରଣ କରିଛି । ସେପଟେ ଗୁଜରାଟର ଏକ ଘରୋଇ ଲ୍ୟାବରେ ଲଡୁ ପରୀକ୍ଷା କରାଯାଇଥିଲା । ଏଥିରେ ଗୋରୁ ଚର୍ବୀ, ମାଛ ତେଲ ଆଦି ମିଶୁଥିବା ଜଣାପଡ଼ିଛି।  ଲଡୁ ବିବାଦ ତୀବ୍ର ହେବା ପରେ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ମଧ୍ୟ ରାଜ୍ୟ ସରକାରଙ୍କ ପାଖରୁ ସବିଶେଷ ରିପୋର୍ଟ ମାଗିଛନ୍ତି ।