ନୂଆଦିଲ୍ଲୀ: ଟି-୨୦ ବିଶ୍ବକପ ଲାଗି ଭାରତୀୟ ଦଳ ଘୋଷଣା ହୋଇଛି ।ରୋହିତ ଶର୍ମାଙ୍କ ନେତୃତ୍ବରେ ୧୫ ଜଣିଆ ଟିମ୍ ଘୋଷଣା କରିଛି ବିସିସିଆଇ । ଜୁନ୍ ୨ରୁ ଆରମ୍ଭ ହେବାକୁ ଥିବା ଟି-୨୦ ବିଶ୍ବକପ୍ରେ ଭାରତୀୟ ଦଳ ପକ୍ଷରୁ ରୋହିତ ଶର୍ମା ଏବଂ ଯଶସ୍ବୀ ଜୟସ୍ବାଲଙ୍କୁ ଓପନିଂ କରୁଥିବା ଦେଖିବାକୁ ମିଳିବ । ୨୦୨ ଟି-୨୦ ବିଶ୍ବକପ୍ରେ ଉପଅଧିନାୟକ ଦାୟିତ୍ବ ତୁଲାଇଥିବା କେଏଲ ରାହୁଲଙ୍କୁ ଏଥର ଦେଖିବାକୁ ମିଳିବ ନାହିଁ । ସେ ଭାରତୀୟ ଟିମ୍ରେ ସ୍ଥାନ ପାଇନାହାନ୍ତି । ଏହାକୁ ନେଇ କ୍ରିକେଟ ପ୍ରେମୀ ଏବଂ ଖେଳ ସମୀକ୍ଷମ ଆଶ୍ଚର୍ଯ୍ୟ ହୋଇଛନ୍ତି । କେଏଲ ରାହୁଲଙ୍କ ଭଳି ଯୁବ ବ୍ୟାଟର ରିଙ୍କୁ ସିଂହଙ୍କୁ ଟିମ୍ରେ ସାମିଲ କରାଯାଇ ନଥିବା ବେଳେ ତାଙ୍କୁ ରିଜର୍ଭ ତାଲିକାରେ ରଖାଯାଇଛି । ରିଙ୍କୁ ସିଂହଙ୍କ ବ୍ୟତୀତ ଶୁଭମନ ଗିଲ୍, ଆଭେଶ ଖାନ ଏବଂ ଖଲିଲ୍ ଅହମ୍ମଦ ରିଜର୍ଭ ତାଲିକାରେ ସାମିଲ ଅଛନ୍ତି ।
ସେପଟେ ଆଇପିଏଲରେ ଲକ୍ଷ୍ନୌ ସୁପର ଜ୍ୟାଣ୍ଟସ୍ ଅଧିନାୟକ ଲଗାତାର ଭଲ ପ୍ରଦର୍ଶନ କରୁଥିଲେ ସୁଦ୍ଧା ତାଙ୍କୁ ଦଳରେ ସାମିଲ କରାଯାଇ ନାହିଁ । କେଏଲ ରାହୁଲ ଆଇପିଏଲରେ ଜଣେ ଓପନର ବ୍ୟାଟର ଭାବରେ ୪୦୦୦ ରନ୍ ପୂରଣ କରିଛନ୍ତି । ଆଇପିଏଲ ଇତିହାସରେ ଓପନର ଭାବରେ ୪୦୦୦ ରନ୍ ପୂରଣ କରିବା ମାମଲରେ ଚତୁର୍ଥ ସ୍ଥାନ ଅଧିକାର କରିଛନ୍ତି କେଏଲ ରାହୁଲ । ଏପ୍ରିଲ ୨୭ (ଶନିବାର) ରାଜସ୍ଥାନ ରୟାଲ୍ସ ବିପକ୍ଷରେ ସେ ଏହି ମାଇଲ ଖୁଣ୍ଟ ଅତିକ୍ରମ କରିଛନ୍ତି । ଏଭଳି ସ୍ଥିତିରେ କେଏଲ ରାହୁଲଙ୍କ ଟି-୨୦ ସ୍କ୍ବାଡ୍ରେ ସାମିଲ କରାନଯିବାକୁ ନେଇ କ୍ରିକେଟ ପ୍ରେମୀଙ୍କ ମହଲରେ କ୍ଷୋଭ ପ୍ରକାଶ ପାଇଛି ।
ଲଗାତାର ଟିମ୍ ଇଣ୍ଡିଆ ସହ ରହିଥିବା ରାହୁଲଙ୍କୁ ହଠାତ ଦଳରୁ ଆଉଟ୍ କରାଯିବାକୁ ନେଇ ଭିନ୍ନ ମତ ପ୍ରକାଶ ପାଇଛି । ସୋସିଆଲ ମିଡିଆରେ କେଏଲ ରାହୁଲଙ୍କ ସମର୍ଥନରେ ଟ୍ବିଟ୍ କରୁଛନ୍ତି ଖେଳପ୍ରେମୀ । ଓପନିଂ କରିବା ବ୍ୟତୀତ ମିଡିଲ ଅର୍ଡରରେ ମଧ୍ୟ ରାହୁଲ ସଂକଟ ମୋଚକ ସାବ୍ୟସ୍ତ ହୋଇଛନ୍ତି ।କିନ୍ତୁ ଚୟନକର୍ତ୍ତା କାହିଁକି ତାଙ୍କୁ ଦଳରେ ସାମିଲ କଲେ ନାହିଁ ତାହା ମଧ୍ୟ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି । କେଏଲ ରାହୁଲ ଦଳରୁ ଆଉଟ ହୋଇଥିବା ବେଳେ ରିଷଭ ପନ୍ତ ଏବଂ ସଞ୍ଜୁ ସାମସନ ଇନ୍ କରିଛନ୍ତି ।
ଅନ୍ୟପକ୍ଷରେ ଏବେ କ୍ରିକେଟ ପ୍ରେମୀ ପନ୍ତ ଏବଂ ରାହୁଲଙ୍କ ଟି-୨୦ କ୍ୟାରିୟରକୁ ନେଇ ଚର୍ଚ୍ଚା କରୁଛନ୍ତି । ଉଭୟଙ୍କ ଟି-୨୦ କ୍ୟାରିୟର ଉପରେ ନଜର ପକାଇଲେ, ରିଷଭ ପନ୍ତଙ୍କ ଠାରୁ ବହୁ ଆଗରେ ଅଛନ୍ତି କେଏଲ ରାହୁଲ । କେଏଲ ରାହୁଲ ୭୨ଟି ଅନ୍ତର୍ଜତୀୟ ଟି-୨୦ ମ୍ୟାଚ୍ରେ ସାମିଲ ହୋଇଥିବା ବେଳେ ୬୮ଟି ଇନିଂସ୍ ଖେଳିଛନ୍ତି। ୬୮ଟି ଇନିଂସ୍ରୁ କେଏଲ ରାହୁଲ ୩୭.୭୫ ଆଭରେଜ୍ ଏବଂ ୧୩୯.୧୨ ଷ୍ଟ୍ରାଇକ୍ ରେଟ୍ ସହ ୨୨୬୫ ରନ୍ କରିଛନ୍ତି ।
ସେଥିମଧ୍ୟରୁ ୨ଟି ଶତକ ଏବଂ ୨୨ଟି ଅର୍ଦ୍ଧଶତକ ହାସଲ କରିଛନ୍ତି କେଏଲ ରାହୁଲ । ସେହିଭଳି ରିଷଭ ପନ୍ତ ୬୬ଟି ମ୍ୟାଚ୍ରେ ୫୬ଟି ଇନିଂସ୍ ଖେଳି ୨୨.୪୩ ଆଭରେଜ୍ ସହ ୯୮୭ ରନ୍ କରିଛନ୍ତି ।ଏହି ସମୟରେ ତାଙ୍କର ଷ୍ଟ୍ରାଇକ୍ ରେଟ୍ ୧୨୬.୩୭ ରହିଛି । ସେ କେବଳ ୩ଟି ଅର୍ଦ୍ଧଶତକ କରିବାରେ ସଫଳ ହୋଇଛନ୍ତି । ସେପଟେ ୨୦୨୨ରେ ଦୁର୍ଘଟଣାର ଶିକାର ହେବା ପରେ ଦଳରେ ସାମିଲ ହୋଇପାରି ନଥିଲେ ରିଷଭ ପନ୍ତ । ଚଳିତ ଆଇପିଏଲ ସିଜନରେ ଦିଲ୍ଲୀ ଟିମକୁ ଫେରିବା ସହ ସେ ଭଲ ପ୍ରଦର୍ଶନ ଜାରି ରଖିଛନ୍ତି । ଆଉ ଏଥିପାଇଁ ତାଙ୍କୁ ଟି-୨୦ ବିଶ୍ବକପ୍ ଦଳରେ ସାମିଲ କରାଯାଇଥିବା କୁହାଯାଉଛି ।
ସୂଚନାଯୋଗ୍ୟ, ଗତ ଦୁଇଟି ଟି-୨୦ ବିଶ୍ବକପରେ ରାହୁଲଙ୍କ ପ୍ରଦର୍ଶନ ସତେଟା ଭଲ ନଥିଲା । ୨୦୨୨ରେ ରାହୁଲ ୬ ଇନିଂସରେ କେବଳ ୧୨୮ ରନ କରିଥିଲେ ଏବଂ ଷ୍ଟ୍ରାଇକରେଟ୍ ୧୨୦ ଥିଲା । ୨୦୨୧ରେ ସେ ୫ଟି ଇନିଂସରେ ୧୫୨ ଷ୍ଟ୍ରାଇକରେଟରେ ୧୯୪ ରନ୍ କରିଥିଲେ । କିନ୍ତୁ ଏହି ସବୁ ରନ ସ୍କଟଲାଣ୍ଡ, ନାମିବ୍ୟା ଏବଂ ଆଫଗାନିସ୍ତାନ ପରି ଟିମଙ୍କ ବିପକ୍ଷରେ କରିଥିଲେ । ପାକିସ୍ତାନ ଏବଂ ନ୍ୟୁଜିଲାଣ୍ଡ ବିପକ୍ଷରେ ଫେଲ୍ ମାରିଥିଲେ କେଏଲ ରାହୁଲ ।
