କେନ୍ଦୁଝର,୦୮/୦୨: ଦୀର୍ଘଦିନ ବ୍ୟବଧାନରେ କେନ୍ଦୁଝର ବନଖଣ୍ଡରେ କଲରାପତରିଆ ବାଘ ଧରାପଡ଼ିଛି । ବ୍ୟାଘ୍ର ଗଣନାରୁ ତେଲକୋଇ ବନାଞ୍ଚଳ, ଘଟଗାଁ, ସଦର ଓ ଚମ୍ପୁଆ ବନାଞ୍ଚଳରେ ୫ରୁ ଅଧିକ କଲରାପତରିଆ ବାଘ ରହିଥିବା ଟ୍ରାପ୍‌ କ୍ୟାମେରାରୁ ସ୍ପଷ୍ଟ ହୋଇଛି । ଏକାଧିକ ବୟସ୍କ କଲରାପତରିଆ ବାଘ ଅଟେଇ ସଂରକ୍ଷିତ, ବାରବାଙ୍କ, ଚମକପୁର,  ତେଲକୋଇ ପ୍ରଭୃତି ଅଞ୍ଚଳରୁ ଠାବ ହୋଇଛନ୍ତି । ନିୟମିତ କଲରାପତରିଆ ବାଘ ଜଙ୍ଗଲରେ ଚଳପ୍ରଚଳ କରୁଛନ୍ତି । ତେଣୁ ସମ୍ପୃକ୍ତ ଜଙ୍ଗଲ  ନିକଟବର୍ତ୍ତୀ ଲୋକଙ୍କୁ ସତର୍କ ରହିବା ସହ ଗୃହପାଳିତ  ପ୍ରାଣୀଙ୍କୁ ଜଙ୍ଗଲକୁ ନ ଛାଡ଼ିବାକୁ ବନ ବିଭାଗ ପକ୍ଷରୁ  ନିବେଦନ କରାଯାଇଛି । ଫେବ୍ରୁଆରୀରେ ମହାବଳ  ପରେ ଏବେ ଏକାଧିକ କଲରାପତରିଆ ବାଘ ଠାବ  ହେବା ଜୈବ ବିବିଧତା ପ୍ରତି ଶୁଭ ସଙ୍କେତ ବୋଲି  କୁହାଯାଉଛି । 

ଜିଲ୍ଲାର ବିଭିନ୍ନ ବନାଞ୍ଚଳରେ ବାଘଙ୍କ ନୀରବତାରୁ  ଭିନ୍ନ ଆଶଙ୍କା ସୃଷ୍ଟି ହେଉଥିଲା । ବନ ବିଭାଗ ପକ୍ଷରୁ  ସ୍ୱତନ୍ତ୍ର ଟିମ୍‌ ବାଘ ଗତିବିଧି ଉପରେ ନଜର ରଖିଥିଲା ।  ଇତିମଧ୍ୟରେ ୧ ନଭେମ୍ବରରୁ ଜାନୁଆରୀ ୩୧ ମଧ୍ୟରେ  ବ୍ୟାଘ୍ର ଗଣନା, ଡିଭିଜନସ୍ତରରେ ଗଣନା ସମ୍ପର୍କିତ ଏକତ୍ରୀକରଣ ଏବଂ ବିଶ୍ଳେଷଣ କରାଯାଇଛି । 

କଲରାପତରିଆ ସମ୍ପର୍କରେ ଡିଏଫ୍‌ଓ ଧନରାଜ  ଏଚ୍‌. ଡି. ସୂଚନା ଦେଇ କହିଛନ୍ତି, ବ୍ୟାଘ୍ର ଗଣନା  ପାଇଁ ଅଟେଇ ସଂରକ୍ଷିତ ଜଙ୍ଗଲରେ ୬୦ଟି କ୍ୟାମେରା  ଲଗାଯାଇଛି । ଏହାସହିତ ଚମ୍ପୁଆ ବନାଞ୍ଚଳରେ  ୧୫ଟି, ଜଙ୍ଘିରା ସଂରକ୍ଷିତ ଜଙ୍ଗଲରେ ୧୫ଟି,  ତେଲକୋଇ ବନାଞ୍ଚଳରେ ୧୫ଟି କ୍ୟାମେରା ଲାଗିଛି ।  କ୍ୟାମେରାରେ ଅନେକ ବିରଳ ବନ୍ୟପ୍ରାଣୀ ସହିତ  ୫ରୁ ଅଧିକ କଲରାପତରିଆ ବାଘ ଚିହ୍ନଟ ହୋଇଛି ।  ବ୍ୟାଘ୍ର ଗଣନାରେ ଏକାଧିକ ସ୍ଥାନରେ ଏବଂ ଭିନ୍ନ  ଭିନ୍ନ ପଦଚିହ୍ନ ମିଳିଥିବାରୁ କଲରାପତରିଆ ସଂଖ୍ୟା  ଆହୁରି ବଢ଼ିବା ସମ୍ଭାବନା ରହିଛି ।