ଯାଜପୁରସଦର, ୧୫/୦୯:  ଯାଜପୁରର ଅଧିଷ୍ଠାତ୍ରୀ ଦେବୀ  ମା’ବିରଜାଙ୍କ ବନଜାଗ ବିଧି ପର୍ବ ପାଳନ ହେବ।  ମନ୍ଦିର ପ୍ରଶାସନ ଓ ମୁଖ୍ୟ ପୁରୋଧାଙ୍କ ଦ୍ୱାରା ପ୍ରଦତ୍ତ ସାରଣୀ ଅନୁଯାୟୀ ରବିବାର ଅପରାହ୍ଣ ୩ଟା ୩୭  ମିନିଟ୍‌ ପରେ ଉକ୍ତ ପୂଜା ଆରମ୍ଭ କରାଯିବ । ବଳି ମଣ୍ଡପରେ ପୁରୋଧା, ପୂଜକ, ସେବାୟତଙ୍କ ଉପସ୍ଥିତିରେ  ଉକ୍ତ ପୂଜା ଆୟୋଜନ କରାଯିବ ।  

ପ୍ରଥା ଓ ପରମ୍ପରା ଅନୁଯାୟୀ ବିଭିନ୍ନ ପୂଜା କାର୍ଯ୍ୟ ପରେ ସେବାୟତମାନଙ୍କୁ  ମନ୍ଦିରର ପୁରୋଧାମାନେ ମଙ୍ଗଳାର୍ପଣ  କରିବେ । ମନ୍ଦିର ମଧ୍ୟରେ ପୂଜା କାର୍ଯ୍ୟ  ସରିବା ପରେ ପୁରୋଧା, ପୂଜକ, ଆର୍ଶାଦଣ୍ଡ, ଛତ୍ର,  ତରାଶ, ମଶାଲ ସହିତ ପୂର୍ବ ନିର୍ଦ୍ଧାରିତ ହାଟପାଟଣା  ଗ୍ରାମକୁ ଗସ୍ତ କରିବେ । ମନ୍ଦିରର ପୂଜକ ଓ ବାରିକ  ସେବାୟତ ଚିହ୍ନଟ କରାଯାଇଥିବା ହାଟପାଟଣା ଗ୍ରାମର  ଶିବ ପାତ୍ରଙ୍କ ବାଡ଼ିରେ ଥିବା ଅକ୍ଷୁର୍ଣ୍ଣ ବେଲ ଗଛକୁ  ପୂଜାର୍ଚ୍ଚନା କରାଯିବ । ପ୍ରାୟ ୨ ଘଣ୍ଟାର ପୂଜାର୍ଚ୍ଚନା ପରେ  ଉକ୍ତ ଅକ୍ଷୁର୍ଣ୍ଣ ଓ ଅଫଳନ୍ତି ବେଲଗଛରୁ  ଏକ ଡ଼ାଳ ଛେଦନ କରାଯାଇ ମନ୍ଦିର  ରଥଶାଳାରେ ରଖାଯିବ । ଯାହାକୁ  ରଥକାର୍ଯ୍ୟର ସମାପନ ପରେ  ରଥର ଅଗ୍ରଭାଗରେ ଲଗାଯାଇ ରଥ  କାର୍ଯ୍ୟ ସଂପୂର୍ଣ୍ଣ କରାଯାଇଥାଏ । ପରମ୍ପରା ଅନୁଯାୟୀ ବିଧିବଦ୍ଧ ଭାବରେ  ଚଳିତ ବର୍ଷର ଦୁର୍ଗୋତ୍ସବ ପାଇଁ  ମା’ବିରଜାଙ୍କ ରଥ ନିର୍ମାଣର ଅନୁମତି  ଦିଆଯାଇଥାଏ । ରବିବାର ସଂଧ୍ୟାରେ ଏକ  ଶୋଭାଯାତ୍ରା ସହିତ ମା’ ବିରଜାଙ୍କ  ଆର୍ଶାଦଣ୍ଡକୁ ଉକ୍ତ ସ୍ଥାନକୁ ନିଆଯିବା ପରେ ପୂଜାର୍ଚ୍ଚନା କରାଯିବ । 

ଚଳିତ  ବର୍ଷର ଦୁର୍ଗୋତ୍ସବର ଏହା ହେଉଛି  ଅୟମାରମ୍ଭ ପର୍ବ । କାଲିର ପୂଜା  କାର୍ଯ୍ୟ ପାଇଁ ପୁରୋଧା, ପୂଜକ, ସେବାୟତ ଓ  ମନ୍ଦିର ପ୍ରଶାସନ ମଧ୍ୟରେ ଆଲୋଚନା କରାଯାଇ  ନିଷ୍ପତ୍ତି ଗ୍ରହଣ କରାଯାଇଛି । ଏହି  ଶୋଭାଯାତ୍ରା ସମୟରେ ମନ୍ଦିର ପ୍ରଶାସନର ମୁଖ୍ୟ  କିମ୍ବା ତାଙ୍କ ଦ୍ୱାରା ନିଯୁକ୍ତ ଅଧିକାରୀ ଏହି ପୂଜା  କାର୍ଯ୍ୟର ତଦାରଖ ପାଇଁ ନିଷ୍ପତ୍ତି ଗ୍ରହଣ କରାଯାଇଛି ।