ଭୁବନେଶ୍ୱର,୩୦/୦୩: ଭୁବନେଶ୍ୱରର ୩ ବିଧାନସଭା ଆସନରେ ଏଯାଏଁ ଟିକଟ ଘୋଷଣା କରିନାହିଁ ବିଜେଡି । ଲୋକସଭା ପାଇଁ ପ୍ରାର୍ଥୀ ଘୋଷଣା ପରେ ବି ବିଧାନସଭାକୁ ନେଇ ଦ୍ୱନ୍ଦ୍ୱ ଛିଣ୍ଡୁନି । ତିନି ବିଧାୟକ ଟିକଟ ପାଇବାକୁ ଦୃଢ଼ ଆଶାବାଦୀ ଥିଲେ ମଧ୍ୟ ସବୁ ଆସନରେ ଦଳ ଭିତରୁ ଆଶାୟୀ ବି ମୁଣ୍ଡ ଟେକି ଟିକଟ ପାଇଁ ଲବି କରୁଛନ୍ତି । ଏମିତି ସ୍ଥିତିରେ ତିନି ବିଧାୟକଙ୍କ ପାଇଁ ସାହା ଭରସା ପାଲଟିଛନ୍ତି ଦଳୀୟ କର୍ପୋରେଟର । ନିଜ ନିର୍ବାଚନମଣ୍ଡଳୀର କର୍ପୋରେଟରମାନେ ହିଁ ଏବେ ବିଧାୟକଙ୍କ ବଳ । ଯାହା ସପକ୍ଷରେ ଯେତେ କର୍ପୋରେଟର, ତା’ ଟିକଟ ସମ୍ଭାବନା ସେତେ ଅଧିକ ବୋଲି କୁହାଯାଉଛି ।
ଏକାମ୍ରରୁ ପୁଣି ଥରେ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ଟିକଟ ପାଇଁ ପ୍ରମୁଖ ଦାବିଦାର ଅଛନ୍ତି । ଏକାମ୍ର ଟିକଟ ପାଇଁ କର୍ପୋରେଟର ବିରଞ୍ଚି ମହାସୁପକାର (ଲିଟୁ) ମଧ୍ୟ କସରତ ଚଳାଇଛନ୍ତି । ଅଶୋକଙ୍କ ସପକ୍ଷରେ ବିଜେଡି କର୍ପୋରେଟରମାନଙ୍କ ବଳ ଥିବାବେଳେ ଲିଟୁ ପୂର୍ବତନ କର୍ପୋରେଟରଙ୍କୁ ଏକାଠି କରିବାକୁ ଲାଗି ପଡ଼ିଛନ୍ତି ।
ମଧ୍ୟ ଭୁବନେଶ୍ୱରରେ ବିଜେଡି କର୍ପୋରେଟରମାନେ ବିଧାୟକ ଅନନ୍ତ ନାରାୟଣ ଜେନାଙ୍କ ଟିକଟ ପାଇଁ ଲବି କରୁଥିବା କୁହାଯାଉଛି । ଅପରପକ୍ଷରେ ମଧ୍ୟ ଭୁବନେଶ୍ୱରରୁ ଟିକଟ ଆଶାୟୀ ଥିବା କର୍ପୋରେଟର ଅମରେଶ ଜେନାଙ୍କ ସହ ବହୁ ସଂଖ୍ୟାରେ ପୂର୍ବତନ କର୍ପୋରେଟରମାନେ ସାମିଲ ହୋଇଛନ୍ତି ।
ଉତ୍ତର ଭୁବନେଶ୍ୱର ନିର୍ବାଚନମଣ୍ଡଳୀରେ ବିଧାୟକ ସୁଶାନ୍ତ ରାଉତଙ୍କୁ ପୁଣି ଥରେ ଟିକଟ ଦେବାକୁ ସମସ୍ତ ବିଜେଡି କର୍ପୋରେଟର ଦାବି କରୁଛନ୍ତି । ଉତ୍ତର ଭୁବନେଶ୍ୱର ଆସନରୁ ପୂର୍ବତନ ବିଧାୟକ ପ୍ରିୟଦର୍ଶୀ ମିଶ୍ର ବି ଆଶାୟୀ ଅଛନ୍ତି । ସମସ୍ତଙ୍କ ଲକ୍ଷ୍ୟ ହେଉଛି, ଅଧିକରୁ ଅଧିକ କର୍ପୋରେଟର ଓ ପୂର୍ବତନ କର୍ପୋରେଟରଙ୍କୁ ନିଜ ସପକ୍ଷକୁ ଟାଣିବା ପାଇଁ । ଏମିତିକି ଟିକଟ ଲବି ତେଜିବାକୁ ଆଶାୟୀମାନେ ଏବେ ନବୀନ ନିବାସ ଯାଏଁ ନିଜ ସଂଗଠନ ଦେଖାଇବାକୁ ପ୍ରୟାସ ଚଳାଇଛନ୍ତି । ଶୁକ୍ରବାର ମଧ୍ୟ ନିର୍ବାଚନମଣ୍ଡଳୀର ବହୁ କର୍ପୋରେଟର ଏକାଠି ହୋଇ ନବୀନ ନିବାସ ଯାଇଥିବା ଖବର ମିଳିଛି ।