ଗୁରୁଡ଼ଝାଟିଆ-ଚୌଦ୍ୱାର,୩୦/୦୧: ତତ୍କାଳୀନ ମନ୍ତ୍ରୀ ନବ ଦାସଙ୍କ ହତ୍ୟାକାଣ୍ଡକୁ ସୋମବାର ଏକ ବର୍ଷ ପୂରିଥିବା ବେଳେ ଝାରସୁଗୁଡ଼ାରେ ଏଥିପାଇଁ ଗଣଦୌଡ, ପ୍ରତିମୂର୍ତ୍ତି ଉନ୍ମୋଚନ ସହ ଅନ୍ୟାନ୍ୟ କାର୍ଯ୍ୟକ୍ରମ କରାଯାଇଛି । ସେହିପରି ହତ୍ୟାକାଣ୍ଡର ଆମୂଳଚୁଳ ଆଲୋଚନା, ପର୍ଯ୍ୟାଲୋଚନା ମଧ୍ୟ କରାଯାଇଛି । ଏସବୁ ଦିନ ତମାମ କିଛି ଗଣମାଧ୍ୟମରେ ପ୍ରସାର କରାଯାଇଥିଲା ଯାହାକୁ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ପୁଲିସ ଏଏସ୍ଆଇ ଗୋପାଳ ଦାସ ଚୌଦ୍ୱାର ଜେଲରେ ରହି ଟିଭିରେ ଦେଖିଛି ।
ଗୋପାଳ ଦାସ ଚୌଦ୍ୱାର ଜେଲରେ ୨୦୨୩ ମସିହା ଫେବ୍ରୁଆରୀ ୧୪ ତାରିଖରୁ ରହି ଆସୁଛି । ତାକୁ ଜେଲ୍ର ହାଇ ସିକ୍ୟୁରିଟି ୩ନଂ ସେଲରେ ରଖାଯାଉଛି । ଏହି ସେଲ୍ ସିସିଟିଭି ନଜରରେ ରହିବା ସହ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଗୋପାଳ ମଧୁମେହ ଓ ପାଇଲ୍ସ ପାଇଁ କିଛି ଔଷଧ ସେବନ କରୁଛି । ଏହାବାଦ୍ ତାର ସ୍ୱାସ୍ଥ୍ୟାବସ୍ଥା ଭଲ ଅଛି। ହେଲେ ଗୋପାଳ ସୋମବାର ଘଟଣା ଉପରେ ନଜର ରଖିଥିଲା । ସେ ଟିଭିରେ ସମସ୍ତ ଘଟଣାକୁ ଟିକିନିଖି କରି ଦେଖିଥିଲା । ସବୁ ଦିନ ଭଳି ଖାଦ୍ୟ ଖାଇଥିଲା । ଅନ୍ୟପକ୍ଷରେ ସୋମବାର ହତ୍ୟାକାଣ୍ଡର ଶୁଣାଣି ଭିଡିଓ କନଫେରେନ୍ସ ମାଧ୍ୟମରେ ହୋଇଥିବାବେଳେ ଝାରସୁଗୁଡା କୋର୍ଟରେ ୩ ଜଣ ସାକ୍ଷୀ ସେମାନଙ୍କର ବୟାନ ଦେଇଥିଲେ । ଗୋପାଳ ଚୌଦ୍ୱାର ଜେଲରେ ଭିସି ମାଧ୍ୟମରେ ଥିଲା ବୋଲି ଜେଲର୍ ଭୁବେନ୍ଦ୍ର ଭୂୟାଁ ପ୍ରକାଶ କରିଛନ୍ତି।
