କୋଟା,୨୯/୦୪: ରାଜସ୍ଥାନର କୋଚିଂ ହବ୍ କୋଟାରେ ଗୋଟିଏ ପରେ ଗୋଟିଏ ଅଘଟଣ ସାମ୍ନାକୁ ଆସିବାରେ ଲାଗିଛି । ସଦ୍ୟ ଘଟଣାରେ ଜଣେ ନିଟ୍ ଆଶାୟୀ ଛାତ୍ରୀ ନିଖୋଜ ହୋଇଯାଇଛନ୍ତି । ତାଙ୍କ ନାମ ତୃପ୍ତି ସିଂହ (୨୦) । ଘର ଉତ୍ତର ପ୍ରଦେଶର କୁଶିନଗରରେ।
ଖବର ମୁତାବକ ତୃପ୍ତି ଏପ୍ରିଲ ୨୧ରେ ପରୀକ୍ଷା ଦେବାକୁ ଯାଇଥିଲେ । ଏହାପରେ ସେ କୋଟାସ୍ଥିତ ଗୋବ୍ରିୟା ବାଭ୍ଡିଠାରେ ଥିବା ତାଙ୍କ ହଷ୍ଟେଲକୁ ଆଉ ଫେରିନାହାନ୍ତି । ଗତ ୨୩ ତାରିଖରେ ଏ ନେଇ ଥାନାରେ ଏକ ନିଖୋଜ ଅଭିଯୋଗ ହୋଇଥିଲା । କିନ୍ତୁ ପୁଲିସ ଏ ପର୍ଯ୍ୟନ୍ତ ତାଙ୍କର ଖୋଜଖବର ପାଇନାହିଁ । ଘଟଣା ବାବଦରେ ତୃପ୍ତିଙ୍କ ପରିବାର ଲୋକଙ୍କୁ ଅବଗତ କରାଯାଇଛି । ପୁଲିସ ବସ୍ ଷ୍ଟେସନ ଓ ରେଳ ଷ୍ଟେସନ ସମେତ ବିଭିନ୍ନ ସ୍ଥାନରେ ସିସିଟିଭି ଫୁଟେଜ୍ ଯାଞ୍ଚ କରି ତନାଘନା ଚଳାଇଛି ।
ଚଳିତ ସପ୍ତାହ ଆରମ୍ଭରେ ଜଣେ ୧୯ ବର୍ଷୀୟା ନିଟ୍ ଆଶାୟୀ ଆତ୍ମହତ୍ୟା କରିଥିଲେ । ଏହାକୁ ମିଶାଇ ଚଳିତବର୍ଷ ଜାନୁଆରୀରୁ କୋଟାରେ ୭ ଆତ୍ମହତ୍ୟା ଘଟଣା ସାମ୍ନାକୁ ଆସିଲାଣି । ୨୦୨୩ରେ କୋଟାରେ ୨୬ ଆତ୍ମହତ୍ୟା ମାମଲା ରେକର୍ଡ ହୋଇଥିଲ।
