କାଠମାଣ୍ଡୁ,୨୬/୦୫: ନେପାଳର ମହିଳା ପର୍ବତାରୋହୀ ତଥା ଫଟୋ ସାମ୍ବାଦିକ ପୂର୍ଣ୍ଣିମା ଶ୍ରେଷ୍ଠା ନୂଆ କୀର୍ତ୍ତିମାନ ସ୍ଥାପନ କରିଛନ୍ତି । ଦୁଇ ସପ୍ତାହ ଭିତରେ ସେ ୩ଥର ଏଭରେଷ୍ଟ ଚଢ଼ି ପ୍ରଥମ ମହିଳା ଭାବେ ଇତିହାସ ରଚିଛନ୍ତି । ପ୍ରଥମେ ମେ ୧୨ରେ ସେ ୮୮୪୮.୮୬ ମିଟର ଉଚ୍ଚ ଏଭରେଷ୍ଟ ଆରୋହଣ କରିଥିଲେ । ଏହା ପରେ ମେ ୧୯ରେ ଏବଂ ତୃତୀୟଥର ପାଇଁ ମେ ୨୫ରେ ଏଭରେଷ୍ଟ ଚଢ଼ିଥିଲେ ।
ସେ ସାମିଲ ଥିବା ପର୍ବତାରୋହୀ ଟିମ୍ ତଥା ଏଇଟ କେ ଏକ୍ସପେଡିସନ ସଂସ୍ଥାର ନିର୍ଦ୍ଦେଶକ ପେମ୍ବା ଶେରପାଙ୍କ ସୂଚନା ଅନୁସାରେ ତୃତୀୟ ଅଭିଯାନରେ ଶନିବାର ସକାଳ ୫ଟା ୫୦ରେ ପୂର୍ଣ୍ଣିମା ଏଭରେଷ୍ଟ ଶିଖରରେ ପହଞ୍ଚିଥିଲେ । ଏହାକୁ ମିଶାଇ ପୂର୍ଣ୍ଣିମା ଏପର୍ଯ୍ୟନ୍ତ ୪ଥର ମାଉଣ୍ଟ ଏଭରେଷ୍ଟ ଆରୋହଣ କରିଛନ୍ତି । ୨୦୧୮ରେ ସେ ପ୍ରଥମକରି ଏଭରେଷ୍ଟ ଚଢ଼ିଥିଲେ । ୨୦୧୭ରେ ସେ ଏଭରେଷ୍ଟ ମାରାଥନରେ ଯାଇ ବେସ୍ କ୍ୟାମ୍ପରେ ପହଞ୍ଚିଥିଲେ । ସେବେଠାରୁ ତାଙ୍କର ଏଭରେଷ୍ଟ ଚଢ଼ିବାର ଆଗ୍ରହ ପ୍ରକାଶ ପାଇଥିଲା । ସେହିବର୍ଷ ସେ ୮,୧୬୩ ମିଟର ପର୍ଯ୍ୟନ୍ତ ଏଭରେଷ୍ଟ ଚଢ଼ିଥିଲେ । ଏଭରେଷ୍ଟ ଆରୋହଣ କରି ସଫଳତା ହାସଲ କରିବା ପୂର୍ବରୁ ପୂର୍ଣ୍ଣିମା ମାନସଲୁ, ଅନ୍ନପୂର୍ଣ୍ଣା, ଧଉଳଗିରି, କାଞ୍ଚନଜଙ୍ଗା, ଲୋସେ, ମକଲୁ ଏବଂ ମାଉଣ୍ଟ କେ-୨ ଆରୋହଣ କରିଥିଲେ ।