ଫୁଲବାଣୀ,୨୧/୯ : ଫୁଲବାଣୀ ପୌର ପରିଷଦର ଅଧ୍ୟକ୍ଷାଙ୍କ ଅନାସ୍ଥା ଘଟଣାକୁ ନେଇ ଗତ ଏପ୍ରିଲ ମାସରୁ ଚାଲିଥିବା ନାଟକର ଅନ୍ତ ଘଟିଛି। ପୌରାଧ୍ୟକ୍ଷା ଅନାସ୍ଥା ଭୋଟରେ ପରାଜିତ ହେବାର ଦୁଇ ମାସ ପରେ ଶେଷରେ ରାଜ୍ୟ ସରକାରଙ୍କ ପକ୍ଷରୁ ଏ ନେଇ ବିଜ୍ଞପ୍ତି ଜାରୀ ହୋଇଛି। ସହରାଞ୍ଚଳ ବିକାଶ ବିଭାଗ ପକ୍ଷରୁ ପୌର ପ୍ରଶାସନ ନିର୍ଦ୍ଦେଶକଙ୍କ ଚିଠି ସଂଖ୍ୟା ୧୮୮୦୨/୧୯-୯-୨୪ କ୍ରମେ ଜାରୀ ଏହି ବିଜ୍ଞପ୍ତିରେ ପୌରାଧ୍ୟକ୍ଷାଙ୍କୁ ଗତ ଜୁଲାଇ ୨୩ ତାରିଖରୁ ଏହି ପଦବୀ ପାଇଁ ଅଯୋଗ୍ୟ ଘୋଷିତ କରାଯାଇଛି। ଫଳରେ ପୌର ପରିଷଦରେ ସୃଷ୍ଟି ହୋଇଥିବା ଅଚଳାବସ୍ଥା ଦୂର ହେବା ସହ  ନୂତନ ପୌରାଧ୍ୟକ୍ଷା ନିଯୁକ୍ତି ପାଇଁ ବାଟ ଫିଟିଛି।

ସୂଚନାଯୋଗ୍ୟ, ଗତ ଏପ୍ରିଲ ୧୦ ତାରିଖରେ ଫୁଲବାଣୀ ମ୍ୟୁନିସିପାଲିଟିର ୧୩ ଜଣ କାଉନସିଲରଙ୍କ ମଧ୍ୟରୁ ୧୧ ଜଣ ପୌରାଧ୍ୟକ୍ଷା ସ୍ମିତାରାଣୀ ମହାନ୍ତିଙ୍କ ବିରୋଧରେ ଅନାସ୍ଥା ପାଇଁ ଜିଲାପାଳଙ୍କୁ ଲିଖିତ ଭାବେ ଜଣାଇଥିଲେ। ଜିଲାପାଳ ୨୭ ତାରିଖରେ ଏ ନେଇ ବୈଠକ ଆହ୍ବାନ କରିଥିଲେ। ତେବେ ଏହା ବିରୋଧରେ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ ଅଧ୍ୟକ୍ଷା। ତେଣୁ ପ୍ରକ୍ରିୟା ବିଳମ୍ବିତ ହୋଇଥିଲା। ବୈଠକ ଦୁଇ ଥର ବାତିଲ ହେବା ପରେ ଶେଷରେ ଜୁଲାଇ ୨୩ ତାରିଖରେ ମତଦାନ ହୋଇ ୧୦ ଜଣ କାଉନସିଲରଙ୍କ ସମର୍ଥନରେ ଅନାସ୍ଥା ପ୍ରସ୍ତାବ ଗୃହୀତ ହୋଇଥିଲା। ତେବେ ଜିଲ୍ଲା ପ୍ରଶାସନ କିମ୍ବା ରାଜ୍ୟ ସରକାରଙ୍କ ପକ୍ଷରୁ ଏ ନେଇ କୌଣସି ବିଜ୍ଞପ୍ତି ପ୍ରକାଶ କରା ଯାଇ ନ ଥିଲା। ଫଳରେ କାଉନସିଲର ମୃତ୍ୟୁଞ୍ଜୟ ପେରା ହାଇକୋର୍ଟରେ ଏ ନେଇ ଏକ ରିଟ ପିଟିସନ ଦାଖଲ କରିଥିଲେ। ଏହାର ବିଚାର କରି  ଉଚ୍ଚ ଅଦାଲତ ସେପ୍ଟେମ୍ବର ତିନି ତାରିଖ ସୁଦ୍ଧା ବିଜ୍ଞପ୍ତି ପ୍ରକାଶ ପାଇଁ ନିର୍ଦ୍ଦେଶ ଦେଇଥିଲେ। ତେବେ ବିଳମ୍ବରେ ହେଲେ ବି ୧୯ ତାରିଖରେ ବିଜ୍ଞପ୍ତି ପ୍ରକାଶ କରିଛନ୍ତି ରାଜ୍ୟ ସରକାର।