ଭୁବନେଶ୍ୱର,୧୯/୦୯: ତାରିଖ ସ୍ଥିର । ପ୍ରସ୍ତୁତି ଶେଷ । ଅତିଥି ଆସୁଛନ୍ତି । ଆସନ୍ତା ୨୭ ତାରିଖରେ ଆସି ସିନେ ପ୍ରେକ୍ଷାଳୟରେ ପହଞ୍ଚିବେ। ପ୍ରଯୋଜନା ସଂସ୍ଥା ରିଲ୍ସ ଆଣ୍ଡ୍ ରିଲ୍ସ ବ୍ୟାନରରେ ନିର୍ମିତ ନୂଆ ଓଡ଼ିଆ ଚଳଚ୍ଚିତ୍ର ‘ଅତିଥି-ଦ ଅନ୍ୱାଣ୍ଟେଡ୍ ଗେଷ୍ଟ’ର ବୁଧବାର ସନ୍ଧ୍ୟାରେ ଟ୍ରେଲର୍ ସହିତ ଅଡିଓ ରିଲିଜ୍ ଓ ପୋଷ୍ଟର୍ ଉନ୍ମୋଚିତ ହୋଇଛି । ଯାହାକୁ ଆରମ୍ଭରୁ ଦର୍ଶକଙ୍କ ଭଲପାଇବା ସହ ପୂର୍ଣ୍ଣ ସମର୍ଥନ ମିଳିଛି । ଆଶା ଓ ଭରସା ଏ ସିନେମା ପ୍ରେକ୍ଷାଳୟରେ କିଛି ନୂଆ ଘଟଣା ଘଟାଇବ । ବୁଧବାର ମୁକ୍ତିଲାଭ ତାରିଖ ଘୋଷଣା ପରେ ଏବେ ସମସ୍ତେ ସେହି ମୂହର୍ତ୍ତର ସାଖୀ ହେବା ଅପେକ୍ଷାରେ ରହିଛନ୍ତି । ସିନେମାର ସେନ୍ସର୍ ପରେ ଜୁରିମାନେ ବହୁତ ପ୍ରଶଂସା କରିବା ସହ ୟୁ/ଏ ସାର୍ଟିଫିକେଟ୍ ମଧ୍ୟ ଦେଇଛନ୍ତି ।
ସମ୍ପୂର୍ଣ୍ଣ ନୂଆ ଶୈଳୀର ଏକ ମୌଳିକ ଓଡ଼ିଆ ସିନେମା ହେଉଛି ‘ଅତିଥି’ । ଯାହାର କଥାବସ୍ତୁରେ ୩ ଜଣ ଉଚ୍ଚଶିକ୍ଷିତ ଯୁବକ ପ୍ରତିଶୋଧ ପରାୟଣ ହୋଇ ରାଜ୍ୟର ଜଣେ ମନ୍ତ୍ରୀଙ୍କୁ ଗୁଳି କରି ହତ୍ୟା କରିଛନ୍ତି । ସେମାନେ ନିଜକୁ ବଞ୍ଚାଇବାକୁ ଯାଇ ଏକ ପରିବାରକୁ ବନ୍ଧକ ରଖିଛନ୍ତି । ଘଟଣାକୁ ଜଣେ ଦକ୍ଷ ପୁଲିସ୍ ଅଧିକାରୀ ନିଜ ଦଳ ସହ ପରିଚାଳନା କରୁଛନ୍ତି । ଶେଷରେ ସମ୍ପୃକ୍ତ ଯୁବକମାନଙ୍କ ସତ୍ୟତା ଜଣାପଡ଼ୁଛି । ବାକି କଥା ପାଇଁ ହଲ୍କୁ ଯିବାକୁ ହେବ ଏବଂ ଅତିଥିଙ୍କୁ ଆତିଥ୍ୟତା ବାଢ଼ିବାକୁ ପଡ଼ିବ । ସିନେମାରେ ପ୍ରମୁଖ ଭୂମିକାରେ ଅନୁ ଚୌଧୁରୀ, ଦିବ୍ୟାଦିଶା ମହାନ୍ତି, ମନୋଜ ମିଶ୍ର, ସାୟଲ ମୂଖାର୍ଜୀ, ଶ୍ରୁତି ଶୁଭଶ୍ରୀ, ଚିନ୍ମୟ ମିଶ୍ର, ଅଭିଷେକ ଗିରି, ଦୀପନ୍ୱିତ ଦାଶ ମହାପାତ୍ର, ଜୀବନ ପଣ୍ଡା, ସୁକାନ୍ତ ରଥ, ପ୍ରସନ୍ନଜିତ୍ ମହାପାତ୍ର, ବିଘ୍ନେଶ ପଣ୍ଡା, ପ୍ରସିଦ୍ଧି ଓ ସର୍ବେଶ୍ୱର ସୂତାର ପ୍ରମୁଖ ଅଭିନୟ କରିଛନ୍ତି । ସମସ୍ତଙ୍କ ଅଭିନୟ ଟ୍ରେଲର୍ରେ ପସନ୍ଦ ଆସୁଛି, କିନ୍ତୁ ବାକି କଥା ସିନେମା ପରେ ଜଣାପଡ଼ିବ ।
ଏଥିରେ ୩ଟି ଗୀତ ରହିଛି । ପ୍ରଥମ ଗୀତ ‘ତୁ ମୋ ପଲକର ଛାଇ’କୁ ଲେଖିଛନ୍ତି ରାକେଶ ଦାଶ, ଗାଇଛନ୍ତି କୁଲଦୀପ ପଟ୍ଟନାୟକ ଓ ସଞ୍ଚିତା ଶୁଭଦର୍ଶିନୀ । ଦ୍ୱିତୀୟ ଗୀତ ‘ଅଜଣା ଅତିଥି’କୁ ଲେଖିଛନ୍ତି ସ୍ଥିତ ପଟ୍ଟନାୟକ, ଗାଇଛନ୍ତି ହ୍ୟୁମାନ୍ ସାଗର ଓ ଅର୍ପିତା ଚୌଧୁରୀ । ଗୀତ ଦୁଇଟିକୁ ସଙ୍ଗୀତରେ ସଜାଇଛନ୍ତି ସୋମେଶ ଶତପଥୀ । ତୃତୀୟ ଗୀତ ‘ରାତି ସରେ’କୁ ଲେଖିଛନ୍ତି ସୁମିତ ପଣ୍ଡା, ଗାଇଛନ୍ତି ବିରାଜ ରଥ । ସଙ୍ଗୀତ ବୁନ୍ନି ମହାନ୍ତି ଦେଇଥିଲାବେଳେ ଶ୍ରୁତି ପ୍ରକାଶ ଦାଶ ସଂଯୋଜନା କରିଛନ୍ତି । ଗୀତଗୁଡ଼ିକ ବି ବହୁତ ମନଛୁଆଁ ହୋଇଛି । ଏହାର ଚିତ୍ରନାଟ୍ୟ ପ୍ରସ୍ତୁତି ସାଙ୍ଗକୁ ସଂଳାପ ଲେଖିଛନ୍ତି ରବିନାରାୟଣ ଦାସ । କାହାଣୀ ରଚନା କରିଛନ୍ତି ମାନସ ପଢ଼ିଆରୀ । ନିର୍ଦ୍ଦେଶନା ଦେଇଛନ୍ତି ଅଜୟ ପାଢ଼ୀ । ପ୍ରଥମ ଥର ଓଡ଼ିଆ ସିନେମା ପ୍ରଯୋଜନାରେ ସ୍ଥିତ ପଟ୍ଟନାୟକ ପ୍ରବେଶ କରିଥିଲାବେଳେ ସହ ପ୍ରଯୋଜନାରେ ସହାୟତା କରିଛନ୍ତି ପ୍ରତିମା ପଟ୍ଟନାୟକ ।
