ଭୁବନେଶ୍ୱର,୦୯/୦୬: କିଏ ହେବେ ରାଜ୍ୟର ନୂଆ ମୁଖ୍ୟମନ୍ତ୍ରୀ । କାହା ମୁଣ୍ଡରେ ସୁନାକଳସ ଢାଳିବ ବିଜେପିର ସଂସଦୀୟ ବୋର୍ଡ? ବିଜେପିର ମୁଖ୍ୟମନ୍ତ୍ରୀ ଚେହେରାକୁ ସସ୍ପେନ୍ସ ଲାଗି ରହିଛି । ମୁଖ୍ୟମନ୍ତ୍ରୀ ଚୟନ ପାଇଁ ଦିଲ୍ଲୀରେ ମାରାଥନ୍ ବୈଠକ ଚାଲିଛି । ସଂସଦୀୟ ବୋର୍ଡ ନିଷ୍ପତ୍ତି ପରେ ହିଁ ୧୦ ତାରିଖ ସକାଳେ ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରାଯିବ । ସନ୍ଧ୍ୟାରେ ଶପଥ ନେବେ । ମୁଖ୍ୟମନ୍ତ୍ରୀଙ୍କ ସମେତ ଦୁଇ ଉପ ମୁଖ୍ୟମନ୍ତ୍ରୀ ଓ ମନ୍ତ୍ରୀମଣ୍ଡଳର ସଦସ୍ୟମାନେ ଏହି ସମାରୋହରେ ଶପଥ ନେବେ ବୋଲି ସୂଚନା ମିଳିଛି ।
ରାଜ୍ୟ ବିଜେପି ସଭାପତି ମନମୋହନ ସାମଲ, ବିରୋଧୀ ଦଳ ନେତା ଜୟନାରାୟଣ ମିଶ୍ର, ପୃଥ୍ୱୀରାଜ ହରିଚନ୍ଦନଙ୍କ ସମେତ ଅନେକ ବିଧାୟକ ଓ ସବୁ ସାଂସଦ ଗତ ଦୁଇ ଦିନ ଧରି ଦିଲ୍ଲୀରେ ଥିଲେ । ଗୃହମନ୍ତ୍ରୀ ଅମିତ୍ ଶାହ ଓ ରାଷ୍ଟ୍ରୀୟ ସଭାପତି ଜେପି ନଡ୍ଡାଙ୍କ ସହ ଓଡ଼ିଶା ନେତାଙ୍କର ଆଲୋଚନା ହୋଇଛି । ଏଥିରେ ମୁଖ୍ୟମନ୍ତ୍ରୀ ପ୍ରାର୍ଥୀ କିଏ ହେବେ, ତାହା ଚୂଡ଼ାନ୍ତ ହୋଇସାରିଥିବା କୁହାଯାଉଛି । ସଂସଦୀୟ ବୋର୍ଡ ଏହି ନାଁ ଉପରେ ମୋହର ମାରିବା ପରେ ଏହା ଘୋଷଣା କରାଯିବ ବୋଲି ବିଜେପି ସୂତ୍ରରୁ ଜଣାପଡ଼ିଛି ।
ଏନ୍ଡିଏ ବୈଠକରେ ସାମିଲ ପରେ ରାଜ୍ୟ ସଭାପତି ମନମୋହନ ସାମଲ ଆଜି ଦିଲ୍ଲୀରୁ ଭୁବନେଶ୍ୱର ଫେରିଛନ୍ତି । ନୂଆ ମୁଖ୍ୟମନ୍ତ୍ରୀ ସମ୍ପର୍କରେ ସୂଚନା ଦେଇ ସେ କହିଛନ୍ତି, ଆଉ ଦୁଇ ଦିନ ଧୈର୍ଯ୍ୟ ରଖନ୍ତୁ । ସଂସଦୀୟ ବୋର୍ଡରେ ଆଲୋଚନା ପରେ ମୁଖ୍ୟମନ୍ତ୍ରୀଙ୍କ ନାଁ ଘୋଷଣା କରାଯିବ । ସଂସଦୀୟ ବୋର୍ଡରେ ଅନେକ ଅନୁଭବୀ ନେତା ଅଛନ୍ତି । ସେମାନେ ଆମ ରାଜ୍ୟର ମଣ୍ଡଳ ସ୍ତରୀୟ ନେତାଙ୍କୁ ବି ଜାଣନ୍ତି ।
ଓଡ଼ିଶାର ସରକାର କେମିତି ହେବ, ମନ୍ତ୍ରୀମଣ୍ଡଳର ରୂପରେଖ କ’ଣ ରହିବ, ସେମାନେ ଏହା ନିଷ୍ପତ୍ତି ନେବେ । ମନ୍ତ୍ରୀମଣ୍ଡଳର ସଦସ୍ୟ ସମ୍ପର୍କରେ ବି ସଂସଦୀୟ ବୋର୍ଡ ନିଷ୍ପତ୍ତି ନେବ । ୧୦ ତାରିଖରେ ଜନତା ମଇଦାନ ଏକ ଐତିହାସିକ ମୁହୂର୍ତ୍ତର ସାକ୍ଷୀ ହେବ । ସେହିଦିନ ସନ୍ଧ୍ୟାରେ ଓଡ଼ିଆ ଅସ୍ମିତାର ପ୍ରତିଫଳନ ହେବ ବୋଲି ମନମୋହନ କହିଛନ୍ତି । ମୁଖ୍ୟମନ୍ତ୍ରୀ ହେବା ନେଇ ତାଙ୍କ ନାଁକୁ ନେଇ ଚର୍ଚ୍ଚା ହେଉଥିବା ପ୍ରଶ୍ନର ଉତ୍ତର ରଖି ମନମୋହନ ଗଣମାଧ୍ୟମକୁ କହିଛନ୍ତି, ମୁଁ ଆଦୌ କୌଣସି ରେସ୍ରେ ନାହିଁ । ସଂସଦୀୟ ବୋର୍ଡ ଯାହା ନାଁ ଉପରେ ନିଷ୍ପତ୍ତି ନେବ ସେ ମୁଖ୍ୟମନ୍ତ୍ରୀ ହେବେ ।
ଦଳର ରାଜ୍ୟ ସଭାପତି ଭାବେ ମୁଁ ମୋ ଦାୟିତ୍ୱ ତୁଲାଉଛି । ଆମ ଦଳର ଅଗଣିତ କାର୍ଯ୍ୟକର୍ତ୍ତା ଅଜସ୍ର ପରିଶ୍ରମ କରିଛନ୍ତି । ପ୍ରଧାନମନ୍ତ୍ରୀ ମୋଦି ବି ବହୁତ ପରିଶ୍ରମ କରିଛନ୍ତି । ସମସ୍ତଙ୍କ ପାଇଁ ଏହି ଅଭୂତପୂର୍ବ ସଫଳତା ପାଇଛି । ଶପଥ ଗ୍ରହଣ ସମାରୋହରେ ପ୍ରଧାନମନ୍ତ୍ରୀଙ୍କ ସମେତ ଅନ୍ୟ ରାଜ୍ୟର ମୁଖ୍ୟମନ୍ତ୍ରୀ ଯୋଗ ଦେବେ । ସାହିତ୍ୟ, କଳା ଓ ସଂସ୍କୃତି କ୍ଷେତ୍ରର କ୍ଷେତ୍ରର ବିଶିଷ୍ଟ ବ୍ୟକ୍ତିଙ୍କୁ ନିମନ୍ତ୍ରିତ କରାଯିବ । ସବୁ କ୍ଷେତ୍ରର ଲୋକ ଏହି ସମାରୋହରେ ସାମିଲ ହେବେ । ଆମ ଦଳର କାର୍ଯ୍ୟକର୍ତ୍ତାମାନେ ବି ଆସିବେ ବୋଲି ସେ କହିଛନ୍ତି ।
ମୁଖ୍ୟମନ୍ତ୍ରୀ ପ୍ରାର୍ଥୀ ରେସ୍ରେ ସବୁଠୁ ଆଗରେ ଅଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ବିଜେପି ରାଜ୍ୟ ସଭାପତି ମନମୋହନ ସାମଲ, ବିଧାୟକ ମୋହନ ମାଝି, କନକ ବର୍ଦ୍ଧନ ସିଂହଦେଓ, ସୁରେଶ ପୂଜାରୀଙ୍କ ନାଁ ବି ଚର୍ଚ୍ଚାରେ ଅଛି । ସଂସଦୀୟ ବୋର୍ଡରେ ଆଲୋଚନା ପରେ ମୁଖ୍ୟମନ୍ତ୍ରୀଙ୍କ ନାଁ ଉପରେ ଚୂଡ଼ାନ୍ତ ମୋହର ମରାଯିବ ।
୧୦ ତାରିଖ ବା ସୋମବାର ଦିନ ୧୦ଟାରେ ବିଜେପିର ବିଧାୟକ ଦଳ ବୈଠକ ବସିବ । ଦଳର ଦୁଇ ଜଣ କେନ୍ଦ୍ରୀୟ ପର୍ଯ୍ୟବେକ୍ଷକ ବୈଠକରେ ସାମିଲ ହେବେ । ବିଧାୟକ ଦଳ ବୈଠକରେ ଔପଚାରିକ ଆଲୋଚନା ପରେ ସଂସଦୀୟ ବୋର୍ଡ ପଠାଇଥିବା ନାଁ ଘୋଷଣା ହେବ । ୧୧ଟା ସୁଦ୍ଧା ରାଜ୍ୟପାଳଙ୍କ ପାଖକୁ ନୂଆ ମୁଖ୍ୟମନ୍ତ୍ରୀଙ୍କ ନାଁ ପଠାଯିବ ବୋଲି ସୂଚନା ମିଳିଛି । ଏହାପରେ ଗଣମାଧ୍ୟମକୁ ସୂଚନା ଦିଆଯିବ । ସେପଟେ ଶପଥ ଗ୍ରହଣ ସମାରୋହ ପାଇଁ ଜନତା ମଇଦାନରେ ଜୋରଦାର ପ୍ରସ୍ତୁତି ଚାଲିଛି । ପ୍ରାୟ ୩୦ହଜାରରୁ ୪୦ ହଜାର ଲୋକ ଏଥିରେ ସାମିଲ ହେବେ । ପ୍ରଧାନମନ୍ତ୍ରୀ ଯୋଗ ଦେବାର ଥିବାରୁ ପୂରା ପଡ଼ିଆ ଏସ୍ପିଜି ସୁରକ୍ଷା ବଳୟରେ ରହିବ । ଶପଥ ଗ୍ରହଣ ସମାରୋହକୁ ଭଲରେ ଆୟୋଜନ କରିବାକୁ ପ୍ରାୟ ୨୫୦ ଅଫିସରଙ୍କୁ ଓଏସ୍ଡି ଭାବେ ସ୍ୱତନ୍ତ୍ର ଦାୟିତ୍ୱ ଦିଆଯାଇଛି । ନିମନ୍ତ୍ରିତ ଅତିଥିଙ୍କୁ ସ୍ୱାଗତ ଓ ସି-ଅଫ୍ଠାରୁ ନେଇ ମଞ୍ଚ ପରିଚାଳନା, ଖାଦ୍ୟପେୟ ଓ ପୂରା କାର୍ଯ୍ୟକ୍ରମର ତଦାରଖ ପାଇଁ ଅଲଗା ଅଲଗା ପ୍ରଶାସନିକ ଅଧିକାରୀଙ୍କୁ ଦାୟିତ୍ୱ ବଣ୍ଟାଯାଇଛି । ନିଜେ ମୁଖ୍ୟ ଶାସନ ସଚିବ ଓ ପୁଲିସ ଡିଜି ସମସ୍ତ ଆୟୋଜନକୁ ତଦାରଖ କରୁଛନ୍ତି ।
