ମୁମ୍ବାଇ,୮।୨: ଲୋକସଭା ନିର୍ବାଚନ ୨୦୨୪ର ପ୍ରସ୍ତୁତି ଭିତରେ ଇଣ୍ଡିଆ ମେଣ୍ଟର ମସସ୍ୟା ବଢିବାରେ ଲାଗିଛି। ପ୍ରଥମେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ବିଜେପି ସହ ମେଣ୍ଟ କରି ‘ଇଣ୍ଡିଆ’କୁ ଝଟକା ଦେଇଥିଲେ। ଏବେ ମହାରାଷ୍ଟ୍ରରେ ବିରୋଧି ମହାମେଣ୍ଟର ଛୋଟ ଏକ ପାର୍ଟନର ଥିବା ପ୍ରକାଶ ଆମ୍ବେଦକର ବିରୋଧିଙ୍କ ମେଣ୍ଟ ପାଇଁ ମୁଣ୍ଡବିନ୍ଧାର କାରଣ ପାଲଟିଛନ୍ତି। ପ୍ରକାଶ ହେଉଛନ୍ତି ଭାରତୀୟ ସମ୍ବିଧାନର ପ୍ରତିଷ୍ଠାତା ଭୀମରାଓ ଆମ୍ବେଦକରଙ୍କ ନାତି। ସେ ଗତ ମାସ ମହାରାଷ୍ଟ୍ରର ମହାବିକାଶ ଅଘାଡି(MVA) ସହିତ ହାତ ମିଳିଥିଲେ। ସାଧାରଣ ନିର୍ବାଚନ ପୂର୍ବରୁ ସେ ମେଣ୍ଟ ନିକଟରେ ୨୫ଟି ଦାବିର ଲମ୍ବା ଲିଷ୍ଟ ରଖିଥିଲେ।
ପ୍ରକାଶ ଆମ୍ବେଦକରଙ୍କ ପାର୍ଟି ବଞ୍ଚିତ ବହୁଜନ ଅଘାଡି (BBA) ନିକଟରେ ମୁମ୍ବାଇରେ ଏକ କାର୍ଯ୍ୟକ୍ରମ ବେଳେ ଏମବିଏ ସହିତ ମେଣ୍ଟ ନେଇ ଘୋଷଣା କରିଥିଲା। ଏବେ ସେ ମେଣ୍ଟ ନିକଟରେ ନିଜର ୨୫ଟି ଦାବି ଉପସ୍ଥାପିତ କରିଛନ୍ତି, ଯେଉଁଥିରେ ସେ ଜାତିଗତ ଜନଗଣନା ବ୍ୟତୀତ ଲୋକସଭା ଓ ବିଧାନସଭାରେ ଓବିସି ପାଇଁ ସଂରକ୍ଷିତ ସିଟ୍ ମଧ୍ୟ ଦାବି କରୁଛନ୍ତି।
ଆମ୍ବେଦକର ମହାମେଣ୍ଟ ସହିତ ଆଗାମୀ ବୈଠକ ପୂର୍ବରୁ ନିଜ ଦାବିକୁ ପୁରା କରିବାର ବିଶ୍ବାସ ପ୍ରକାଶ କରିଥିଲେ। ତାଙ୍କ ଦାବୀ ଭିତରେ ସାମାଜିକ ନ୍ୟାୟ, କୃଷି, ଭୂମି ସୁଧାର ଆଦି ପ୍ରସଙ୍ଗ ରହିଛି। ଆମ୍ବେଦକରଙ୍କ କହିବା ଅନୁସାରେ, ବିବିଏ ପୂବଁରୁ ହିଁ ନିଜର ଆଭିମୁଖ୍ୟ ସ୍ପଷ୍ଟ କରିସାରିଛି ଯେ, ମରାଠାଙ୍କ ପାଇଁ ଅଲଗା କୋଟା ହେବା ଦରକାର ଓ ତାଙ୍କୁ ଓବିସି କୋଟାରୁ ସଂରକ୍ଷଣ ଦିଆନଯିବା ଦରକାର। ଏହାଛଡା ଜାତି ଜନଗଣନା ହେବା ଦରକାର। ଆମେ ସଂସଦ ଓ ବିଧାନସଭାରେ ମଧ୍ୟ ଓବିସି ପାଇଁ ସଂରକ୍ଷିତ ଆସନ ଦାବି କରୁଛୁ।’