ଚଣ୍ଡୀଗଡ,୪।୬: ୭ଟି ପର୍ଯ୍ୟାୟରେ ହୋଇଥିବା ଲୋକସଭା ନିର୍ବାଚନର ଫଳାଫଳ ଆଜି ଘୋଷିତ ହୋଇଯିବ। କିଛି ଘଣ୍ଟା ପରେ ସ୍ଥିତି ହୋଇଯିବ ସ୍ପଷ୍ଟ। ସାରା ଦେଶରରେ ୫୪୨ ଟି ଆସନରେ ଭୋଟ ଗଣତି ସକାଳ ୮ଟାରୁ ଆରମ୍ଭ ହୋଇଛି। ତେବେ ଏପର୍ଯ୍ୟନ୍ତ ପଞ୍ଜାବର ୧୩ଟି ଆସନରୁ ୭ଟିରେ କଂଗ୍ରେସ ଆଗୁଆ ଚାଲିଛି। ରାଜ୍ୟରେ ଶାସକ ଦଳ ଆମ ଆଦମୀ ପାର୍ଟି ୩ଟି ଆସନରେ, ଶିରୋମଣି ଅକାଳୀ ଦଳ ଗୋଟିଏ ଆସନରେ ଆଗୁଆ ରହିଛି। ଖଣ୍ଡୁର ସାହିବ ଆସନରୁ ଖଲିସ୍ତାନୀ ନେତା ଅମୃତପାଲ ସିଂହ ଆଗରେ ଥିବାର ଜଣାପଡିଛି।
ପଞ୍ଜାବରେ ସାଧାରଣ ନିର୍ବାଚନର ଅନ୍ତିମ ପର୍ଯ୍ୟାୟରେ ୧ ଜୁନ୍ରେ ଭୋଟିଂ ହୋଇଥିଲା। ଏହି ସମୟରେ ୬୨.୮୦% ମତଦାନ ରେକର୍ଡ କରାଯାଇଛି। ପଞ୍ଜାବରେ ବିଜେପି, କଂଗ୍ରେସ, ଆମ ଆଦମୀ ପାର୍ଟି ଓ ଶିରୋମଣି ଅକାଳୀ ଦଳ ଭିତରେ ଗୁରୁତ୍ବପୂର୍ଣ୍ଣ ମୁକାବିଲା ଚାଲିଛି। ଦିଲ୍ଲୀରେ ଲୋକସଭା ଆସନରେ ନିର୍ବାଚନ ଲଢୁଥିବା ଇଣ୍ଡିଆ ମେଣ୍ଟର ସଦସ୍ୟ କଂଗ୍ରେସ ଓ ଆମ ଆଦମୀ ପାର୍ଟି ପଞ୍ଜାବରେ ଅଲଗା ଭାବରେ ଲଢୁଛି।
