ନୂଆଦିଲ୍ଲୀ: କଂଗ୍ରେସ ନେତା ରାହୁଲ ଗାନ୍ଧୀ ଏକ ସପ୍ତାହ ପାଇଁ ୟୁରୋପ ଗସ୍ତରେ ଯାଇଛନ୍ତି । ସେଠାରେ ସେ ୟୁରୋପୀୟ ସଂଘ (EU)ର ସଂସଦୀୟ ସଦସ୍ୟ, ଛାତ୍ର ଏବଂ ପ୍ରବାସୀ ଭାରତୀୟ ମାନଙ୍କୁ ଭେଟିବେ । ସୂତ୍ରରୁ ପ୍ରକାଶ ଯେ, ରାହୁଲ ଗାନ୍ଧୀ ସେପ୍ଟେମ୍ବର ୭ ରେ ବ୍ରୁସେଲ୍ସରେ ୟୁରୋପୀୟ ସଂଘର ସାଂସଦଙ୍କୁ ଭେଟିବେ । ଏହା ପରେ ସେ କିଛି ପ୍ରବାସୀ ଭାରତୀୟ (NRI) ଙ୍କ ସହିତ ରାତ୍ରୀ ଭୋଜନରେ ସାମିଲ ହେବେ । 

 ନ୍ୟୁଜ୍ ଏଜେନ୍ସି ପିଟିଆଇ ଅନୁଯାୟୀ, ରାହୁଲ ଗାନ୍ଧୀ ଆଗାମୀ ଦିନ ଅର୍ଥାତ୍ ସେପ୍ଟେମ୍ବର ୮ ରେ କିଛି ଭାରତୀୟ ଉଦ୍ୟୋଗପତିଙ୍କ ସହ ଏକ ବୈଠକ କରିବେ ଏବଂ ଦିନ ପ୍ରାୟ ସାଢେ ୧ ଟା ସମୟରେ ବ୍ରୁସେଲ୍ସରେ ଏକ ସାମ୍ବାଦିକ ସମ୍ମିଳନୀ କରିବେ । ଏହା ପରେ କଂଗ୍ରେସ ନେତା ପ୍ୟାରିସ ଯିବେ, ଯେଉଁଠାରେ ସେ ଆଉ ଏକ ସାମ୍ବାଦିକ ସମ୍ମିଳନୀ କରିବେ । 

 ସାମ୍ବାଦିକ ସମ୍ମିଳନୀ ସମାପ୍ତ କରିବାର ପରଦିନ ଅର୍ଥାତ ସେପ୍ଟେମ୍ବର ୯ ରେ, ରାହୁଲ ଗାନ୍ଧୀ ଫ୍ରାନ୍ସର ସାଂସଦ ମାନଙ୍କ ସହ ଆଲୋଚନା କରିବେ ଏବଂ ସାଇନ୍ସ ପୋ ୟୁନିଭରସିଟିର ଛାତ୍ରମାନଙ୍କ ସହ କଥାବାର୍ତ୍ତା କରିବେ । ସୂତ୍ରରୁ ପ୍ରକାଶ ଯେ ରାହୁଲ ସେପ୍ଟେମ୍ବର ୧୦ରେ ନେଦରଲ୍ୟାଣ୍ଡ ଯିବେ । ସେଠାରେ ସେ ୪ ଶହ ବର୍ଷ ପୁରୁଣା ଲେଡେନ ୟୁନିଭରସିଟି ପରିଦର୍ଶନ କରିବେ ଏବଂ ଛାତ୍ରମାନଙ୍କ ସହିତ ଯୋଗାଯୋଗ କରିବେ । 

 ରାହୁଲ ଗାନ୍ଧୀ ସେପ୍ଟେମ୍ବର ୧୧ ରେ ନରୱେ ଗସ୍ତ କରିବେ । ସେଠାରେ ସେ ଓସଲୋରେ ଦେଶର ସାଂସଦମାନଙ୍କୁ ଭେଟିବେ । ସେ ପ୍ରବାସୀ ମାନଙ୍କୁ ଭେଟି ଓସଲୋ ୟୁନିଭରସିଟିରେ ଏକ ସଭାରେ ଅଂଶଗ୍ରହଣ କରିବେ । ଜଣେ ବରିଷ୍ଠ ନେତା କହିଛନ୍ତି ଯେ ରାହୁଲଙ୍କ ପାଇଁ ଇଣ୍ଡିଆନ ଓଭରସିଜ୍ କଂଗ୍ରେସ କାର୍ଯ୍ୟକ୍ରମ ଆୟୋଜନ କରୁଛି । ଜି -20 ଶିଖର ସମ୍ମିଳନୀ ସମାପ୍ତ ହେବାର ଗୋଟିଏ ଦିନ ପରେ ସେ ସେପ୍ଟେମ୍ବର ୧୨ ରାତିରେ ଦିଲ୍ଲୀ ଫେରିବାର କାର୍ଯ୍ୟକ୍ରମ ରହିଛି ।