କୋଲକାତା,୨୫/୦୨: ସମଲିଙ୍ଗୀ ସମ୍ପର୍କକୁ ନେଇ ଟଣାଓଟରା । ବିଳମ୍ବିତ ରାତିରେ ଶ୍ମଶାନ ପରିସରକୁ ଡାକି ବାନ୍ଧବୀର ଗଳା କାଟିଲା ବାନ୍ଧବୀ । ଯୁବତୀଙ୍କୁ ଗୁରୁତର ଅବସ୍ଥାରେ ରାୟଗଞ୍ଜ ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ଶନିବାର ସକାଳ ପର୍ଯ୍ୟନ୍ତ ପୀଡିତାଙ୍କ ପରିବାର ପକ୍ଷରୁ ରାୟଗଞ୍ଜ ଥାନାରେ କୌଣସି ଅଭିଯୋଗ କରାଯାଇ ନାହିଁ । ତେବେ ପୁଲିସ ଘଟଣା ଉପରେ ନଜର ରଖିଛି ।
ଆହତ ତରୁଣୀ ରାୟଗଞ୍ଜ ସହରର ଶକ୍ତିନଗର ଅଞ୍ଚଳର ବାସିନ୍ଦା । ସ୍ଥାନୀୟ କୁମାରଡାଙ୍ଗୀ ଅଞ୍ଚଳରେ ଏକ ରେଷ୍ଟୁରାଣ୍ଟ କର୍ମୀ । ସେ ଜଣେ ଯୁବକଙ୍କୁ ବିବାହ କରିଥିଲେ । ତେବେ ପାଞ୍ଚ ବର୍ଷ ପୂର୍ବେ ସେ ତାଙ୍କ ସ୍ୱାମୀଙ୍କ ପରିବାର ଛାଡିଥିଲେ । ତିନି ବର୍ଷ ପୂର୍ବେ ସେ ରାଜବିହାରୀ ବଜାର ଅଞ୍ଚଳର ଅଷ୍ଟମୀ ସାହା ନାମକ ଜଣେ ଯୁବତୀଙ୍କ ସହ ସୋସିଆଲ ମିଡିଆରେ ଆଳାପ ହୁଏ । ଧୀରେ ଧୀରେ ବନ୍ଧୁତା ସୃଷ୍ଟି ହୁଏ । ଘନିଷ୍ଠତା ଧୀରେ ଧୀରେ ବୃଦ୍ଧି ପାଏ । ଦୁଇ ଯୁବତୀ ଘର ବାନ୍ଧିବାର ସ୍ୱପ୍ନ ଦେଖିଲେ । ତେବେ ଦୁହେଁ ପରିବାର ସଦସ୍ୟଙ୍କ ବାରମ୍ବାର ବାଧାବିଘ୍ନର ସମ୍ମୁଖୀନ ହୋଇଥିଲେ । କିନ୍ତୁ ସମ୍ପର୍କ ଛାଡିବାକୁ କେହି ଭାବି ପାରିନଥିଲେ ।
ଆହତ ତରୁଣୀ ଦାବି କରିଛନ୍ତି, ମୋ ବାନ୍ଧବୀ ମୋତେ ବହୁତ ଭଲ ପାଆନ୍ତି । ଆମେ ପରସ୍ପର ବିନା ବଞ୍ଚିପାରିବୁ ନାହିଁ । ଆମେ ଅନଲାଇନରେ ଆଳାପ ହେବା ପରଠାରୁ ଅଧିକାଂଶ ଦିନ ଏକାଠି ରହିଛୁ । କିନ୍ତୁ ରାତିରେ ମୁଁ ବାନ୍ଧବୀଙ୍କ ଫୋନ ପାଇ ରାସବିହାରୀ ମାର୍କେଟରେ ଥିବା ତାଙ୍କ ଘରକୁ ଯାଇଥିଲି । ଗଳ୍ପ କରି କରି ସାମ୍ନାରେ ଥିବା ଶ୍ମଶାନରେ ପହଞ୍ଚିବା ପରେ ସେ ମୋତେ ତୀକ୍ଷ୍ମ ଅସ୍ତ୍ରରେ ଗଳାରେ ଆଘାତ ଦେଇଥିଲେ । ଏହାପରେ ମୋର କିଛି ମନେ ନାହିଁ । ଜ୍ୱାଇଁ ଶଙ୍କର ମଣ୍ଡଳ ଡାକ୍ତରଖାନାକୁ ଆଣିଥିଲେ । ଆହତ ତରୁଣୀ ତଥାପି ବିଶ୍ୱାସ କରିପାରୁ ନାହିଁ ଯେ ତାଙ୍କ ବାନ୍ଧବୀ ଏହା କରିଛନ୍ତି । ଶୁକ୍ରବାର ରାତିରେ ଏହି ଘଟଣା ପରଠାରୁ ଅଭିଯୁକ୍ତ ବାନ୍ଧବୀ ଅଷ୍ଟମୀ ସାହାଙ୍କୁ ମିଳୁ ନାହାଁନ୍ତି ।
