ନୂଆଦିଲ୍ଲୀ,୦୭/୧୧: ସାରା ଦେଶରେ ବାଣ ଫୁଟାଇବା ଉପରେ ପ୍ରତିବନ୍ଧକ ଲାଗୁ କରିବା ନେଇ କରାଯାଇଥିବା ଆବେଦନର ମଙ୍ଗଳବାର ସୁପ୍ରିମକୋର୍ଟରେ ଶୁଣାଣି ହୋଇଛି। ଏହାରି ଭିତରେ ସୁପ୍ରିମକୋର୍ଟ ପ୍ରଦୂଷଣକୁ ନେଇ ଉଦ୍ବେଗ ପ୍ରକାଶ କରିଥିଲେ। କୋର୍ଟ କହିଛନ୍ତି, ଆଜିକାଲି କେବଳ ପିଲାମାନେ ନୁହଁନ୍ତି ବରଂ ବୟସ୍କମାନେ ମଧ୍ୟ ବାଣ ଫୁଟାଉଛନ୍ତି। ଏକ ଭୁଲ ଧାରଣା ରହିଛି ଯେ, ଯେତେବେଳେ ପରିବେଶ ପ୍ରସଙ୍ଗରେ କଥା ଉଠେ, ସେତେବେଳେ ଏହା କେବଳ କୋର୍ଟର ଦାୟିତ୍ବ ହୋଇଯାଏ। ଲୋକଙ୍କୁ ସମ୍ବେଦନଶୀଳ କରାଯିବା ଆବଶ୍ୟକ। ପାର୍ବଣ ଋତୁରେ ପ୍ରଦୂଷଣକୁ ନିୟନ୍ତ୍ରଣ କରିବାର ଆବଶ୍ୟକତା ରହିଛି। ବଢ଼ୁଥିବା ପ୍ରଦୂଷଣକୁ ରୋକିବା ପାଇଁ ଉପଯୁକ୍ତ ପଦକ୍ଷେପ ନେବାକୁ ସୁପ୍ରିମକୋର୍ଟ ରାଜସ୍ଥାନ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ଅଦାଲତ ସ୍ପଷ୍ଟ କରିଛନ୍ତି ଯେ ସବୁଜ ବାଣ ବିକ୍ରୟ ଉପରେ ଏହାର ଆଦେଶ ସମଗ୍ର ଦେଶରେ ପ୍ରଯୁଜ୍ୟ ହେବ। ସୂଚନାଥାଉକି ଭାରତରେ ବାଣ ବିକ୍ରି, କିଣିବା ଏବଂ ବାଣ ଫୁଟାଇବା ଉପରେ ପ୍ରତିବନ୍ଧକ ଲଗାଇବାକୁ ହୋଇଥିବା ଆବେଦନ ଉପରେ ସୁପ୍ରିମକୋର୍ଟ ଶୁଣାଣି କରୁଛନ୍ତି। ଏହା ଉପରେ ଆବେଦନକାରୀ କହିଛନ୍ତି ଯେ ଏହି ଆବେଦନ ରାଜସ୍ଥାନ ରାଜ୍ୟ ସହ ଜଡିତ।
ଜଷ୍ଟିସ୍ ଏସ୍ ବୋପାନ୍ନା କହିଛନ୍ତି ଯେ ଆମେ କହିବୁ ଯେ, ରାଜସ୍ଥାନ ରାଜ୍ୟ ଆମର ପୂର୍ବ ଆଦେଶ ପ୍ରତି ଧ୍ୟାନ ଦେବା ଆବଶ୍ୟକ। ବିଶେଷ କରି ପାର୍ବଣ ଋତୁରେ ବାୟୁ ପ୍ରଦୂଷଣକୁ ହ୍ରାସ କରିବା ପାଇଁ ପଦକ୍ଷେପ ଗ୍ରହଣ କରାଯିବା ଉଚିତ୍। କୌଣସି ଅତିରିକ୍ତ ଆଦେଶର ଆବଶ୍ୟକତା ନାହିଁ।
ଏହାପୂର୍ବରୁ ସେପ୍ଟେମ୍ବର ମାସରେ ସୁପ୍ରିମକୋର୍ଟର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ସାରା ଦେଶରେ ବାଣ ଉପରେ ପ୍ରତିବନ୍ଧକ ଲଗାଇବା ମାମଲାକୁ ନେଇ ଆସିଥିଲା, ଯେଉଁଥିରେ କୁହାଯାଇଥିଲା ଯେ ୨୦୧୮ରେ ସୁପ୍ରିମକୋର୍ଟ ଦେଇଥିବା ନିଷ୍ପତ୍ତି ଅକ୍ଷୁର୍ଣ୍ଣ ରହିବ। ଏହା ଅଧୀନରେ ବାଣ ଉପରେ ପ୍ରତିବନ୍ଧକ ଜାରି ରହିବ। ଦିଲ୍ଲୀ / ଏନସିଆର ବ୍ୟତୀତ ଦେଶରେ ସବୁଜ ବାଣକୁ ଅନୁମତି ଦିଆଯିବ। ବେଆଇନ ବାଣ ବ୍ୟବହାର ଉପରେ ଏକ ନିଷେଧାଦେଶ ରହିବ। ବାଡ଼ି, ରକେଟ୍ ଇତ୍ୟାଦି ବାଣ ଉପରେ ପ୍ରତିବନ୍ଧକ ଅକ୍ଷୁର୍ଣ୍ଣ ରହିବ। ସୁପ୍ରିମକୋର୍ଟ କହିଛନ୍ତି ଯେ ଦେଶର ଏଜେନ୍ସିଗୁଡ଼ିକ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପାଳନ କରିବା ଉଚିତ୍।
