ନୂଆଦିଲ୍ଲୀ,୧୩/୦୯ :  ଆଜି ବିଶ୍ବକୁ ସମ୍ବୋଧନ କରିବାକୁ ଯାଉଛନ୍ତି  ନାସା ମହାକାଶଚାରୀ ସୁନୀତା ୱିଲିୟମ୍ସ ଓ ସହଯୋଗୀ ବ୍ୟାରି ୱିଲମୋର।  ଆମେରିକାର ଟେକ୍ସାସ ସ୍ଥିତ ସହର ହ୍ୟୁଷ୍ଟନରେ ଥିବା ନାସାର ଜନସନ୍‌ ସ୍ପେଶ ସେଣ୍ଟର ନ୍ୟୁଜରୁମ ସହିତ ଅନ୍ତର୍ଜାତୀୟ ସ୍ପେଶ ଷ୍ଟେସନ ରୁ ସେମାନେ କଥାବାର୍ତ୍ତା ହେବେ ବୋଲି ଆମେରିକୀୟ ସ୍ପେଶ ଏଜେନ୍ସି ପକ୍ଷରୁ ସୂଚନା ମିଳିଛି । ତେବେ ଏହି ସ୍ପେଶ କଲ୍‌ ଭାରତୀୟ ସମୟ ଅନୁସାରେ ଆଜି  ରାତି ୧୧ଟା ୪୫ମିନିଟରେ ହେବାକୁ ଯାଉଛି । ନାସାର ଜନସନ୍‌ ସ୍ପେଶ ସେଣ୍ଟର ସହିତ ଏହି ଦୁଇ ମହାକାଶଚାରୀ କଥାବାର୍ତ୍ତା ହେବାକୁ ଯାଉଛନ୍ତି । ତେବେ ସେମାନେ ମହାକାଶରୁ ପୃଥିବୀବାସୀଙ୍କ ପାଇଁ କଣ ମେସେଜ ଦେବେ ତାହା ଉପରେ ସାରା ବିଶ୍ବର ନଜର ରହିଛି ।

 ତେବେ ନିକଟରେ ଷ୍ଟାରଲାଇନର ଫେରିଥିବା ବେଳେ ଏହା ଉପରେ ମଧ୍ୟ ସେମାନେ କହିପାରନ୍ତି । ଏହାସହିତ ମହାକାଶରେ ସେମାନଙ୍କ ଦିନ କିପରି ବିତୁଛି ସେ ସମ୍ପର୍କରେ କହିପାରନ୍ତି। ପ୍ରକାଶ ଥାଉକି, ବୋଇଙ୍ଗ ଷ୍ଟାରଲାଇନର ମହାକାଶ ଯାନରେ ଗତ ଜୁନ ୫ ତାରିଖରେ ମହାକାଶକୁ ଯାତ୍ରା କରିଥିଲେ ମହାକାଶଚାରୀ ସୁନୀତା ୱିଲିୟମ୍ସ । ତାଙ୍କ ସହ ସାଥୀ ମହାକାଶଚାରୀ ବ୍ୟାରି ୱିଲମୋର ମଧ୍ୟ ଯାଇଥିଲେ । ସେମାନେ ଜୁନ ୬ ତାରିଖରେ ସ୍ପେଶ ଷ୍ଟେସନରେ ପହଞ୍ଚିଥିଲେ । କିନ୍ତୁ ଦୁଇ ମହାକାଶଚାରୀ ୮ଦିନ ପାଇଁ ଯାଇଥିବା ବେଳେ ଷ୍ଟାରଲାଇନରରେ ଯାନ୍ତ୍ରିକ ତ୍ରୁଟି ଯୋଗୁଁ ସେ ଫେରିପାରିନଥିଲେ । ଦୀର୍ଘ ୩ମାସ ପରେ ବିନା କ୍ରୁ ମେମ୍ବରରେ ଷ୍ଟାରଲାଇନର ଗତ ସେପ୍ଟେମ୍ବର ୭ ତାରିଖରେ ପୃଥିବୀକୁ ଫେରିଛି । ସେହିପରି  ଆସନ୍ତା ବର୍ଷ ୨୦୨୫ ଫେବୃଆରୀରେ ନାସାର ସ୍ପେଶ ଏକ୍ସ କ୍ରୁ-9 ମିଶନ ଜରିଆରେ ସୁନୀତା ଓ ସହଯୋଗୀ ପୃଥିବୀ ପୃଷ୍ଠକୁ ଫେରିବେ ବୋଲି ନାସା ପକ୍ଷରୁ ସୂଚନା ମିଳିଥିଲା।