ନୂଆଦିଲ୍ଲୀ, ୨୫/୮ :  ଟିମ୍ ଇଣ୍ଡିଆର ‘ଗବ୍ବର’ ତଥା ଶିଖର ଧଓ୍ବନ ଅନ୍ତର୍ଜାତୀୟ କ୍ରିକେଟରୁ ସନ୍ନ୍ୟାସର ଘୋଷଣା କରି ଦେଇଛନ୍ତି । ଶିଖର ଧଓ୍ବନଙ୍କ ପରେ ଏବେ ଭାରତ ପୁଣି ଏକ ମହାନ କ୍ରିକେଟରଙ୍କ ସନ୍ନ୍ୟାସ ନେବାକୁ ନେଇ ଚିନ୍ତିତ । ଏହି ଖେଳାଳୀଙ୍କ ଟିମ୍ ଇଣ୍ଡିଆକୁ ଫେରିବା ପ୍ରାୟ ଅସମ୍ଭବ ଜଣାପଡ଼ୁଛି ଏବଂ ତାଙ୍କୁ ଶିଖରଙ୍କ ଭଳି ସନ୍ନ୍ୟାସ ଘୋଷଣା କରିବାକୁ ପଡ଼ିପାରେ । ମାତ୍ର ଏହାର କୌଣସି ଅଫିସିଆଲ ଭାବେ ଖବର ସାମ୍ନାକୁ ଆସି ନାହିଁ । 

ଭାରତର ଦ୍ରୁତ ବୋଲର ଇଶାନ୍ତ ଶର୍ମାଙ୍କୁ ୩ବର୍ଷ ୮ମାସ ହେବ ଟିମ୍ ଇଣ୍ଡିଆରେ ଏଣ୍ଟ୍ରି ମିଳି ନାହିଁ । ଯଦି ଆମେ ବର୍ତ୍ତମାନର ସ୍ଥିତି ଉପରେ ନଜର ପକାଇବା ତେବେ ସେ ଏବେ ଅନ୍ତର୍ଜାତୀୟ କ୍ରିକେଟକୁ ଫେରିବା ଏକ ପ୍ରକାର ଅସମ୍ଭବ ଦେଖାଯାଉଛି । ଇଶାନ୍ତ ଏବେ ୩୫ବର୍ଷର ହୋଇଯାଇଛନ୍ତି ଏବଂ ଚୟନକର୍ତ୍ତା ବି ତାଙ୍କୁ ଭୁଲି ସାରିଛନ୍ତି । ମାତ୍ର ଆଶ୍ବସ୍ତ ଏହାକି ଇଶାନ୍ତ ଶର୍ମାଙ୍କୁ ଏବେ ବି ଆଇପିଏଲରେ ଖେଳିବାର ସୁଯୋଗ ମିଳୁଛି । ଇଶାନ୍ତ ଶର୍ମା ଆଇପିଏଲରେ ଦିଲ୍ଲୀ କ୍ୟାପିଟାଲ୍ସ ଟିମ ଲାଗି ଖେଳୁଛନ୍ତି ।

ଏଭଳି ସ୍ଥଳେ ଇଶାନ୍ତ ଏବେ ଅନ୍ତର୍ଜାତୀୟ କ୍ରିକେଟରୁ ସନ୍ନ୍ୟାସ ନେବା ବ୍ୟତୀତ ଅନ୍ୟ କୌଣସି ବିକଳ୍ପ ଦେଖାଯାଉନାହିଁ । ଟେଷ୍ଟ କ୍ରିକେଟରେ ଟିମ୍ ଇଣ୍ଡିଆର ପସନ୍ଦ ଏବେ ଜସପ୍ରୀତ ବୁମରାହ, ମହମ୍ମଦ ସିରାଜ, ମୁକେଶ କୁମାର ଏବଂ ଆକାଶଦୀପ ସିଂହଙ୍କ ଭଳି ଦ୍ରୁତ ବୋଲର ଅଟନ୍ତି । ଏହା ବ୍ୟତୀତ ଚତୁର୍ଥ ବୋଲର ଭାବେ ଏବେ ଶାର୍ଦୁଳ ଠାକୁର ବି ଅଛନ୍ତି । ସେହିଭଳି ମହମ୍ମଦ ଶାମୀ ବି ଆଘାତ ପରେ ଟିମ୍ ଇଣ୍ଡିଆକୁ ଫେରିବା ଲାଗି ପ୍ରସ୍ତୁତି କରୁଛନ୍ତି ।