ନୂଆଦିଲ୍ଲୀ: ତେଲେଙ୍ଗାନାରେ ରାଜ୍ୟ କଂଗ୍ରେସ ଉପରେ ଜୋରଦାର ଆକ୍ରମଣ କରିଛନ୍ତି ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ (କେସିଆର) । କହିଛନ୍ତି ଯେ ଚଳିତ ନିର୍ବାଚନରେ ଏହା ୨୦ ଟି ଆସନ ମଧ୍ୟ ଜିତିବ ପାରିବ ନାହିଁ । ଏହି ସମୟରେ ସେ ଦାବି କରିଛନ୍ତି ଯେ ଭାରତ ରାଷ୍ଟ୍ର ସମିତି (ବିଆରଏସ) ସଂଖ୍ୟା ଗରିଷ୍ଠତା ହାସଲ କରିବ । 

ତେଲେଙ୍ଗାନାର ମାଧୀରା ଠାରେ ଏକ ନିର୍ବାଚନ ରାଲିକୁ ସମ୍ବୋଧିତ କରି ରାଓ କଂଗ୍ରେସ ଉପରେ ଆକ୍ରମଣ କରି କହିଛନ୍ତି ଯେ, କଂଗ୍ରେସରେ ଏକ ଡର୍ଜନରୁ ଅଧିକ ମୁଖ୍ୟମନ୍ତ୍ରୀ ପ୍ରାର୍ଥୀ ଅଛନ୍ତି । ସେ କହିଛନ୍ତି, “କଂଗ୍ରେସ ଜିତିବାକୁ ଯାଉ ନାହିଁ… ମୁଁ ଆପଣଙ୍କୁ ନିଶ୍ଚିତ ଭାବରେ ଏହା କହୁଛି । କଂଗ୍ରେସ ପାଇଁ ୨୦ ଟି ଆସନ ଜିତିବା ବି କଷ୍ଟକର । ସେ ଆହୁରି କହିଛନ୍ତି, “ନିର୍ବାଚନ ପ୍ରଚାରର ଏକ ଅଂଶ ଭାବରେ ମୁଁ ୭୦ ତମ ନିର୍ବାଚନମଣ୍ଡଳୀ ମାଧୀରା ପରିଦର୍ଶନ କରିବାକୁ ଆସିଛି । ବର୍ତ୍ତମାନ କେବଳ ୩୦ ଟି ବାକି ଅଛି । ଯଦି ମୁଁ ଅବଶିଷ୍ଟ ୩୦ ଟି ନିର୍ବାଚନ ମଣ୍ଡଳୀକୁ ଯାଏ, ତେବେ କଂଗ୍ରେସ ଆହୁରି ହାରିବ । ଯେହେତୁ ମୁଁ ଭ୍ରମଣ କରୁଛି, କଂଗ୍ରେସ ହାରି ହାରି ଯାଉଛି । 

କେସିଆର ଅଭିଯୋଗ କରିଛନ୍ତି ଯେ, ୨୦୧୪ରେ ତେଲେଙ୍ଗାନା ରାଜ୍ୟ ଗଠନ ପୂର୍ବରୁ ଅବିଭକ୍ତ ଆନ୍ଧ୍ରପ୍ରଦେଶକୁ ଶାସନ କରୁଥିବା କଂଗ୍ରେସ ଦଳ ପାନୀୟ ଓ ଜଳସେଚନ ପାଇଁ ପର୍ଯ୍ୟାପ୍ତ ଜଳ ଯୋଗାଣ ମଧ୍ୟ ନିଶ୍ଚିତ କରିପାରି ନଥିଲା । ବହୁ ସଂଖ୍ୟାରେ ରାଜ୍ୟରେ ବିଆରଏସ ସରକାର ଗଠନ ହେବ ବୋଲି ସେ ଆତ୍ମବିଶ୍ୱାସ ବ୍ୟକ୍ତ କରିଛନ୍ତି । ଏଥିରେ କୌଣସି ପ୍ରକାରର ସନ୍ଦେହ ନାହିଁ । 

ସୂଚନାଥାଉକି, ଯେ ତେଲେଙ୍ଗାନାର ୧୧୯ ଟି ସିଟ୍ ପାଇଁ ୩୦ ନଭେମ୍ବରରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ଏହାର ଫଳାଫଳ ୩ ଡିସେମ୍ବରରେ ଆସିବ ।