ଭୁବନେଶ୍ୱର ୨୬/୦୩: ଏବେ ଚାଲିଛି ପବିତ୍ର ରମଜାନ ମାସ । ରମଜାନ ମାସ ସହ ଖଜୁରି କୋଳି ବା ଖଜୁରର ସମ୍ପର୍କ ବେଶ୍ ନିବିଡ । ରମଜାନ ମାସରେ ପ୍ରତ୍ୟେକ ମୁସଲମାନ ସୂର୍ଯ୍ୟୋଦୟ ଠାରୁ ସୂର୍ଯ୍ୟାସ୍ତ ପର୍ଯ୍ୟନ୍ତ ଉପବାସ ବ୍ରତ ପାଳନ କରିଥାନ୍ତି । ଏହି ସମୟ କେବଳ ଖାଦ୍ୟ ନୁହେଁ ଜଳ ସ୍ପର୍ଶ ମଧ୍ୟ କରନ୍ତି ନାହିଁ । ଯାହାକୁ କୁହାଯାଏ ରୋଜା । ସୂର୍ଯ୍ୟାସ୍ତ ପରେ ରୋଜା ଭଙ୍ଗ କରି ଖାଦ୍ୟ ଗ୍ରହଣ (ଇଫ୍ତାର)ର ପର୍ବ ଚାଲେ । ପରିବାର ସଦସ୍ୟ, ବନ୍ଧୁବାନ୍ଧବ ଏହି ଇଫ୍ତାରରେ ଯୋଗ ଦେଇଥାନ୍ତି । ଦିନ ତମାମ ଉପବାସ ରହିବା ପରେ ଉପବାସଧାରୀମାନେ ଖଜୁରି ଖାଇ ଉପବାସ ଭଙ୍ଗ କରିଥାନ୍ତି । ପରସ୍ପରକୁ ଖଜୁରି ମଧ୍ୟ ଦେଇଥାନ୍ତି ।
ଖଜୁରି ଖାଇ ଉପବାସ ଭଙ୍ଗ କରିବାର ପ୍ରଥା କାହିଁ କେଉଁ କାଳରୁ ଚଳିଆସୁଛି । ଏହାର ଧାର୍ମିକ ବିଶେଷତ୍ୱ ହେଲା ଇସଲାମ୍ ଧର୍ମର ପ୍ରତିଷ୍ଠାତା ମହାପୁରୁଷ ମହମ୍ମଦ ଯେବେ ରୋଜା ପାଳନ କରିଥିଲେ ପ୍ରଥମେ ୩ଟି ଖଜୁରି ଖାଇବା ସହ ଜଳ ଗ୍ରହଣ କରି ରୋଜା ଭଙ୍ଗ କରିଥିଲେ । ଏଣୁ ତାଙ୍କର ଅନୁଗାମୀମାନେ ସମସ୍ତେ ଦିନତମାମର ଉପବାସ ବ୍ରତକୁ ଖଜୁରି ଖାଇ ଭଙ୍ଗ କରିବା ଏକ ବିଧିରେ ପରିଣତ ହୋଇଛି । ଆରବ ଦେଶରେ ଖଜୁରି ପ୍ରଚୁର ପରିମାଣରେ ଉପଲବ୍ଧ ହୋଇଥାଏ । ଏହା ‘ସ୍ୱର୍ଗର ଫଳ’ ନାମରେ ପରିଚିତ । ତୁର୍କୀରେ ଜଣଙ୍କୁ କୃତଜ୍ଞତା ଜଣାଇବାର ମାଧ୍ୟମ ଭାବେ ଖଜୁରିକୁ ବ୍ୟବହାର କରାଯାଇଥାଏ । ଏଣୁ ଇଫ୍ତାର ଭୋଜି ହେଉ ଅବା କାହାକୁ ଖାଦ୍ୟ ଉପହାର ସ୍ୱରୂପ ଦେବାକୁ ହେଉ, ଏଥିରେ ଖଜୁରି ରହିବା ନିଶ୍ଚିତ । ଏକ ମୁସଲମାନ ଘରପରିବାର ସମ୍ପର୍କରେ ଖଜୁରି ବିନା ଚିନ୍ତା କରାଯାଇନପାରେ ।
ଧାର୍ମିକ,ପାରମ୍ପରିକ ବିଶେଷତ୍ୱ ବ୍ୟତୀତ ବିଜ୍ଞାନ ଦୃଷ୍ଟିକୋଣରୁ ଖଜୁରିର ମହତ୍ୱ ରହିଛି । ଉପବାସ ପରେ ଖଜୁରି ଖାଇବା ଶରୀର ପାଇଁ ଅତ୍ୟନ୍ତ ଉପଯୋଗୀ । କାରଣ ଏଥିରେ ରହିଛି ପ୍ରାକୃତିକ ଶର୍କରା । ଏହା ଜଳୀୟ ଅଂଶରେ ବି ଭରପୁର । ଖଜୁରିରେ ତନ୍ତୁ ରହିଥାଏ । ପୁଣି ପୋଟାସିଅମ,ମାଗ୍ନେସିଅମ ଏବଂ ବିଭିନ୍ନପ୍ରକାର ଜୀବସାର ବି ରହିଛି । ଦୀର୍ଘ ସମୟର ଉପବାସ ପରେ ଖଜୁରି ଗ୍ରହଣ କଲେ ଏହା କ୍ରମେ ଶରୀରକୁ ଶକ୍ତି ଓ ଫୁର୍ତ୍ତି ଯୋଗାଇବା ସହିତ ପେଟରେ ଅମ୍ଳ ସୃଷ୍ଟି କରେ ନାହିଁ । ଏଣୁ ସବୁଦୃଷ୍ଟିରୁ ରୋଜା ପରେ ଖଜୁରି ଖାଇବାକୁ ପ୍ରାଧାନ୍ୟ ଦିଆଯାଇଛି ।