ଲକ୍ଷ୍ନୌ, ୨୦।୪: ଜାରି ହେଲା ଉତ୍ତରପ୍ରଦେଶ ବୋର୍ଡର ୧୦ମ ଓ ଦ୍ୱାଦଶ ଶ୍ରେଣୀର ପରୀକ୍ଷା ଫଳାଫଳ । ଚଳିତ ବର୍ଷ ୧୦ମ ଶ୍ରେଣୀରୁ ୮୯.୫୦% ଛାତ୍ରଛାତ୍ରୀ ପାସ୍ ହୋଇଥିବା ବେଳେ ଦ୍ୱାଦଶ ଶ୍ରେଣୀରେ ୮୨.୬% ଛାତ୍ରଛାତ୍ରୀ ପାସ୍ ହୋଇଛନ୍ତି । ୧୦ମ ଶ୍ରେଣୀରେ ଉତ୍ତରପ୍ରଦେଶର ସୀତାପୁରର ଝିଅ ପ୍ରାଚୀ ନିଗମ ଓ ଇଣ୍ଟରମିଡିଏଟ୍ ପରୀକ୍ଷାରେ ସୀତାପୁରର ଶୁଭମ ବର୍ମା ପ୍ରଥମ ସ୍ଥାନ ଅଧିକାର କରିଛନ୍ତି । ଛାତ୍ରଛାତ୍ରୀ ନିଜ ନିଜର ପରୀକ୍ଷା ଫଳ ସରକାରୀ ୱେବସାଇଟ୍ upresults.nic.in କିମ୍ୱା result.upmsp.edu.in ଜରିଆରେ ପରୀକ୍ଷା ଫଳ ଜାଣିପାରିଛନ୍ତି । 

ୟୁପି ବୋର୍ଡର ୧୦ମ ଓ ଦ୍ୱାଦଶ ପରୀକ୍ଷା ଫଳାଫଳ ଜାଣିବା ଲାଗି ଛାତ୍ରଛାତ୍ରୀଙ୍କୁ ନିଜ ରୋଲ୍ ନଂ ଓ ଆଡମିଟ୍ କାର୍ଡର ବ୍ୟବହାର କରିବାକୁ ହେବ । ଚଳିତ ବର୍ଷ ୨୨ ଫେବୃଆରୀରୁ ୯ ମାର୍ଚ୍ଚ ପର୍ଯ୍ୟନ୍ତ ହାଇସ୍କୁଲ୍ ଓ ଇଣ୍ଟରମିଡିଏଟ୍ ପରୀକ୍ଷା ଆୟୋଜନ ହୋଇଥିଲା । ୟୁପି ବୋର୍ଡ ପରୀକ୍ଷା ଦେବା ଲାଗି ମୋଟ୍ ୫୫, ୨୫, ୩୦୮ ଛାତ୍ରଛାତ୍ରୀ ପଞ୍ଜିକରଣ କରିଥିଲେ । ଯେଉଁଥିରେ ୧୦ମ ଶ୍ରେଣୀରୁ ୨୯, ୪୭, ୩୧୧ ଜଣ ଓ ଦ୍ୱାଦଶ ଶ୍ରେଣୀରୁ ୨୫, ୭୭, ୯୯୭ ଛାତ୍ର ଅଛନ୍ତି । ତେବେ ୨୦୨୩ରେ ୧୦ମ ଶ୍ରେଣୀରୁ ମୋଟ୍ ୮୯.୭୮% ପିଲା ପାସ୍ ହୋଇଥିବା ବେଳେ ଦ୍ୱାଦଶ ଶ୍ରେଣୀରେ ମୋଟ୍ ୭୫.୫୨% ପାସ୍ କରିଥିଲେ ।