ନୂଆଦିଲ୍ଲୀ,୧୭/୦୪: ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଆଜି ଅଭିନେତା ସଲମାନ ଖାନଙ୍କୁ ଭେଟିଛନ୍ତି। ଦୁଇ ଦିନ ପୂର୍ବେ ସଲମାନ ଖାନଙ୍କ ଘର ବାହାରେ ଗୁଳି ବିନିମୟ ହୋଇଥିଲା, ଯାହା ପରେ ସିଏମ ସିନ୍ଦେ ଆଜି ବାନ୍ଦ୍ରାସ୍ଥିତ ତାଙ୍କ ଘରେ ପହଞ୍ଚିଥିଲେ। ସିନ୍ଦେ ଅଭିନେତାଙ୍କ ପିତା ତଥା ପ୍ରସିଦ୍ଧ ସ୍କ୍ରିନ୍ ରାଇଟର୍ ସଲିମ୍ ଖାନ୍ଙ୍କୁ ମଧ୍ୟ ଭେଟିଥିଲେ। ସଲିମ ଖାନ ଏନଡିଟିଭିକୁ କହିଛନ୍ତି ଯେ ସିଏମ ତାଙ୍କୁ ଆଶ୍ବାସନା ଦେଇଛନ୍ତି। ସେ କହିଛନ୍ତି, "ଯଦି କିଛି ବି ହୋଇଥାଆନ୍ତା, କୌଣସି ଗ୍ୟାରେଣ୍ଟି ନାହିଁ। ସମଗ୍ର ପରିବାର ସୁରକ୍ଷିତ, ଏହା ଏକ ଭଲ କଥା।" ସେ କହିଛନ୍ତି, "ଆମର ଭୟ ନାହିଁ। ମୃତ୍ୟୁ ତାରିଖ ସ୍ଥିର ହୋଇସାରିଛି।" ଏପରିକି ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯିବା ନେଇ ନିଶ୍ଚିତ କରିଛନ୍ତି ମୁଖ୍ୟମନ୍ତ୍ରୀ ସିନ୍ଦେ।
ଯେତେବେଳେ ପରିବାରକୁ କୌଣସି ଧମକପୂର୍ଣ୍ଣ କଲ୍ ଆସିଛି କି ବୋଲି ପଚରାଗଲା। ସଲିମ ଖାନ୍ ସେତେବେଳେ କହିଛନ୍ତି ଯେ, "ନା, କିନ୍ତୁ ଏପରି ଘଟଣା ସାଧାରଣତଃ ଡରାଇବା ଧମକାଇବା ପାଇଁ ହିଁ ହୋଇଥାଏ। ସେମାନେ କହିପାରନ୍ତି ଯେ ଏହି ମାମଲା କୃଷ୍ଣକାୟ ହରିଣ ହତ୍ୟାକୁ ନେଇ ଥିଲା କିନ୍ତୁ ସେମାନଙ୍କର ଉଦ୍ଦେଶ୍ୟ ଅନ୍ୟ କିଛି।"
ଏହାର ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ପୋଲିସକୁ ପ୍ରଶଂସା କରି ଖାନ କହିଛନ୍ତି ଯେ ମୁମ୍ବାଇ ପୋଲିସ ତତ୍ପରତା ପ୍ରକାଶ କରି ତୁରନ୍ତ ଗିରଫ କରିଥିଲା। ଏହାପୂର୍ବରୁ ସଲମାନ ଖାନଙ୍କ ଗାଲାକ୍ସି ଆପାର୍ଟମେଣ୍ଟ ଘର ବାହାରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରୁଥିବାବେଳେ ଏକନାଥ ସିନ୍ଦେ "ଲରେନ୍ସ ବିଷ୍ଣୋଇକୁ ଖୁବ୍ଶୀଘ୍ର ହଟାଇବା" ବିଷୟରେ କହିଥିଲେ। ସେ କହିଛନ୍ତି, "କୌଣସି ଗ୍ୟାଙ୍ଗ କିମ୍ବା ଗ୍ୟାଙ୍ଗ ଓ୍ବାରକୁ ଅନୁମତି ଦିଆଯିବ ନାହିଁ। ଆମେ ଏହା ଘଟିବାକୁ ଦେବୁ ନାହିଁ। ଆମେ ଲରେନ୍ସ ବିଷ୍ଣୋଇକୁ ଖୁବ୍ଶୀଘ୍ର ହଟାଇବୁ।"