ପୁରୀ,୧୪/୦୯: ପୁରୀ ଜିଲ୍ଲା  କଣାସ ବ୍ଲକ୍‌ ଗଡ଼ିଶାଗୋଦା ଥାନା ଅନ୍ତର୍ଗତ ଦୟାନଦୀର ନୂଆଗାଁ ସେତୁ  ନିକଟରୁ ଅଖା ଭିତରେ ହାତ ବନ୍ଧା ଅବସ୍ଥାରେ ଜଣେ ଯୁବତୀଙ୍କ ମୃତଦେହ  ଉଦ୍ଧାର କରାଯାଇଛି । ତାଙ୍କ ପରିଚୟ  ମିଳିନଥିବା ବେଳେ ପୁଲିସ୍‌  ଘଟଣାର ତଦନ୍ତ ଜାରି  ରଖିଛି। 

ରାତି ପ୍ରାୟ ସାଢ଼େ ୮ଟା  ବେଳେ ସ୍ଥାନୀୟ ଲୋକେ ନଦୀକୁ ଶୌଚ ପାଇଁ  ଯିବାବେଳେ ଏକ ଜରି ଅଖା ଦେଖିଥିଲେ । ପାଖକୁ ଯିବାରୁ ଦୁର୍ଗନ୍ଧ ବାହାରି ଥିଲା । ଯାହାକୁ  ନେଇ ଲୋକେ ସନ୍ଦେହ  କରିଥିଲେ । ଏନେଇ ପୁଲିସ୍‌କୁ ଜଣାଇ  ଥିଲେ । ଗଡ଼ିଶାଗଦା ଥାନା ଅଧିକାରୀ ସଞ୍ଜୟ  କୁମାର ନାୟକ ଟିମ୍‌ ସହ ଘଟଣାସ୍ଥଳରେ ପହଞ୍ଚି ନଦୀରୁ ଅଖା ଜବତକରି ଉପରକୁ  ଆଣି ଖୋଲିବା ପରେ ଜଣେ ଯୁବତୀଙ୍କ ମୃତଦେହ ମିଳିଥିଲା । ଯୁବତୀଙ୍କ ବୟସ ଆନୁମାନିକ ୩୦  ବର୍ଷ ହେବ । ସେ ଏକ ୱାନ୍‌ ଥାର୍ଡ  ପ୍ୟାଣ୍ଟ ସହ ଅନ୍ତବସ୍ତ୍ର ପିନ୍ଧିଥିଲେ । ଓଢ଼ଣୀ ପକାଇଥିଲେ । ଯୁବତୀଙ୍କୁ ଏକ  ବେଡ୍‌ସିଟ୍‌ରେ ଗୁଡ଼ାଇ ଜରି ଅଖାରେ ଭର୍ତ୍ତି  କରାଯାଇଥିଲା । ହାତକୁ ପ୍ଲାଷ୍ଟିକ୍‌ ରଶିରେ  ବନ୍ଧା ଯାଇଥିଲା । ରିପୋର୍ଟ ଲେଖା ହେବା  ପର୍ଯ୍ୟନ୍ତ ଏନେଇ ଥାନାରେ କେହି ଏତଲା  ଦେଇନଥିଲେ । ଶବଟି ନଦୀ କୂଳରେ  ରଖାଯାଇଛି । ସାଇଣ୍ଟିଫିକ୍‌ ଟିମ୍‌ ପହଞ୍ଚି  ତଦନ୍ତ କରିବା ପରେ ଶବକୁ ବ୍ୟବଚ୍ଛେଦ ଲାଗି ପଠାଯିବ ବୋଲି ପୁଲିସ୍‌ କହିଛି ।