ରାଞ୍ଚି,୫।୨: ଝାଡଖଣ୍ଡରେ ମୁଖ୍ୟମନ୍ତ୍ରୀ ଚମ୍ପାଇ ସୋରେନଙ୍କ ସରକାର ଆସ୍ଥା ଭୋଟ ଜିତିଛନ୍ତି। ଏହା ଭିତରେ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପତ୍ନୀ କଳ୍ପନା ସୋରେନଙ୍କୁ ଭେଟିଛନ୍ତି। ଏହି ସାକ୍ଷାତ ହେମନ୍ତ ସୋରେନ୍ଙ୍କ ବାସଭବନରେ ହୋଇଛି। ଏହି ସମୟରେ ରାହୁଲ କହିଛନ୍ତି, ଆମେ ସମସ୍ତେ ଏକଜୁଟ ହୋଇ ନ୍ୟାୟ ପାଇଁ ସଂଗ୍ରାମ ଜାରି ରଖିବୁ ଏବଂ ଲୋକଙ୍କ ପାଇଁ ସ୍ୱର ଉତ୍ତୋଳନ କରିବୁ। ଘୃଣା ହାରିବ, INDIA ଜିତିବ (ବିରୋଧୀ ଦଳ 'ଭାରତ')।’
ଫ୍ଲୋର ଟେଷ୍ଟରେ ଚମ୍ପାଇ ସରକାରଙ୍କ ସଫଳତା ପରେ କଂଗ୍ରେସ କହିଛି,ଝାଡଖଣ୍ଡର ଏକଛତ୍ରବାଦୀ ଶାସକଙ୍କ ଗର୍ବକୁ ଭାଙ୍ଗି ଦଇଛି। ଇଣ୍ଡିଆର ବିଜୟ ହୋଇଛି। ଇଣ୍ଡିଆ ମେଣ୍ଟର ସରକାର ଆଜି ବିଧାନସଭାରେ ଆସ୍ଥା ଭୋଟ ଜିତିଛି। ଆପଣ ସମସ୍ତଙ୍କୁ ବହୁତ ବହୁତ ଧନ୍ୟବାଦ। ଜୟ ଜୁହାର...।’
ସେଭଳି ଜେଏମ୍ଏମ୍ ସାଂସଦ ମହୁଆ ମାଝି କହିଛନ୍ତି, ଏହା ଲୋକତନ୍ତ୍ରର ବିଜୟ। ଯେଉଁଭଳି ସବୁ ବିଧାୟକ ଏକଜୁଟ ଅଛନ୍ତି, ଏହା ହେମସ୍ତ ସୋରେନ୍ଙ୍କ ବୁଝାମଣା ଦ୍ବାରା ସମ୍ଭବ ହୋଇଛି। କଂଗ୍ରେସ, ଆରଜେଡିର ସବୁ ନେତା ଯେଉଁଭଳି ମିଶି ରଣନୀତି ତିଆରି କରିଛି ତାହା ଅସମ୍ଭବକୁ ସମ୍ଭବ କରି ଦେଖାଇଛି।’
