ବ୍ରହ୍ମପୁର,୨୯।୧୧ : ଅଧିକ ଯୌତୁକ ପାଇଁ ସ୍ତ୍ରୀ ଦେହରେ କିରୋସିନି ଢାଳି ତାଙ୍କୁ ପୋଡି ହତ୍ୟା କରିବା ମାମଲାର ରାୟ ପ୍ରକାଶ କରିଛନ୍ତି ଵ୍ରହ୍ମପୁର ଅତିରିକ୍ତ ଜିଲା ଦୌରା ଜଜ(ଏଡିଜେ)-୩ ରାଜକୁମାର ଦାଶ। ଅଭିଯୁକ୍ତ ସ୍ୱାମୀ ଜରଡ଼ା ଥାନ ଅନ୍ତର୍ଗତ ନନ୍ଦୀଗାଁ ର ବୈରାଗୀ ନାଇକଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଅଭିଯୁକ୍ତକୁ ୧୩ ବର୍ଷ ୬ମାସ ଜେଲ ଦଣ୍ଡ ଶୁଣାଇଛନ୍ତି । ସେହିପରି ଅଭିଯୁକ୍ତଙ୍କୁ ୧୦ ହଜାର ଟଙ୍କା ଜରିମାନା ଦେବାକୁ ନିର୍ଦେଶ ହୋଇଛି । ଜରିମାନା ଅନାଦେୟ ଅତିରିକ୍ତ ୩ ମାସ ଅଧିକ ଜେଲ ଦଣ୍ଡ ଭୋଗିବାକୁ ଜଜ ରାୟରେ ଉଲ୍ଲେଖ କରିଛନ୍ତି।
ଘଟଣାରୁ ପ୍ରକାଶଯେ, ବୈରାଗୀ ନାଇକ ୨୦୧୨ ମସିହାରେ ଜରଡ଼ା ଥାନା ଅନ୍ତର୍ଗତ ତଣ୍ଡିପୁର ଗ୍ରାମର ସ୍ବପ୍ନା ନାଇକଙ୍କୁ ବିବାହ କରିଥିଲେ । ହେଲେ ବିବାହର କିଛି ଦିନ ପରେ ଅଭିଯୁକ୍ତ ଅଧିକ ଯୌତୁକ ଦାବି କରି ନିଜ ସ୍ତ୍ରୀ ସ୍ବପ୍ନାଙ୍କୁ ମାନସିକ ଓ ଶାରୀରିକ ନିର୍ଯାତନା ଦେବା ସହ ମାରପିଟ କରୁଥିଲେ । ୨୦୧୫ ଅଗଷ୍ଟ ୨୪ ତାରିଖରେ ବୈରାଗୀ ନିଜ ସ୍ତ୍ରୀ ସ୍ବପ୍ନାଙ୍କୁ ମୁଣ୍ଡକୁ ପ୍ରଥମେ ଆକ୍ରମଣ କରି ତାଙ୍କୁ ଚେତାଶୂନ୍ୟ କରିଦେଇଥିଲେ । ଏହାପରେ ଘର ଭିତରେ ତାଙ୍କ ଶରୀରରେ କିରାସିନି ଢାଲି ନିଆଁ ଲଗାଇ ଦେଇଥିଲେ। ପରେ ସ୍ତ୍ରୀ ନିଆଁରେ ପୋଢି ହୋଇଗଲା ବୋଲି ଅଭିନୟ କରିବା ସହ ତାଙ୍କୁ ଉଦ୍ଧାର କରିବା ବେଳେ ସେ ମଧ୍ୟ ଆହତ ହୋଇଯାଇଥିଲେ। ଏଥିରେ ସ୍ବପ୍ନା ଗୁରୁତର ଭାବେ ଆହତ ହେବା ସହ ତାଙ୍କ ଶରୀରର ଶତକଡା ୭୦ ଭାଗ ପୋଡି ଯାଇଥିଲା । ଏହି ଘଟଣାରେ ଅଭିଯୁକ୍ତ ବୈରାଗୀ ମଧ୍ୟ ଆହତ ହୋଇଥିଲେ । ତେବେ ସ୍ବାପ୍ନାଙ୍କୁ ଉଦ୍ଧାର କରାଯାଇ ବ୍ରହ୍ମପୁର ବଡ ଡାକ୍ତରଖାନାକୁ ଅଣାଯାଇଥିବା ବେଳେ ରାସ୍ତାରେ ତାଙ୍କର ମୃତ୍ୟୁ ହୋଇଯାଇଥିଲା ।
ଏପଟେ ବୈରାଗୀଙ୍କ ଚିକିତ୍ସା ଡାକ୍ତରଖାନାରେ ଚାଲୁ ରହିଥିଲା। ଘଟଣାକୁ ନେଇ ସ୍ବପ୍ନାଙ୍କ ମାଆ ଏସ. ରାଧା ଜରଡା ଥାନାରେ ଅଭିଯୋଗ କରିବା ପରେ ପୋଲିସ ଏକ ମାମଲା ରୁଜୁ ହୋଇଥିଲା । ଅଭିଯୁକ୍ତ ବୈରାଗୀ ଡାକ୍ତରଖାନାରୁ ସୁସ୍ଥ ହେବା ପରେ ପୋଲିସ ୨୦୧୫ ଅକ୍ଟୋବର ୪ ତାରିଖରେ ତାଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ପରେ ତତ୍କାଳୀନ ଜରଡ଼ା ଥାନାଧିକାରୀ ତଥା ତଦନ୍ତକାରୀ ଅଧିକାରୀ ସୁଜିତ ନାୟକ କୋର୍ଟରେ ଚାର୍ଜସିଟ ଦାଖଲ କରିଥିଲେ। କୋର୍ଟରେ ମାମଲାର ବିଚାରଣା ବେଳେ ମୋଟ ୨୩ ଜଣ ସାକ୍ଷୀଙ୍କ ବୟାନ ରେକର୍ଡ ହୋଇଥିଲା ।ଗିରଫ ପରଠାରୁ ଅଭିଯୁକ୍ତ ବୈରାଗୀ ଵ୍ରହ୍ମପୁର ମଣ୍ଡଳକାରାଗାରରେ ବିଚାରାଧୀନ ବନ୍ଦୀ ରହିଥିଲେ। ରାୟ ପ୍ରକାଶ ବେଳେ ତାଙ୍କ ଜେଲରୁ କଢ଼ା ସୁରକ୍ଷା ରେ ଅଣାଯାଇ କୋର୍ଟରେ ହାଜର କରାଯାଇଥିଲା। ଉପଯୁକ୍ତ ସାକ୍ଷ୍ୟ ପ୍ରମାଣ ମିଳିଥିବାରୁ ଜଜ ଉପରୋକ୍ତ ରାୟ ପ୍ରକାଶ କରିଛନ୍ତି। ସରକାରଙ୍କ ପକ୍ଷରୁ କ୍ୟାଡର ଅତିରିକ୍ତ ପିପି ବିକ୍ରମ କୁମାର କୁଣ୍ଡ ମକଦ୍ଦମା ପରିଚାଳନା କରୁଥିଲେ।
ଆହୁରି ପଢନ୍ତୁ :୪ ବର୍ଷ ପରେ ଧରାପଡିଲା ଅଭିଯୁକ୍ତ : ଛାଡ଼ଖାଇରେ ଘରକୁ ଆସିଥିଲା, ମାଡ଼ି ବସିଲା ପୋଲିସ