ନୂଆଦିଲ୍ଲୀ: ନାଗରିକତା ସଂଶୋଧନ ଆଇନ୍ (ସିଏଏ) ଅନୁଯାୟୀ ୩୦୦ ଜଣଙ୍କୁ ଭାରତର ନାଗରିକତା ମିଳିଛି । ସେମାନଙ୍କ ମଧ୍ୟରୁ ୧୪ ଜଣଙ୍କୁ ସିଏଏରେ ନାଗରିକତା ମିଳିଥିବା ନେଇ ପ୍ରମାଣପତ୍ର ଦିଆଯାଇଛି । ଏନେଇ ମେ ୧୫ (ବୁଧବାର)ରେ ବୈଦେଶିକ ମନ୍ତ୍ରାଳୟ ସୂଚନା ଦେଇଛି । ସିଏଏରେ ୧୪ ଜଣଙ୍କୁ ଭାରତୀୟ ନାଗରିକତା ପ୍ରମାଣପତ୍ର ପ୍ରଦାନ କରାଯାଇଛି । ନାଗରିକତା ସଂଶୋଧନ ଆଇନ୍ ଲାଗି ୨୦୨୪ରେ ବିଜ୍ଞପ୍ତି ଜାରି ହେବା ପରେ ପ୍ରଥମ ଥର ନାଗରିକତା ପ୍ରମାଣପତ୍ର ବିତରଣ କରାଯାଇଛି ।
କେନ୍ଦ୍ର ଗୃହ ସଚିବ ଅଜୟ କୁମାର ଭଲ୍ଲା ନୂଆଦିଲ୍ଲୀରେ ଆବେଦକଙ୍କୁ ପ୍ରମାଣପତ୍ର ଦେଇଛନ୍ତି । ଏହି ସମୟରେ ଅଜୟ ଭଲ୍ଲା ଆବେଦକଙ୍କୁ ଧନ୍ୟବାଦ ଦେବା ସହ ସିଏଏରେ ଥିବା ପ୍ରମୁଖ ପ୍ରସଙ୍ଗ ଉପରେ କହିଥିଲେ । ସୂଚନାଯୋଗ୍ୟ, ଭାରତ ସରକାର ୧୧ ମାର୍ଚ୍ଚ ୨୦୨୪ରେ ନାଗରିକତା ସଂଶୋଧନ ଆଇନ୍କୁ ନେଇ ବିଜ୍ଞପ୍ତି ଜାରି କରିଥିଲେ ।
ଏହି ନିୟମ ଅନୁସାରେ, ପାକିସ୍ତାନ, ବାଂଲାଦେଶ ଏବଂ ଆଫଗାନିସ୍ତାନରୁ ଭାରତକୁ ଆସିଥିବା ହିନ୍ଦୁ, ଶିଖ, ଜୈନ, ବୌଦ୍ଧ, ପାର୍ସୀ ଏବଂ ଖ୍ରୀଷ୍ଟିଆନ ଧର୍ମାବଲମ୍ବୀଙ୍କୁ ଭାରତର ନାଗରିକତା ମିଳିବ । ଧାର୍ମିକ ଉତ୍ପୀଡ଼ନର ଶିକାର ହୋଇ ୩୧.୧୨.୨୦୧୪ ପର୍ଯ୍ୟନ୍ତ ଭାରତ ଚାଲିଆସିଥିବା ଉପରୋକ୍ତ ୩ଟି ଦେଶର ସଂଖ୍ୟାଲଘୁଙ୍କୁ ନାଗରିକତା ଦେବା ଲାଗି ସିଏଏ ଲାଗୁ ହୋଇଛି ।